قىتايدا قازاق قىز-كەلىنشەكتەرى كوماندالىق ەسەپتە التىنشى ورىنعا تابان تىرەدى

استانا. قازاقپارات - قىتايدا شاحماتتان قىز-كەلىنشەكتەر اراسىنداعى الەم بىرىنشىلىگى مارەسىنە جەتتى.

بۇل بىرىنشىلىكتە قازاقستان قۇراماسىنا ەڭ كوپ ۇپايدى ءۇشىنشى جانە ءتورتشى تاقتادا ونەر كورسەتكەن گۇلىسحان ناقبايەۆا مەن گۇلميرا داۋلەتوۆا سالدى. ەكى شاحماتشىمىز دا «اسپان استى» ەلىندە بەس ۇپايدان جينادى.

قىز-كەلىنشەكتەر اراسىنداعى الەم بىرىنشىلىگىنە قازاقستان قۇراماسى ەكىنشى مارتە قاتىسىپ وتىر. بۇعان دەيىن ءبىزدىڭ بۇرىمدىلار 2013-جىلى استانادا وتكەن الەم چەمپيوناتىندا باقتارىن سىناپ، جەتىنشى ورىن العان بولاتىن.

ال چڭدۋ قالاسىندا وتكەن الەم چەمپيوناتىنىڭ قورىتىندىسى بويىنشا قىزدارىمىز ەكى رەت جەڭىسكە جەتىپ، ەكى رەت جەڭىلىپ جانە بەس رەت قارسىلاستارىمەن يتجىعىس ءتۇسىپ، جالپى كوماندالىق ەسەپتە التىنشى ورىن الدى. بۇل دا جامان كورسەتكىش ەمەس. بايقاپ وتىرساڭىزدار، قىزدارىمىزدىڭ دەڭگەيى وسكەنى انىق بايقالادى.

V رەت وتكەن الەم بىرىنشىلىگىندە شاحماتتان قازاقستان قۇراماسىنىڭ باس باپكەرى پاۆەل كوتسۋر قۇراما ويىنشىلارىنىڭ ورنىن (تاقتاسىن) وزگەرتتى. وسى ۋاقىتقا دەيىنگى ءىرى تۋرنيرلەردە ءبىرىنشى تاقتادا وتىراتىن گۇلىسحان ناقبايەۆا ءۇشىنشى تاقتاعا اۋىسىپ، ءبىرىنشى تاقتاعا جاس تالانتىمىز جانسايا ابدىمالىك وتىردى.

ادەتتە ءبىرىنشى تاقتادا قاي كوماندانىڭ بولسىن مىقتى گروسسمەيستەرلەرى وتىراتىنىن جاقسى بىلەمىز. الەمنىڭ كىل مىقتى شاحماتشىلارىنا قارسى وتكىزگەن كەزدەسۋدە ءبىز ءبىرىنشى تاقتادا ەل نامىسىن قورعاعان جانسايانىڭ ونەرىنە ءدان ريزا بولدىق. سەبەبى، ول ءار ويىندا ءوزىن جاقسى قىرىنان كورسەتە ءبىلدى.

ءتىپتى، قىتاي، رەسەي سىندى ەلدەردىڭ ءنومىرى ءبىرىنشى گروسسمەيستەرلەرىمەن تەڭ دارەجەدە ونەر كورسەتىپ، قورجىنىمىزعا ۇپاي سالىپ جاتتى. جالپى بىرىنشىلىكتىڭ قورىتىندىسى بويىنشا، جانسايا ابدىمالىك 1,5 ۇپاي جيناپ، ءبىرىنشى تاقتادا ونەر كورسەتكەن شاحماتشىلار اراسىندا توعىزىنشى ورىنعا جايعاسىپتى.

