قازاقستان ۇكىمەتى وتستاۆكاعا كەتتى - مەملەكەت باسشىسىنىڭ جارلىعى

استانا. قازاقپارات - مەملەكەت باسشىسى قازاقستان رەسپۋبليكاسى ۇكىمەتىنىڭ وكىلەتتىلىگىن دوعارۋىنا بايلانىستى «قازاقستان رەسپۋبليكاسىنىڭ ۇكىمەتى تۋرالى» جارلىققا قول قويدى.

بۇل تۋرالى اقوردا تