تۇركى الەمىنىڭ جاستارى اتاجۇرت - تۇركىستاندا باس قوستى - فوتو
تۇركى الەمىنىڭ جاستارى اتاجۇرت - تۇركىستاندا باس قوستى - فوتو
استانا. قازاقپارات - كەشە ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتىندە (ح ق ت ۋ) تۇركى الەمى جاستارى مەن ستۋدەنتتەرىنىڭ حالىقارالىق 1 - فەستيۆالى ءوز جۇمىسىن باستادى. فەستيۆال بۇگىن دە جالعاسادى.
بۇل تۋرالى وقۋ ورنىنىڭ باسپا ءسوز قىزمەتى حابارلادى.
تۇڭعىش ءوتىپ وتىرعان فەستيۆالگە تۇركى دۇنيەسىنىڭ 24 مەملەكەتىنەن 28 ۇلت پەن ۇلىس جاستارى قاتىسۋدا. سونداي- اق، تۇركىتىلدەس مەملەكەتتەر ىنتىماقتاستىق كەڭەسى (تۇركى كەڭەسى)، تۇركىتىلدەس ەلدەر پارلامەنتتىك اسسامبلەياسى (تۇرك پ ا)، تۇركى حالىقتارىنىڭ مادەني قورى، حالىقارالىق تۇرىك اكادەمياسى، حالىقارالىق تۇركسوي ۇيىمى، دۇنيەجۇزىلىك توعىزقۇمالاق قاۋىمداستىعى وكىلدەرى دە ايتۋلى شارا قوناعى بولدى.
فەستيۆالدىڭ اشىلۋ سالتاناتىندا احمەت ياساۋي ۋنيۆەرسيتەتىنىڭ تۇركيا تاراپىنان تاعايىندالعان ءبىرىنشى ۆيسە- پرەزيدەنتى، دوكتور، پروفەسسور مەحمەت قۇتالمىش كىرىسپە سوزبەن اشتى.
« تۇركى الەمىنىڭ بىرلىگى الاش كوسەمدەرىنىڭ، تۇرىك حالقىنىڭ كوسەمى مۇستافا اتاتۇرىكتىڭ، ەلباسى نۇرسۇلتان ءابىش ۇلى اسقاق ارمانى. قازاقستان مەن تۇركيا ۇكىمەتتەرىنىڭ احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىن اشقانداعى باستى ماقساتتارىنىڭ ءبىرى وسى. حالىقارالىق فەستيۆالدى ۇيىمداستىرىپ وتىرعان دا تۇركىستان قالاسىنداعى حالىقارالىق ۋنيۆەرسيتەتتىڭ بەدەلى جىلدان- جىلعا بيىكتەپ كەلەدى»، - دەدى پروفەسسور.
مۇنان سوڭ ءسوز العان تۇركيانىڭ ىستامبۇل قالاسىنداعى تۇركىتىلدەس مەملەكەتتەر ىنتىماقتاستىق كەڭەسى باس حاتشىسىنىڭ ورىنباسارى ابزال ساپاربەك ۇلى، ەلباسىنىڭ تۇركى الەمى ىنتىماقتاستىعىن نىعايتۋداعى قوماقتى ۇلەسىن، تۇركى كەڭەسىنىڭ قىزمەتىن، ماقساتىن ايتا كەلىپ: «تۇركى كەڭەسى شەڭبەرىندە تۇركى تىلدەس مەملەكەتتەردىڭ ۋنيۆەرسيتەتتەر وداعى قۇرىلعان بولاتىن. اتالمىش وداققا قازاقستاننىڭ 3 جوعارى وقۋ ورنى كىرەدى. ولار: ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتى، ەۋرازيا ۇلتتىق ۋنيۆەرسيتەتى، ءال- فارابي اتىنداعى قازاق ۇلتتىق ۋنيۆەرسيتەتى. جاڭا بەينەروليكتەن بايقاعانىم، حقتۋ - جاڭا يدەيالاردىڭ توعىسقان جەرى.
