ك. ءماسىموۆ پرەزيدەنتكە قويىلعان مىندەتتەرى ورىنداۋ ءۇشىن بارلىق كۇش-جىگەرىن جۇمساۋعا ءسوز بەردى

استانا. قازاقپارات - مەملەكەت باسشىسى نۇرسۇلتان نازاربايەۆ پارلامەنت ءماجىلىسىنىڭ جالپى وتىرىسىنا قاتىستى.

بۇل تۋرالى اقوردانىڭ باسپا ءسوز قىزمەتىنەن حابارلادى.

جيىن باستالماس بۇرىن پارلامەنت ءماجىلىسى بيۋروسىنىڭ وتىرىسى ءوتتى، وندا پارلامەنت ءماجىلىسى كوميتەتتەرىنىڭ ءتوراعالارى مەن پارلامەنت ءماجىلىسى فراكتسيالارىنىڭ جەتەكشىلەرى ءسوز سويلەپ، مەملەكەت باسشىسىنىڭ شەشىمىنە قولداۋ ءبىلدىردى.

قازاقستان رەسپۋبليكاسى كونستيتۋتسياسىنىڭ 44-بابىنا سايكەس، مەملەكەت باسشىسى پارلامەنت ءماجىلىسىنىڭ قاراۋىنا قازاقستان رەسپۋبليكاسىنىڭ پرەمەر-ءمينيسترى لاۋازىمىنا ك. ءماسىموۆتىڭ كانديداتۋراسىن ۇسىندى.

«قازىر ءبىز جاڭا باعدارلامانى جۇزەگە اسىرۋعا كىرىسىپ جاتىرمىز. ماعان مەرەكەلەردەن سوڭ دەرەۋ جۇمىسقا كىرىسەتىن كوميسسيانى بەكىتۋ قاجەت. ءىستىڭ ءمان-جايىن ۇعىنۋعا ۋاقىت شىعىنداماس ءۇشىن، مەنىڭ ويىمشا، بىزگە ۇكىمەت جۇمىسىنىڭ ساباقتاستىعىن ساقتاعان ءجون. كارىم ءماسىموۆتىڭ قولىنان كەلەدى، ونىڭ الەۋەتى، ءتيىستى ءبىلىمى بار، ءبىز وعان جۇرگىزىلىپ جاتقان جۇمىستى ءارى قاراي جالعاستىرۋدى سەنىپ تاپسىرا الامىز»، - دەدى نۇرسۇلتان نازاربايەۆ.

پارلامەنت ءماجىلىسىنىڭ دەپۋتاتتارى پرەمەر-مينيستر لاۋازىمىنا ك. ءماسىموۆتىڭ كانديداتۋراسىن ءبىراۋىزدان ماقۇلدادى.

ءوز سوزىندە ك. ءماسىموۆ كورسەتىلگەن سەنىم ءۇشىن ريزاشىلىق ءبىلدىرىپ، قويىلعان مىندەتتەرى ورىنداۋ ءۇشىن بارلىق كۇش-جىگەرى مەن ءبىلىم-بىلىگىن جۇمسايتىنىن ايتتى.