قازاقستاندا تالانتتى بالالاردى تارتۋ ءۇشىن وڭىرلىك فۋتبول اكادەميالارىن قۇرۋ جوسپاردا بار - ە. قوجاعاپانوۆ

استانا. قازاقپارات - قازاقستان فۋتبول فەدەراتسياسىنىڭ پرەزيدەنتى ەرلان قوجاعاپانوۆ تاراز قالاسىندا جامبىل وبلىسىنىڭ فۋتبول سۇيەر قاۋىمىمەن كەزدەسىپ، وندا وسى سپورت ءتۇرىنىڭ كەلەشەك ماسەلەلەرى تالقىلاندى.

شاقىرىلعاندار قاتارىندا كەزىندەگى ەلىمىزدىڭ اتاقتى فۋتبولشىلارى سەيىلدا بايشاقوۆ، نۇركەن مازبايەۆ، فارحاد ميرساليمبايەۆ، ۆياچەسلاۆ حۆان، حريستوفور كاسكەنيدي جانە دە جاتتىقتىرۋشالىر، فۋتبول جانكۇيەرلەرى بولدى.

بۇل تۋرالى فەدەراتسيانىڭ باسپا ءسوز قىزمەتىنەن حابارلادى.  

كەزدەسۋ بارىسىندا فەدەراتسيا باسشىسى قازاقستاندىق فۋتبولدى دامىتۋدىڭ 2022 - جىلعا دەيىنگى باعدارلاما جوباسىن تانىستىردى. اتالعان باعدارلامانىڭ باسىم باعىتتارىنىڭ ءبىرى - قازاقستانداعى جاسوسپىرىمدەر مەن بالالار فۋتبولىن دامىتۋ.

«قازاقستان دوپ تەبەتىن تالانتتى بالالاردان كەندە ەمەس. ءبىزدىڭ مىندەتىمىز - وسى تالانتتاردى تاسادا قالدىرماي تابۋ، ولارعا وقۋلارىنا جاعداي جاساۋ. ولار ەرتەڭگى كۇنى ەۋروپالىق ارەنالاردا وزدەرىن كورسەتىپ، ۇلتتىق قۇرامانى دا العا جەتەلەۋلەرى كەرەك»، - دەدى ەرلان قوجاعاپانوۆ.

بۇدان بولەك، فۋتبول فەدەراتسياسىنىڭ پرەزيدەنتى ارداگەرلەرمەن، جاتتىقتىرۋشىلارمەن قازاقستاندىق فۋتبولدىڭ باسقا دا ماسەلەلەرىن تالقىعا سالدى. كوپشىلىكتىڭ پىكىرى بويىنشا بۇگىنگى تاڭدا ەلىمىزدە سپورت ينفراقۇرىلىمىن دامىتۋ مەن بالالار جاتتىقتىرۋشىلارىنىڭ يميدجىن ارتتىرۋ - وزەكتى ماسەلە.

«قازاقستاننىڭ كليماتتىق ەرەكشەلىكتەرىن ەسكەرە وتىرىپ، بىزگە جابىق الاڭداردى كوبىرەك سالۋ كەرەك، وندا فۋتبولشىلار جىل بويى جاتتىعۋلارى ءتيىس. بۇدان بولەك، بالالار جاتتىقتىرۋشىلارىنىڭ سانىن ەسەلەپ ارتتىرىپ، ولاردى جاڭا تەحنولوگيالارمەن وقىتۋ دا ماڭىزدى. ەگەر قازىرگى كۇنى «س» ساناتىنداعى جاتتىقتىرۋشىلار سانى 195 ادام بولسا، الداعى 7 جىلدا ءبىز ولاردى 10 ەسەگە ارتتىرامىز. بۇل اسا ماڭىزدى مىندەت، ويتكەنى فۋتبولشىلار نەگىزگى بازالىق ءبىلىمدى جاس كەزىندە الادى»، - دەدى ەرلان قوجاعاپانوۆ.

اۆتور:   قانات مامەتقازى ۇلى