ءانشى باتىرحان شۇكەنوۆتى الماتىدا حالقى اقتىق ساپارعا شىعارىپ سالدى - فوتو
جامبىل اتىنداعى قازاق ۇلتتىق فيلارمونياسىندا ينە شانشار ورىن بولعان جوق. انشىمەن قوشتاسۋعا الماتىلىقتاردىڭ جاسى دا، كارىسى دە كەلدى.
قارالى جيىن بارىسىندا ءسوز العان قالا باسشىسى احمەتجان ەسىموۆ مەملەكەت باسشىسى نۇرسۇلتان نازاربايەۆتىڭ كوڭىل ايتۋ جەدەلحاتىن وقىدى.
«قۇرمەتتى قارالى جيىنعا جينالعان قاۋىم. بۇگىن حالقىمىزدىڭ تالانتتى ۇلدارىنىڭ ءبىرى، ەسترادا ونەرىنىڭ جارىق جۇلدىزى باتىرحان قامال ۇلى شۇكەنوۆتى اقتىق ساپارعا شىعارىپ سالۋعا جينالىپ تۇرمىز. ەلباسى مارقۇمنىڭ وتباسى مەن تۋىستارىنا بەلگىلى مۋزىكانتتىڭ كەنەتتەن قايتىس بولۋىنا بايلانىستى قايعىسىنا ورتاقتاسىپ كوڭىل ايتتى.
«باتىرحان شۇكەنوۆ جان-جاقتى دارىندىلىعىمەن، جوعارى ورىنداۋشىلىق شەبەرلىگىمەن، ادامگەرشىلىك قاسيەتتەرىمەن ميلليونداعان تىڭدارمانداردىڭ سۇيىكتىسىنە اينالعان جان ەدى. وسىنداي جاننىڭ ءومىرىنىڭ بەيمەزگىل ءۇزىلۋى بارشامىزدى ۇلكەن وكىنىش سەزىمىنە بولەيدى. ونىڭ ورىنداۋىنداعى شىعارمالار حالقىمىزبەن بىرگە جاساي بەرەدى دەپ سەنەمىن. مارقۇمنىڭ توپىراعى تورقا، جانى جانناتتا بولسىن»، - دەدى قالا اكىمى ا. ەسىموۆ ق ر پرەزيدەنتى نۇرسۇلتان نازاربايەۆتىڭ جەدەلحاتىن وقي وتىرا.
ءوز كەزەگىندە قالا باسشىسى ءانشىنىڭ تۋعان كۇنى 18 -مامىر قارساڭىندا رەسپۋبليكا سارايىندا ونى ەسكە الۋ كەشىن وتكىزۋدى ۇسىندى.
«قادىرلى قاۋىم، بۇگىنگى قازا - بارىمىزگە ورتاق قازا. حالقىمىزدىڭ اسىل ۇلى باتىرحان ورتامىزدان كەتىپ بارا جاتىر. ول ونەر مەن بىرگە ءوز حالقىن قاتتى جاقسى كورەتىن. سول ماحابباتتىڭ كۋاسى ىسپەتتەس سىزدەر دە قازىر وعان ءوز ىقىلاستارىڭىزدى ءبىلدىرىپ جاتىرسىزدار»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.
«ءوزى انگە قوسقان وتان اناسى ونى ەشقاشان ۇمىتپايدى»، - دەدى قىزىلوردا وبلىسى اكىمىنىڭ ورىنباسارى راۋان كەنجەحان ۇلى.
قوشتاسۋ راسىمىنەن سوڭ باتىرحان شۇكەنوۆتىڭ ورىنداۋىنداعى بىرنەشە ءان قويىلىپ، حالقى ونىمەن بىرگە شىرقادى.
جيىن بارىسىندا كوزىنە جاس الماعان ادام بولمادى. مارقۇمنىڭ دەنەسى كەڭساي زيراتىندا جەرلەندى.
