ك س ر و حالىق ءارتىسى، قازاقتىڭ العاشقى كاسىبي ديريجەرى شامعون قاجىعاليەۆ دۇنيەدەن ءوتتى

استانا. قازاقپارات - قازاق ونەرىنىڭ ۇلكەن دارىندى تۇلعاسى، ك س ر و حالىق ءارتيسى، ق ر مەملەكەتتىك سىيلىعىنىڭ لاۋرەاتى، پروفەسسور، «پاراسات» وردەنىنىڭ يەگەرى، ديريجەر شامعون قاجىعاليەۆ قايتىس بولدى.

بۇل تۋرالى تانىمال ءانشى، تاتتىمبەت اتىنداعى ونەر كوللەدجىنىڭ ءبولىم مەڭگەرۋشىسى، قالي بايجانوۆ اتىنداعى كونسەرتتىك بىرلەستىك ءسوليسى سەرجان مۇسايىن ءوزىنىڭ فەيسبۋك الەۋمەتتىك جەلىسىندەگى پاراقشاسىندا جازادى.

شامعون ساعاددين ۇلى قاجىعاليەۆ 1927-جىلى قازىرگى باتىس قازاقستان وبلىسى جاڭاقالا اۋدانىندا تۋىلعان، ديريجەر، قازاقستاننىڭ (1967) جانە ك س ر و (1985) حالىق ءارتسى. الماتى كونسەرۆاتورياسىن (قازىرگى قازاق ۇلتتىق كونسەرۆاتورياسى، 1950)، سانكت-پەتەربور كونسەرۆاتورياسىنىڭ وپەرا-سيمفونيا ديريجەرى فاكۋلتىن بىتىرگەن (1964). 1950-1960, 1964-1968-جىلدارى جانە 1971-جىلدان قازاق حالىق اسپاپتارى وركەسترىنىڭ، 1968-1971-جىلدارى قازاق سيمفونيالىق وركەسترىنىڭ كوركەمدىك جاعىن باسقارۋشى جانە باس ديريجەرى قىزمەتىن اتقاردى. 1970-جىلدان الماتى كونسەرۆاتورياسىندا پەداگوگيكالىق قىزمەتپەن شۇعىلداندى.

ش. قاجىعاليەۆتىڭ باسقارۋىمەن قازاق سيمفونيالىق وركەسترى م. گلينكا، ل. بەتحوۆەن، ۆ. موتسارت، گ. بەرليوز، ۆ. موتسارت، پ. ي. چايكوۆسكي، س. ۆ. راحمانينوۆ، س. س. پروكوفيەۆ، ا. ي. حاچاتۋريان، د. د. شوستاكوۆيچ، ا. جۇبانوۆ، م. تولەبايەۆ، ع. جۇبانوۆا، س. مۇحامەدجانوۆ ت. ب. كومپوزيتورلاردىڭ شىعارمالارىن ورىنداپ، الەمنىڭ كوپتەگەن ەلدەرىندە ونەر كورسەتتى.

قازاق حالىق اسپاپتارى وركەسترى شامعون قاجىعالييەۆتىڭ جەتەكشىلىگىمەن قىتايدا، رۋمىنيادا، ۆەنگريادا، فينليانديادا، پولشادا، يتاليادا، پورتۋگاليادا، دانيادا، ت. ب. ەلدەردە ونەر ساپارلارىندا بولدى.

ش. قاجىعاليەۆ مەملەكەتتىك سىيلىق يەگەرى (1982)، جاستار مەن ستۋدەنتتەردىڭ بۋحارەستە وتكەن دۇنيەجۇزىلىك فەستيۆالىنىڭ جەڭىمپازى (1953). «ەڭبەك قىزىل تۋ»، «قۇرمەت بەلگىسى»، «حالىقتار دوستىعى» وردەندەرىمەن ماراپاتتالعان.