الەمدە قازاقستانداعىداي ىنتىماعىمەن ماقتانا الاتىن ەلدەر كوپ ەمەس - يۋليا دەنيسەنكو

استانا. قازاقپارات - الەمدە قازاقستانداعىداي ىنتىماعىمەن ماقتانا الاتىن ەلدەر كوپ ەمەس، دەپ ەسەپتەيدى زاڭسىز ءدىني اعىمداردان زارداپ شەككەندەرگە كومەك كورسەتۋ ورتالىعىنىڭ جەتەكشىسى، دىندەردى زەرتتەۋ ورتالىقتارى قاۋىمداستىعىنىڭ ديرەكتورى، ق ح ا مۇشەسى يۋليا دەنيسەنكو.

 «1 - مامىر - بۇكىل كەڭەس وداعىنىڭ مەملەكەتتەرى تويلاعان مەرەكە بولاتىن. ءبىراق قازاقستاندىقتار ونى تاۋەلسىزدىك جىلدارىنان كەيىن كەڭىنەن تويلاي باستادى. سەبەبى و باستان اق كوپ ۇلتتىڭ وكىلى ءوز بولاشاقتارىن بىرگە كوتەردى، جاڭا ورتاق جەڭىستەرگە بىرلەسە قول جەتكىزدى. ۇلتتىڭ وسىنشالىقتى ءارالۋاندىعى جاس مەملەكەتتى قۇرتىپ تىنادى دەپ ايتقاندار كوپ بولدى. الايدا ەلباسىنىڭ ساۋاتتى ساياساتىنىڭ ارقاسىندا بۇل ءبىزدىڭ كۇشىمىزگە اينالدى»، - دەپ اتاپ ءوتتى ول «قازاقپارات» تىلشىسىنە بەرگەن سۇحباتىندا.

يۋليا دەنيسەنكو سونداي- اق، قازاقستان حالقى اسسامبلەياسىنىڭ ماڭىزىن دا اتاپ ءوتتى. ونىڭ ايتۋىنشا، بۇگىندە 130 دان استام ۇلت وكىلدەرى ءبىر شاڭىراق استىندا تاتۋ- ءتاتتى ءومىر سۇرۋدە. قازاقستاندا ولاردىڭ بارلىعىنىڭ مادەنيەتى مەن ونەرى قولداۋ تابۋدا. ولاردىڭ ءارقايسىسى بۇل ەلدە ءوزىنىڭ ۇلتتىق ەرەكشەلىگىن ساقتاي وتىرىپ، تولىققاندى قازاقستاندىق دەپ اتالۋعا قۇقىلى.

«پرەزيدەنت «وسىنداي حالقىما قىزمەت ەتۋ - مەن ءۇشىن ۇلكەن ابىروي» دەگەن بولاتىن، وسى سوزدەرى قاتتى ەلجىرەتتى. بۇل ەلدە ءاربىر قازاقستاندىقتىڭ ەشبىر شەكتەۋسىز دامىپ، بالا- شاعاسىن ءوسىرىپ، ءبىلىم بەرىپ، باياندى بولاشاعىنا سەنە الاتىنى ءۇشىن شەكسىز باقىتتى سەزىنەسىڭ. ال قاراعاندىداعى سۋ تاسقىنى ورىن العان كەزدە قازاقستاندىقتاردىڭ جاپا شەككەن حالىققا گۋمانيتارلىق كومەكتى اياماي جولداپ جاتقانىنا ءتىپتى رياسىز قۋاندىم. وسىناۋ كەرەمەت مەرەكەمەن بارلىقتارىڭىزدى قۇتتىقتايمىن، قۇرمەتتى قازاقستاندىقتار! اشىق اسپان، تاۋسىلماس باقىت تىلەيمىن!»، - دەيدى يۋليا دەنيسەنكو.

 اۆتور: جاسۇلان جولدىبايەۆ