باتىس قازاقستاندىق جاۋىنگەر كۋرلياندياعا دەيىن مايدان جولدارىمەن ءجۇرىپ قايتتى
كارىم شوتانوۆ 1916 - جىلى 4 - شىلدەدە قازىرگى بوكەي ورداسى اۋدانى مۇراتساي اۋىلدىق وكرۋگىنە قاراستى اجەن ەلدى مەكەنىندە دۇنيەگە كەلدى. جاسىنان ات قۇمار بولىپ وسكەن ول 1932 - جىلى №67 جىلقى زاۋىتىنىڭ ەسەپشىسى (ۋچەتچيك) رەتىندە ەڭبەك جولىن باستادى. ءۇش جىلدان سوڭ سچەتوۆودتىققا اۋىسقان كارىم 1939 - جىلى №88 تۇيە زاۋىتىندا حاتشى بولدى. ءبىراق كوپ ۇزاماي كەڭەس اسكەرى قاتارىنا الىنعان جاس جىگىت بۇل «ساپارىنىڭ» تۋرا جەتى جىلعا سوزىلارىن بىلگەن جوق.
اۋەلى سولتۇستىك مايدانىنىڭ قۇرامىندا بولعان جاۋىنگەر تالاي ۇرىستارعا قاتىستى. اسىرەسە، لەنينگراد ماڭىندا جان الىپ، جان بەرىسكەن شايقاستاردىڭ بولعانى ءمالىم. 1942 - جىلدىڭ سوڭىندا «لەنينگرادتى قورعاعانى ءۇشىن» مەدالىمەن ماراپاتتالۋى ونىڭ سول كەزدەگى باس قالانىڭ ءبىرىن جانكەشتىلىكپەن قورعاۋشىلار قاتارىندا بولعاندىعىن بىلدىرەدى.
1943 - جىلدان لەنينگراد مايدانىنداعى 201-گاتچينسك اتقىشتار ديۆيزياسىندا زەڭبىرەك كومانديرلىگىنە جوعارىلاعان كارىم شوتانوۆ كوپ ۇزاماي ەرلىگى ءۇشىن ءۇشىنشى دارەجەلى داڭق وردەنىن وڭىرىنە تاقتى. اتالمىش ديۆيزيا كومانديرىنىڭ 1944 -جىلعى 20 - ناۋرىزداعى بۇيرىعىمەن باتارەيا كومانديرى ك. شوتانوۆتىڭ « قىزىل جۇلدىز» وردەنىمەن ماراپاتتالعانى دا حاتتالىپ قالعان. ال 1945 -جىلعى 29 -مامىردا كۋرليانديانى ازات ەتۋدەگى ۇيىمداستىرۋشىلىق قابىلەتى ءۇشىن ستارشينا كارىم شوتانوۆ «جاۋىنگەرلىك ەڭبەگى ءۇشىن» مەدالىن يەلەندى. سونىمەن قاتار گاتچينو، لۋگا، باتىس نارۆا بەكىنىسى، ۆالگا (ەستونيا) ، ريگا، كۋرليانديا ماڭىنداعى ۇرىستاردا ەرەكشە كوزگە تۇسكەنى ءۇشىن باس قولباسشى ي. ستاليننىڭ التى بىردەي العىسىن الۋى ونىڭ مايدان جولدارىنىڭ قاي جەرلەرمەن وتكەندىگىنەن ماعلۇمات بەرەدى. جاۋمەن الاپات شايقاستاردى باستان كەشە وتىرىپ، قانشاما جەردى جاياۋ ءجۇرىپ ءوتتى دەسەڭىزشى.
الىس اجەننەن كۋرلياندياعا دەيىن بارىپ قايتقان مايدانگەر 1946 -جىلى ەلگە جەڭىسپەن ورالعاننان كەيىن قايتادان №88 تۇيە زاۋىتىنا ورنالاستى. 1948 - جىلى ريازان قالاسىنداعى مال دارىگەرلەردىڭ ءبىر جىلدىق كۋرسىن ءبىتىرىپ قايتقان كارىم وسى ماماندىعى بويىنشا جۇمىسقا كىرىستى. جەرىنىڭ اسكەري پوليگونعا بەرىلۋىنە بايلانىستى 1952 - جىلى وردا اۋدانى تاراتىلماعاندا، ول اجەندە مال دارىگەرى بولىپ ەڭبەك ەتە بەرەر مە ەدى، كىم بىلگەن. سول ناۋبەتتىڭ كەسىرىنەن تۇيە زاۋىتى دا كەلمەسكە كەتتى. مال تۇگىلى، ەل تەنتىرەپ كەتكەن شاقتا ونىڭ دا كورشىلەس جانىبەك اۋدانى جاقسىباي اۋىلىنا اۋىسىپ، وسىندا مال دارىگەرى رەتىندە ەڭبەك ەتۋىنە تۋرا كەلدى. سوعىس سالعان جاراقاتتىڭ اسەرىنەن بولار، 1961 -جىلى نەبارى 45 جاسىندا كوز جۇمدى. زايىبى قاميدا ەكەۋى بولات، امانگەلدى، رايسا، مارات، مۇرات، مەرۋەرت، رايحان ەسىمدى جەتى ۇل- قىز ءسۇيىپ ۇلگەرگەنىمەن، ولاردىڭ قىزىعىن تۇگەل كورە المادى. «ورنىندا بار وڭالار» دەگەن، ومىردەن ەرتە كەتكەن بەلگىلى ءانشى- تەرمەشى مۇرات كاريمۋلليننەن باسقالارىنىڭ ءبارى دە قازىر ارامىزدا، ۇرپاقتارىن ءوربىتىپ وتىر.
اۆتور: ەلجان ەرالى
