يمانعالي تاسماعامبەتوۆ قارۋلى كۇشتەردەگى ۇزدىك روتا كومانديرلەرىن ماراپاتتادى - فوتو
بۇل تۋرالى قورعانىس مينيسترلىگىنىڭ باسپا ءسوز قىزمەتى حابارلادى.
ۇستىمىزدەگى جىلدىڭ باسىندا ق ر قارۋلى كۇشتەرىندە ۇزدىك روتا كومانديرى اتاعىنا جالپى اسكەري بايقاۋ ءوتتى. كاسىبي شەبەرلىكتەرى مەن كومانديرلىك قاسيەتتەرىن ق ر ق ك اسكەر تەكتەرى مەن وڭىرلىك قولباسشىلىقتاردىڭ وفيتسەرلەرى ساراپقا سالدى. ۇزدىك روتا كومانديرى اتاعىنا ۇمىتكەرلەر مەملەكەتتىك- قۇقىقتىق، اتىس، دەنە، تاكتيكالىق جانە ارنايى دايارلىقتار، اسكەري توپوگرافيا، قارۋ- جاراق پەن اسكەري تەحنيكا بويىنشا بىلىمدەرىنەن سىناقتاردى ءساتتى تاپسىرۋى ءتيىس بولاتىن.
«ون بەس وفيتسەر ءتۇرلى ماماندىقتار بويىنشا «ۇزدىك روتا كومانديرى» اتاعىنا لايىق دەپ تانىلدى. بارشاڭىز ءوز كاسىبي جانە جاۋىنگەرلىك شەبەرلىكتەرىڭىزدى، وتان الدىنداعى لايىقتى قىزمەتتەرىڭىزدى كورسەتە بىلدىڭىزدەر. دەگەنمەن سىزدەر ەڭ باستىسى ۇزدىك كوماندير عانا ەمەس، ءوز جاۋىنگەرلەرىڭىز ءۇشىن ناعىز تالىمگەر سونداي- اق، بۇكىل جەكە قۇرامعا ۇلگىسىزدەر. سىزدەرگە قاراپ روتا ساپ تۇزەيدى. ءار جاۋىنگەر سىزدەردى اسكەري بورىش پەن ايبىننىڭ يدەالى دەپ بىلەدى. جاۋىنگەرلەر ءۇشىن سىزدەر كوماندير عانا ەمەس ارميا ساپىنداعى تالاپ ەتە بىلەتىن، قاجەت كەزىندە قولداۋ كورسەتەتىن ەڭ جاقىن ادامسىزدار»، - دەدى سالتاناتتى راسىمدە ق ر قورعانىس ءمينيسترى.
وسى ورايدا قورعانىس ۆەدومستۆوسىنىڭ باسشىسى ءۇش وفيتسەرگە - اعا لەيتەنانتتار مەيىرحات بيساتوۆ، ەرنار قۋانىشقالي ۇلى جانە ەۆگەني پايعا مەرزىمىنەن بۇرىن «كاپيتان» اتاعىن بەرىپ، بارلىق ون بەس اسكەري قىزمەتشىگە گراموتالار مەن ەستەلىك سىيلىقتار (كوماندير ساعاتتارىن) تابىس ەتتى.
