بىرلىك كۇنى مەرەكەسى ەلىمىز ءۇشىن دە، ەلوردامىز ءۇشىن دە ايرىقشا مانگە يە - ءا. جاقسىبەكوۆ
«قۇرمەتتى استانالىقتار جانە قالا مەيماندارى!
سىزدەردى 1 -مامىر - قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن!
بيىلعى مەرەكە - ۇلتتار دوستىعىنىڭ الەمدە بالاماسى جوق ۇيىمى - قازاقستان حالقى اسسامبلەياسىنىڭ 20 -جىلدىق مەرەيلى بەلەسىمەن تۇسپا- تۇس كەلىپ وتىر. سوندىقتان دا بۇل مەيرامنىڭ ماڭىزى ەلىمىز ءۇشىن دە، ەلوردامىز ءۇشىن دە ايرىقشا مانگە يە.
كۇنى كەشە قازاقستان جۇرتشىلىعى ءوزىنىڭ تاريحي تاڭداۋىن جاساپ، ەلباسىمىز - نۇرسۇلتان نازاربايەۆتى قازاقستان رەسپۋبليكاسىنىڭ پرەزيدەنتى جوعارعى لاۋازىمىنا قايتا سايلادى. سان الۋان ۇلتتان قۇرالعان حالقىمىزدىڭ بىرلىگى مەن ۇيىمشىلدىعىنا كۋا بولعان الەم ەلدەرى ءۇشىن «ەتنوسارالىق بىرلىكتىڭ قازاقستاندىق مودەلى» بىرەگەي ۇلگىگە اينالىپ وتىر.
وسىناۋ دوستىق پەن تۇراقتىلىقتىڭ ولشەمىنە، تاتۋلىق پەن بەرەكەنىڭ باعا جەتپەس داستۇرىنە اينالعان مەرەيلى مەيرامدا بارشاڭىزدىڭ دەندەرىڭىزگە ساۋلىق، وتباسىلارىڭىزعا اماندىق، باق پەن بەرەكە تىلەيمىن»، - دەپ جازىلعان قۇتتىقتاۋدا.
