ونەر سۇيەر قاۋىم ك س ر و حالىق ءارتىسى، اتاقتى ديريجەر شامعون قاجىعاليەۆتى اقتىق ساپارعا شىعارىپ سالدى - فوتو

 الماتى. قازاقپارات - بۇگىن الماتى جۇرتشىلىعى ك س ر و حالىق ءارتىسى، مەملەكەتتىك سىيلىقتىڭ يەگەرى، قۇرمانعازى اتىنداعى مەملەكەتتىك اكادەميالىق حالىق اسپاپتار وركەسترىنىڭ تالاي جىل باس ديريجەرى ءارى كوركەمدىك جەتەكشىسى بولعان اتاقتى ديريجەر شامعون قاجىعالييەۆتى اقتىق ساپارعا شىعارىپ سالدى.

اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا وتكەن قارالى جيىنعا شامعون اعانىڭ ونەردە بىرگە ىستەسكەن ارىپتەستەرى، شاكىرتتەرى، ق ر مادەنيەت جانە سپورت مينيسترلىگىنىڭ، الماتى قالاسى اكىمدىگىنىڭ وكىلدەرى، ونەر قايراتكەرلەرى جانە قالا تۇرعىندارى كەلىپ، مارقۇمنىڭ وتباسىنا كوڭىل ايتىپ، قايعىلارىنا ورتاقتاستى.

قارالى جيىندا ءسوز سويلەگەندەر شامعون اعانىڭ ءومىرى مەن ونەردەگى اتقارعان ەڭبەكتەرى جايلى وي ءبولىستى.

العاشقى بولىپ ءسوز العان ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ ق ر پرەزيدەنتى نۇرسۇلتان نازاربايەۆتىڭ كوڭىل ايتۋ جەدەل حاتىن وقىدى.

 «قازاق ونەرىنىڭ اسا كورنەكتى وكىلى، حالقىمىزدىڭ ماقتان تۇتار اياۋلى پەرزەنتى، ك س ر و حالىق ءارتىسى، مەملەكەتتىك سىيلىقتىڭ يەگەرى شامعون قاجىعاليەۆتىڭ دۇنيە سالۋىنا بايلانىستى مارقۇمنىڭ وتباسىنا كوڭىل ايتامىن. شامعون قاجىعاليەۆ قازاقتان شىققان العاشقى كاسىبي ديريجەرلەردىڭ ءبىرى. ول قازاق ونەرىنىڭ دامۋىنا زور ۇلەس قوستى. قازاقتىڭ قۇرمانعازى اتىنداعى حالىق اسپاپتارى وركەستىرەن الەمگە تانىتىپ، تالاي شاكىرتتەر تاربيەلەدى. ۇلتتىق جانە كلاسسيكالىق شىعارمالاردى ناسيحاتاتۋدا اسا زور ەڭبەك ءسىڭىردى. ارتىندا مول مۇرا قالدىرعان شامعون قاجىعاليەۆتىڭ جارقىن بەينەسى حالقىمىزدىڭ جادىندا ءاردايىم ساقتالادى. مارقۇمنىڭ توپىراعى تورقا بولىپ، جانى جانناتتا بولسىن. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ»، - دەدى ق. ۋاليەۆ.

ءوز كەزەگىندە ك س ر و حالىق ءارتىسى بيبىگۇل تولەگەنوۆا كەزىندە شامعون اعانىڭ قولداۋىمەن تالاي كلاسسيكالىق شىعارمالاردى مەڭگەرگەنىن ايتتى.

 «مەن 1956 - جىلى قۇرمانعازى وركەسترىنە كەلگەننەن كەيىن العاشقى كەزدە تەك قازاقتىڭ ۇلتتىق شىعارمالارىن ورىنداپ ءجۇردىم. سوندا باس ديريجەر شامعون ماعان: «كلاسسيكالىق شىعارمالاردى ايتۋىمىز كەرەك. بىزدە وركەستردە ورىندالاتىن كلاسسيكالىق تۋىندىلار بار. سەن سولاردى شىرقايسىڭ با؟ » دەپ قولقا سالدى. سودان كوپ شىعارمالاردى مەڭگەردىك. ارينە، جۇمىس بولعان سوڭ ءارقالاي جاعدايلار بولادى. كەلىسپەي قالعان كەزدەرىمىز دە بولدى. ءبىراق شامعون سونداي بيازى، سونداي زيالى، كەڭ پەيىل ادام بولاتىن. قۇرمانعازى وركەسترىمەن ەلىمىزدىڭ تالاي شالعاي جەرلەرىن جانە تالاي شەت ەلدەردى ارالاپ شىقتىق. ول وتە ۇقىپتى، ناعىز كاسىبي ديريجەر بولدى. شاكە، ەگەر ونەر جولىندا، بىرگە ىستەسىپ جۇرگەن كەزدەرىمىزدە قاتاڭ سوزدەر ايتىپ، جانىڭدى اۋىرتقان كەزدەرىم بولسا، رۋحىڭنىڭ الدىندا كەشىرىم سۇرايمىن. جاتقان جەرىڭ جايلى، جانىڭ جانناتتا بولسىن»، - دەدى ب. تولەگەنوۆا.

 بۇگىن الماتى قالاسىنىڭ اكىمى احمەتجان ەسىموۆ ازالى جيىنننىڭ رەسمي ءبولىمى باستالماي جاتىپ، ەرتە كەلىپ مارقۇمنىڭ وتباسىنا كوڭىل ايتىپ كەتكەن بولاتىن. سوندىقتان قالا اكىمدىگى اتىنان، الماتى قالاسى اكىمىنىڭ ورىنباسارى زاۋرەش امانجولوۆا ءسوز الدى.

 «بۇگىن قازاق حالقى اۋىر قايعىنى باستان كەشىپ وتىر. قازاق ونەرىنىڭ مايتالمانى، بۇكىل ءومىرىن ونەرگە، ۇلكەن ىسكە ارناعان ارناعان اتاقتى ديريجەر شامعون قاجىعالييەۆتى اقتىق ساپارعا شىعارعالى وتىرمىز. تۋۋ پارىز، ءولىم حاق. شامعون اعا ارتىنا ۇلكەن وشپەس ءىز قالدىردى. قازاقتىڭ ماڭدايىنا بىتكەن دارا تۇلعا. ونەر سالاسىنداعى اتقارعان ەڭبەگى ۇشان تەڭىز. ونىڭ سىڭىرگەن ەڭبەكتەرى، اسىل بەينەسى قاشاندا جادىمىزدا بولادى. مارقۇمنىڭ وتباسىنا قايعىرىپ كوڭىل ايتامىز»، - دەدى ز. امانجولوۆا.