ەلباسى جاڭادان تاعايىندالعان ۇكىمەت جۇمىسىنا تابىس تىلەدى
جيىندى اشقان ەلباسى ساۋىردەگى سايلاۋعا توقتالا كەلە، حالىقتىڭ ءوز تاڭداۋىن جاساپ، اۋىزبىرشىلىگىن تانىتقانىن جەتكىزدى. «ەكىنشىدەن، جۇرگىزىلىپ جاتقان ساياسي، ەكونوميكالىق جولىمىز ماقۇلدانىپ، سايلاۋالدى باعدارلامامىزبەن جۇرۋگە حالىق ءوز ريزاشىلىعىن تانىتىپ وتىر. ەندىگى ماسەلە باعدارلامانى، سونىڭ ىشىندە بەس حالىقتىق رەفورمانى ورىنداۋ - وزەكتى. بۇل ءۇشىن ەڭ الدىمەن ەلدىڭ بەلسەندىلىگى كەرەك. ورتاق جەڭىسىمىزدى ارى قاراي جەتىستىككە ۇلاستىرۋ ءۇشىن اۋقىمدى جۇمىس كۇتىپ تۇر»، - دەدى ن. نازاربايەۆ.
سونىمەن قاتار، ەلباسى ۇكىمەت قۇرامى جاڭا تاعايىندالعانىن ەسكە سالىپ، ولاردىڭ جۇمىسىنا تابىس تىلەدى. «سەنىم كورسەتىلدى. ارى قاراي جۇمىس ىستەۋگە بارلىق جاعدايلار بار. وسىنىڭ ءبارىن اقتاۋعا تيىسسىزدەر. ەڭ باستىسى، سايلاۋ مەملەكەتتىڭ بەدەلىن كوتەرە تۇسەدى»، - دەدى ن. نازاربايەۆ.
ۇكىمەتتىڭ كەڭەيتىلگەن وتىرىسىندا بۇعان دەيىن جاريالانعان بەس حالىقتىق رەفورما ماسەلەلەرى تالقىلانۋدا. بۇل رەتتە ەلباسى بەس حالىقتىق رەفورمانىڭ ءارقايسىسى جيىرما قادامدى قامتيتىنىن قاداپ ايتتى.
اۆتور: قانات مامەتقازى ۇلى
