مەملەكەتتىك قىزمەتكەرلەر ءۇشىن جاڭا تەستىلەۋ سىناقتارى ەنگىزىلەدى - ەلباسى

استانا. قازاقپارات - مەملەكەتتىك قىزمەتكەرلەر ءۇشىن جاڭا تەستىلەۋ ەنگىزىلەدى. بۇگىن اقوردادا قايتا تاعايىندالعان ۇكىمەتتىڭ العاشقى كەڭەيتىلگەن وتىرىسىندا ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.

ەسكە سالايىق، جيىن بارىسىندا ەلباسىنىڭ سايلاۋ الدىندا جاريالاعان بەس حالىقتىق رەفورماسىن جۇزەگە اسىرۋ ماسەلەلەرى تالقىلانۋدا.

«بەس حالىقتىق رەفورمادا ايقىندالعان ءبىرىنشى ماسەلە - كاسىبي، دەربەس مەملەكەتتىك اپپاراتتى قۇرۋ. بۇل دەگەنىمىز نە؟ ءبىز مەملەكەتتىك قىزمەتتىڭ مانساپتىق مودەلىنە ءوتۋىمىز كەرەك. مەملەكەتتىك قىزمەتكە ەڭ ادال، تالانتتى، دايىندىقتان وتكەن ازاماتتار عانا قابىلدانادى. قازاقشا ايتقاندا، بۇل «وڭاي شارۋا ەمەس». سوزبەن ايتۋ ءبىر باسقا، ال ونى ورىنداۋ زور كۇشتى تالاپ ەتەتىن وتە ۇلكەن، ماعىنالى جۇمىس»، - دەدى ن. نازاربايەۆ.

بۇل رەتتە ەلباسى مەملەكەتتىك قىزمەتكە ءاربىر كانديداتتىڭ جەكە قاسيەتتەرىن باعالاۋ ءۇشىن جاڭا سىناقتار ەنگىزىلەتىنىن جەتكىزدى. ونداي تەستىلەر مەملەكەتتىك قىزمەتكەرلەردىڭ ءبىرىڭعاي داعدىلارىنا نەگىزدەلەدى. «ءبىز مەملەكەتتىك قىزمەتكەرلەردىڭ كاسىبي اپپاراتىن قۇرۋعا ءتيىسپىز. ولاردىڭ جالاقىسى دا باسەكەلەستىك قاعيداتىندا بولۋى كەرەك، ياعني، بۇل جۇمىس ناتيجەسىنە تاۋەلدى بولادى. شامامەن ولاردىڭ جالاقىسى جەكە سەكتوردىڭ 70 پايىزىنا جۋىقتاۋى مۇمكىن. الايدا، بۇعان قوسىلاتىن ۇستەمە اقىلاردى ءاربىر ورگاندار ءوز ىشىنەن تابۋى كەرەك. ءبىز مينيسترلەر مەن ۆەدومستۆو باسشىلارىنا بيۋدجەت ماسەلەسىن وزدەرى شەشۋگە مۇمكىندىك جاسايمىز»، - دەدى ن. نازاربايەۆ.

اۆتور: قانات مامەتقازى ۇلى