مادينا شاھارىنىڭ ءامىرى قازاقتىڭ شاپانىنا قاتتى قىزىقتى

استانا. قازاقپارات-  وتكەن اپتادا ساۋد ارابياسىنىڭ مادينا شاھارىنىڭ ءامىرى، تاق مۇراگەرى فەيسال سالمان ءال- ساۋدتىڭ قولداۋىمەن حالىقارالىق كورمە بولىپ ءوتتى.

الەمنىڭ 60 تان استام مەملەكەتى قاتىسقان ايتۋلى شاراعا ساۋد ارابياسىندا ءبىلىم الىپ جاتقان قازاقستاندىق ستۋدەنتتەر دە قاتىسىپ، دارحان حالقىمىزدىڭ دانالىعى مەن دارالىعىن پاش ەتتى.

 مادينا قالاسىنداعى وقيتىن ستۋدەنتتەردىڭ باسشىسى اكبارجان يسمايلتەگى بۇل كورمەگە ەرەكشە دايىندالعاندارىن ايتادى. مادينا قالاسىندا وقيتىن باسقا ستۋدەنتتەردىڭ باسىن قوسىپ، كورمەگە قازاق ءۇيىن تىكتىرىپ، ۇلتتىق ناقىشتاعى دۇنيەلەر اشەكەيلەگەن. ارنايى وسى كورمە ءۇشىن ولار قازاقستاننان قازى- قارتا، قىمىز سەكىلدى ۇلتتىق تاعامدارىمىز بەن شاپان، بورىك سىندى ۇلتتىق كيىم ۇلگىلەرىن الدىرتقان ەكەن.

 وسىلايشا، اتالمىش كورمەگە زور دايىندىقپەن قاتىسقان ستۋدەنتتەرىمىز قازاق ۇيىنە قوسا، حان شاتىرىن دا تىككەن كورىنەدى. ەكى ءۇيدى دە ۇلتتىق تاعامدارىمىز بەن تاتتىلەرگە تولتىرىپ قويعان قازاق جاستارى ولاردىڭ بارلىعىن ءوزىمىز دايىندادىق دەيدى. تىگىلگەن قازاق ءۇي ىشىندە جالپى ەلىمىزدىڭ كورىكتى جەرلەرى مەن جەتىستىكتەرى، ەلباسى مەن استانامىز جايلى، ءدىنباسى مەن ءدىني باسقارما جايلى كورنەكىلىك قۇرالدارىن دا ارنايى دايارلاعان. سونداي- اق، قازاق جاستارى بىرنەشە تىلدە قوناقتارعا جالپى ەلىمىز جايلى، جاقىندا بولاتىن ەكسپو-2017، قازاق حاندىعىنىڭ 550 جىلدىعى، قازاقستان حالىقتار اسسامبلەياسى تۋرالى مەن الەمدىك دىندەر سيەزىن وتكىزەتىنىن ماقتانىشپەن تانىستىرىپ وتىرعان.

قازاق جاستارى تىككەن ۇيگە مادينا قالاسىنىڭ ءامىرى فەيسال بين سالماننىڭ ءوزى باس سۇعىپ، قازاق ءۇيىنىڭ قۇرىلىسىنا تاڭدانىسىن ءبىلدىردى. قازى- قارتادان اۋىز ءتيىپ، قىمىز ىشكەن قالا ءامىرى قازاقى شاپانعا دا قاتتى قىزىعۋشىلىق تانىتقان. تاق مۇراگەرىنىڭ يىعىنا قازاق جاستارى شاپان جاۋىپ، حالقىمىزدا سىيلى قوناققا ات مىنگىزىپ، شاپان جاباتىن قوناقجاي سالتى تۋرالى دا ايتىلدى.

 كورمە اياسىندا الىستان كوز تارتقان قازاق ۇيىنە مادينا قالاسىنداعى يسلام ۋنيۆەرسيتەتىنىڭ رەكتورى يبراحيم ال- ۋبايد جانە تايبا ۋنيۆەرسيتەتينين رەكتورى، دوكتور ادنون ال- مازرۋ، ساۋد ارابيا عۇلامالار كەڭەسىنىڭ مۇشەسى ابدۋلازيز ال- فاۋزان جانە باسقا دا مەملەكەتتەردىڭ ەلشىلەرى مەن كوپتەگەن عالىمدار باس سۇعىپ، قازاقستاندىق جاستاردىڭ دايىندىعىن جوعارى باعالاپ جاتتى.

ءوز كەزەگىندە قازاقستاندىق ستۋدەنتتەر ەلىمىزدىڭ ساۋد ارابياسىنداعى توتەنشە جانە وكىلەتتى ەلشىسى باقىت دانابەك ۇلى باتىرشايەۆتىڭ سىڭىرگەن ەڭبەگىن جوعارى باعالاپ ءوتتى. ەلشىلىكتىڭ قازاق جاستارىنا كورسەتىپ جاتقان قامقورلىقتارىنا ايتا كەلىپ، وسى كورمەگە قاتىسۋلارىنا مۇمكىندىك تۋعىزعانى ءۇشىن ءوز العىستارىن دا جەتكىزدى.

 ءتورت كۇنگە سوزىلعان (3 كۇن -  ەر ادامدارعا، 1 كۇن -  ايەل ادامدارعا) كورمە سايىسىندا 60 تان استام مەملەكەت اراسىندا قازاقستان جاستارى 4- ورىندى يەلەندى. ايتا كەتەيىك، 2014- جىلى ءدال وسى حالىقارالىق كورمەدە قازاقستان جاستارى 1- ورىن العان بولاتىن.

muslim.kz