قۇرىلىسقا رۇقسات الۋ بارىنشا جەڭىلدەتىلەدى - ن. نازاربايەۆ

استانا. قازاقپارات - قۇرىلىسقا رۇقسات الۋ بارىنشا جەڭىلدەتىلەدى. بۇل تۋرالى بۇگىن اقوردادا وتكەن ق ر ۇكىمەتىنىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ايتتى.

«قۇرىلىسقا رۇقسات الۋدى ايتارلىقتاي جەڭىلدەتەمىز. كوپ ايتادى، كوپ سىنايدى، كوپ جازادى جانە بۇل ماسەلەنى شەشە الار ەمەسپىز. بارلىق ارالىق رۇقساتتار مەن ليتسەنزيالار الىنىپ تاستالاتىن بولادى. قازىرگى ۋاقىتتا ساراپتاما باسەكەلىك ورتاعا كوشەدى. قۇرىلىس جۇرگىزۋگە رۇقسات الۋ 30, 20, 10 ۇستانىم بويىنشا جۇزەگە اسىرىلاتىن بولادى»، - دەدى ق ر پرەزيدەنتى.

ەلباسى وتە رەتتە اتالعان ۇستانىمداردى دا تارقاتا ايتىپ بەردى.

«تاپسىرماعا ساۋلەتتىك جوسپار الۋ 30 كۇننەن اسپاۋى ءتيىس. جوبا ديزاينىن كەلىسۋگە 20 كۇن بەرىلسە، كەلىسىمنىڭ ءوزىن الۋعا 10 كۇن كەتەدى. 2 اي. قازىر قانشا؟ ءبىر جىل، ەكى جىل. ءبىز مۇنى زاڭنامالىق تۇرعىدا قاتاڭ ەنگىزۋگە ءتيىسپىز»، - دەدى مەملەكەت باسشىسى.

سونىمەن قاتار ق ر پرەزيدەنتى قۇرىلىستى قالىپتاستىرۋ جانە ەۋروكودتار جۇيەسىن ەنگىزۋ بارىسىندا رەسۋرستىق ءادىس قولدانىلاتىنىن ايتتى.

«ءبىز ءالى كۇنگە دەيىن كەڭەستىك قۇرىلىس نورمالارى جانە ەرەجەلەرىمەن جۇمىس ىستەۋدەمىز»، - دەدى ەلباسى.