ءبىرىنشى تاقتادا ونەر كورسەتكەن سپورتشىلار اراسىندا گرۋزيالىق بەلا كوتەناشۆيلي توپ جاردى. ونىڭ ەنشىسىندە 7,5 ۇپاي بار. ەكىنشى ورىندى 5 ۇپاي جيناعان رەسەيلىك ۆالەنتينا گۋنينا السا، ۇزدىك ۇشتىكتى 5,5 ۇپاي (رەسەيلىك سپورتشىعا قاراعاندا ءبىر ويىن ارتىق وتكىزگەن) جيناعان ءۇندىستاندىق كونەرۋ حامپۋ تۇيىندەپ تۇر.

باسەكە بارىسىندا ەكىنشى تاقتادا ەل نامىسىن دينارا ءسادۋاقاسوۆا قورعادى. 18 جاستاعى سپورتشىمىزدىڭ دا كورسەتكىشى كوڭىلدەن شىعادى. ول 8 ويىن وتكىزىپ، قورجىنىمىزعا 4,5 ۇپاي سالدى. ەكىنشى تاقتادا ونەر كورسەتكەن سپورتشىلار اراسىندا ءبىرىنشى ورىندى 6,5 ۇپاي جيناعان ارمەنيالىق ارۋ ليليت مكرچيان السا، ەكىنشى ورىن 5,5 ۇپايى بار ءۇندىستاندىق حاريكا درونوۆالليعا بۇيىردى. ءۇشىنشى ورىندى ۋكراينالىق بويجەتكەن ماريا مۋزىچۋك يەلەندى. ونىڭ ەنشىسىندە دە 5,5 ۇپاي بار.

چڭدۋدا وتكەن بىرىنشىلىكتە قازاقستاننىڭ ءتورت دۇركىن چەمپيونى گۇلىسحان ناقبايەۆا قۇراما قورجىنىنا بەس ۇپاي سالىپ، ءۇشىنشى تاقتادا ويناعان شاحماتشىلار اراسىندا بەسىنشى ورىن الدى. بۇل تاقتادا ءبىرىنشى ورىن 6 ۇپاي جيناعان گرۋزيالىق مەري ارابيدزەگە بۇيىردى. ەكىنشى جانە ءۇشىنشى ورىندى گۇلىسحاننان ءبىر ويىن كەم ويناپ، 4,5 ۇپاي جيناعان رەسەيلىك ناتاليا پودوگونينا مەن قىتايلىق شەن يانگ الدى.

ءتورتىنشى تاقتادا ونەر كورسەتكەن گۇلميرا داۋلەتبايەۆا 5 ۇپاي جيناپ، بەسىنشى ورىنعا جايعاستى. بەسىنشى تاقتادا ونەر كورسەتكەن قىتايلىق لەي تينگدجە 6,5 ۇپايمەن ۇزدىك شىقسا، جەتى ويىن ويناپ 5 ۇپايدان جيناعان رەسەيلىك الەكساندرا گورياچكينا ەكىنشى، نينو باتسيشۆيلي ءۇشىنشى ورىندى يەلەندى.

پاۆەل كوتسۋر بەسىنشى، ياعني قوسالقى قۇرام ويىنشىسى رەتىندە قىتايعا مادينا داۋلەتبايەۆانى الىپ بارعان. تارازدىق سۇلۋىمىز دا بىرىنشىلىك بارىسىندا وزىنە بەرىلگەن مۇمكىندىكتەردى ءساتتى پايدالاندى. ءتورت ويىن وتكىزگەن شاحماتشىمىز 1,5 ۇپاي جيناپ، بەسىنشى تاقتادا ونەر كورسەتكەن سپورتشىلار اراسىندا التىنشى ورىنعا تابان تىرەدى.

مىنە، وسىلايشا ءبىزدىڭ قۇرامانىڭ بۇرىمدى شاحماتشىلارى حانزۋ ەلىندە وتكەن بىرىنشىلىكتە جالپى 17,5 (72,25) ۇپاي جيناپ، كوماندالىق ەسەپتە التىنشى ورىنعا جايعاستى.

ۋاليحان قوسانباي

«الاش ايناسى»