الماتى اسپازشىلارى جارتى توننا لاعمان دايىنداپ، گيننەستىڭ رەكوردتار كىتابىنا ەندى- فوتو
«دوستىق» لاعمانىن جاساۋعا 300 جۇمىرتقا، 250 كەلى ۇن، 12 كەلى ەت، كوكونىس جۇمسالدى.
تاعامدى ازىرلەۋگە 30 اسپازشى ات سالىستى. تاعام 12 قازاندا ءپىسىرىلدى.
«قۇرمەتتى دوستار. سىزدەردى قازاقستان حالقى اسسسامبلەياسى اتىنان تاماشا مەرەكەمەن قۇتتىقتاۋعا رۇقسات ەتىڭىزدەر. مەن مىندا تاڭەرتەڭنەن بەرى ءجۇرمىن. سىزدەردىڭ دوستىق كوڭىلدەرىڭىزگە، باقىتتى جۇزدەرىڭىزگە كۋا بولىپ وتىرمىن. بۇل قازاقستان حالقى اسسامبلەياسىنىڭ توزىمدىلىك پەن بىرلىك ينستيتۋتى ەكەندىگىن تاعى دا ايقىندايدى»، - دەدى ق ح ا ءتوراعاسىنىڭ ورىنباسارى ني ليۋبوۆ.
سالتاناتتى مەرەكەنى قازاق گەوگرافيالىق قوعامى ۇيىمداستىردى.
«قازاقستاننىڭ ابىرويىن كوتەرۋ ءۇشىن، حالىقتاردىڭ ءداستۇرىن، تاعامدارىن دۇنيەگە تانىتۋ ءۇشىن، دۇنيەدە بولماعان رەكورد ورناتتىق. لاعمان تاعامى قازاقتاردىڭ عانا ەمەس، تۇركى حالىقتارىنىڭ تاعامى بولىپ كەتكەن. ۇيعىر ەتنومادەني ورتالىعىنىڭ باسشىلىعى ۇلكەن شارا وتكىزىپ جاتىر. جارتى توننا لاعمانمەن ءبىر ەلدىڭ باسىن قوسىپ جاتىرمىز. وسى ارقىلى ءبىر ەلدىڭ تاعدىرى ءبىر ەكەندىگىن، داستارحانىمىزداعى نانىمىز دا ءبىر دەگەندى جەتكىزگىمىز كەلەدى»، - دەدى «قازاقستان ۇيعىرلارىنىڭ رەسپۋبليكالىق ەتنومادەني ورتالىعى» قوعامدىق بىرلەستىگىنىڭ ءتوراعاسى شايماردان نۇرىموۆ.
گيننەس رەكوردتار كىتابىنىڭ تورەشىسى بەندجامين بەكحاۋز جاڭا رەكوردتى تىركەپ، رەكورد ورناتىلعانى جونىندە سەرتيفيكات تابىس ەتتى.
كەلۋشىلەردىڭ بارلىعى استان ءدام تاتتى.