ىنتىماعى، بىرلىگى جاراسقان تۇركى الەمى جاستارى ءبىر شاڭىراق استىندا احمەت ياساۋي بابامىزدىڭ ماڭگىلىك مەكەنى كيەلى تۇركىستاندا باس قوسىپ وتىر. جاستار اراسىندا جاڭا ىنتىماقتاستىق سەرپىن باستالادى دەگەن سەنىمىم مول. تۇركى الەمى جاستارى دوستارىن كوبەيتىپ، قۇندىلىقتارعا يە بولىپ، سىيلاستىقتارىن ارتتىراتىن بۇل فەستيۆالدىڭ ماڭىزى وتە ۇلكەن. ۇيىمداستىرۋشىلارعا تۇركى كەڭەسىنىڭ اتىنان العىسىمدى بىلدىرەمىن. فەستيۆال جۇمىسىنا تابىس تىلەيمىن!»، - دەپ ىزگى تىلەگىن ءبىلدىردى.
سونداي- اق، تۇركىستان قالاسى اكىمىنىڭ ورىنباسارى داۋرەن تاڭىربەرگەنوۆ، ءازىربايجاننىڭ باكۋ قالاسىنداعى تۇركىتىلدەس ەلدەر پارلامەنتتىك اسسامبلەياسىنىڭ قوعاممەن قۇقىقتىق بايلانىس جاساۋ سالاسىنىڭ جەتەكشىسى انار راحيموۆ، تۇركىستانداعى احمەت ياساۋي ۋنيۆەرسيتەتىنىڭ «حالىقارالىق قاتىناستار» فاكۋلتەتىنە رەسەيدىڭ ساحا (ياكۋتيا) ەلىنەن كەلگەن 3-كۋرس ستۋدەنتى ناستيا بەلوتسكايا ءسوز سويلەدى.
فەستيۆال ۇلت كوشباسشىسى، نۇرسۇلتان ءابىش ۇلى نازاربايەۆتىڭ «تۇركى الەمىنىڭ بىرلىگى» يدەياسى اياسىندا ۇيىمداستىرىلىپ وتىر. الماتى قالاسىندا تۇركىتىلدەس مەملەكەتتەر ىنتىماقتاستىق كەڭەسىنىڭ (تۇركى كەڭەسى) I سامميتىندە ن. نازاربايەۆ: «جاستار اراسىندا سپورت ويىندارى مەن تەاتر فەستيۆالدارىن ءجيى ۇيىمداستىرعان ءجون دەپ سانايمىن» دەگەن بولاتىن. ال، تۇركىتىلدەس مەملەكەتتەر ىنتىماقتاستىق كەڭەسىنىڭ 2 - سامميتىندە (قىرعىزستان) ، ەلباسى ن. نازاربايەۆ ەڭ باستىسى، بۇگىنگى تاڭدا تۇركى مەملەكەتتەرى جاستارى اراسىندا «تۇركى الەمى» دەيتىن ماڭىزدى تۇسىنىكتى قالىپتاستىرۋ كەرەك، دەپ ناقتى تاپسىرما بەرگەن ەدى.
سونداي- اق، «الماتى دەكلاراتسياسىندا» (2011 ج. 21 قازان) «تۇركى ۋنيۆەرسيتەتارالىق وداعىنىڭ قۇرىلۋىن قۇپتادى، سول سەكىلدى جوبالار عىلىمي مەكەمەلەر، وقۋ ورىندارى جانە عالىمدار اراسىنداعى قاتىناستاردى ودان ءارى دامىتۋعا، سونداي- اق، ۋنيۆەرسيتەت ستۋدەنتتەرى تاجىريبەسىن بايىتۋعا جاردەمدەسەتىنىن اتاپ ءوتتى» دەلىنگەن بولاتىن.
شارا ماقساتى تۇركى دۇنيەسى جاستارىنىڭ قارىم- قاتىناستارىن نىعايتۋ جانە تۇركى تىلدەس حالىقتارىنىڭ ورتاق تاريحى مەن تۇركى دۇنيەسى قۇندىلىقتارىن قالىپتاستىرۋ. قازاقستان حالقى اسسامبلەياسىنا 20 -جىل تولۋىنا وراي ءتۇبىرى ءبىر تۇركى حالىقتارى جاستارىنىڭ باسىن بىرىكتىرىپ، تۇركىتىلدەس ەلدەردىڭ ۇلتتىق اسپاپتى ورىنداۋ شەبەرلىگىن، ۇمىت بولىپ بارا جاتقان سالت- ءداستۇرىن، مادەنيەتىن، ۇلتتىق كيىمدەرىن ناسيحاتتاۋ بولدى.
