قازاقستانعا رەسەيدەن كەلەتىندەر لەگى ارتا باستادى

استانا. قازاقپارات - تاپ قازىرگى تاڭدا ەلىمىزدىڭ شيپاجايلارى رەسەي ازاماتتارى تاراپىنان جوعارى سۇرانىسقا يە بولىپ وتىر.

سالا ماماندارى بۇل جايتتى رۋبلدىڭ قۇنسىزدانۋىمەن بايلانىستىرادى. الىس شەتەلگە شىعۋعا مۇمكىندىگى جوق كورشىلەرىمىزدىڭ باسىم بولىگى جانعا جايلى بۋراباي، ەمگە داۋا سارى اعاش پەن ارۋ الماتىنىڭ اسەم تابيعاتىن تاماشالاۋعا نيەت بىلدىرۋدە.

جەرلەستەرىمىز دە مۇمكىندىكتى ءمۇلت جىبەرمەي، مامىر ايىنداعى مەرەكەلەردە وتاندىق شيپاجايلاردا دەمالماق. كۇندەلىكتى كۇيبەڭ تىرلىكتىڭ جۇيكەگە جۇك، ساناعا سالماق سالاتىنى بار. سوندىقتان جۇمىستىڭ قامىمەن جۇرگەن ەل ازاماتتارى ءار كۇنىن جوسپارلاپ، الداعى مەرەكەلەردى اسىعا كۇتىپ ءجۇر.

تۋريستىك اگەنتتىك وكىلدەرى مەيرام كۇندەرىندە وتاندىق شيپاجايلاردا دەمالۋعا نيەت بىلدىرگەن ازاماتتار قاتارى كوبەيگەنىن ايتادى.

ەكاتەرينا كولەسنيكوۆا، تۋريستىك اگەنتتىك ديرەكتورى:

- مامىر ايىنداعى مەرەكەلەردە بۋراباي ايماعى جوعارى سۇرانىسقا يە. اسىرەسە رەسەي ازاماتتارى كوپ كەلەدى. ءرۋبلدىڭ قۇنسىزدانۋىنا بايلانىستى رەسەيلىكتەردىڭ الىس شەتەلگە شىعۋعا مۇمكىندىگى جوق. سونداي- اق تۋريستەردىڭ باسىم بولىگى سارى اعاشقا بارادى. بۇل وڭىردە دەنساۋلىقتى نىعايتۋ ءۇشىن بارلىق جاعداي جاسالعان.

سالا ماماندارى رەسەيدەن كەلۋشىلەر قاتارىن ارتتىرۋ ءۇشىن بۋراباي مەن استانا ايماعىنا 5 كۇندىك ساپارلار لەگىن اشىپ وتىر. مامىر ايى بويى جۇرگىزىلەتىن شارانىڭ ماقساتى -  ەلىمىزدەگى دەمالىس ماۋسىمىن ۇزارتۋ. بار-جوعى 12 مىڭ تەڭگە تولەگەن تۋريستەر تابيعات اياسىنداعى قوناقۇيدە تىركەلىپ، ەمىن-ەركىن دەمالادى. سونداي-اق باس شاھارىمىزدى تاماشالاي الادى. وسىلايشا ءار اپتا سايىن 160 تان استام ادام سولتۇستىك ايماققا كەلەدى. قازىر شارتاراپقا عالامتور ارقىلى اقپاراتتار تاراتىلۋدا.

مارجان ترايسپايەۆا، تۋريستىك اگەنتتىك قىزمەتكەرى:

- ينتەرنەت ارقىلى برون جاساۋدىڭ تيىمدىلىگى -  بەلگىسىز تۋرفيرماعا نەمەسە شيپاجايعا قوڭىراۋ شالىپ وتىرمايسىز. بارلىق اقپارتتى ينتەرنەتتەن الۋىڭىزعا بولادى. كەيىن ءبىزدىڭ مەنەدجەرلەر حابارلاسىپ بارلىعىن تۇسىندىرەدى.

دەگەنمەن جاز مەزگىلىندە جەرلەستەرىمىزدىڭ شەتەلدىك شيپاجايلارعا اسىعاتىنى جاسىرىن ەمەس. «وعان باستى سەبەپ -  ەل ىشىندەگى دەمالىستىڭ قىمباتتىعى، قىزمەت كورسەتۋ ساپاسىنىڭ تومەندىگى» دەيدى ماماندار. تۋريزم سالاسىنداعى تۇيتكىلدى جايتتار ءجيى تالقىعا تۇسسە دە، ماسەلە شەشىمىن تاپپاي كەلەدى.

ەكاتەرينا كولەسنيكوۆا، تۋريستىك اگەنتتىك ديرەكتورى:

- بىرىنشىدەن، ءاربىر ايماق بەلگىلى ءبىر باعىتتا قىزمەت كورسەتۋى ءتيىس. مىسالى، ەمدىك شيپاجايلار، بەلسەندى دەمالىس ايماقتارى، جاعاجايلىق شيپاجاي بولىپ بولەك قاراستىرىلعانى ءجون. وسىلايشا قىزمەت ساپاسى ارتادى، ادامدارعا پايداسى كوبەيەدى. ەكىنشىدەن، چارتەرلىك تاسىمالدى جانداندىرۋ كەرەك. تۋريستەردىڭ باستى تالاپتارىنىڭ ءبىرى -  دەمالىس وشاعىنا تەز ءارى ىڭعايلى جەتۋ. بۇگىندە دۇنيەجۇزى بويىنشا تۋريزم سالاسىنان ەل بيۋدجەتىنە تۇسەتىن قارجى مۇنايدان كەيىنگى ەكىنشى ورىندا تۇر. سوندىقتان ونى دامىتۋ -  ۋاقىت تالابى.

www.24.kz