مايك تايسون وزىمەن سۋرەتكە تۇسپەك بولعان جانكۇيەرىن ۇرىپ جىبەردى-كەسكىن

 استانا. قازاقپارات - كاسىپقوي بوكستان ابسوليۋتتى الەم چەمپيونى مايك تايسون وزىمەن سۋرەتكە تۇسپەك بولعان جانكۇيەرىن شىنتاقپەن ۇرىپ جىبەردى.

بۇل تۋرالى lenta.ru حابارلادى.

 وقيعا امەريكالىق فلويد مەيۆەزەر مەن فيليپپيندىك مەنني پاكياونىڭ جەكپە- جەكتەرى الدىنداعى سالماق ولشەۋ راسىمىندە بولعان. تايسون بۇل شاراعا ارنايى كەلىپ، كورەرمەندەر اراسىنان ورىن الادى. سول ساتتە جانكۇيەرلەردىڭ ءبىرى داڭقتى بوكسشىنىڭ تۋ سىرتىنان كەلىپ، ونى قۇشاقتاپ، سەلفي جاساماق بولادى. الايدا، تايسون الاڭسىز وتىرعان جەرىنەن ءوزىن جۇلقىلاعان جاندى شىنتاعىمەن ۇرىپ جىبەرىپ، سۋرەتكە تۇسۋگە مۇمكىندىك بەرمەدى.

 مايك تايسون بوكس الەمىندەگى ەڭ اتاقتى سپورتشىلاردىڭ ءبىرى. ابسوليۋتتى الەم چەمپيونى اتانعان ونىڭ اتى گيننەس رەكوردتار كىتابىنا جازىلعان. تايسون 2005 - جىلى بىلعارى قولعابىن شەگەگە ءىلىپ، رينگپەن قوشتاستى. سودان بەرى ول مەمۋار جازىپ، 55 تەن استام فيلم، تەلەسەريال جانە ءارتۇرلى شوۋ باعدارلامالارعا ءتۇسىپ ۇلگەرگەن. سونداي- اق، وسى ارالىقتا پروموۋتەرلىك قىزمەت تە اتقاردى.

اقپارات كوزى: http://egemen.kz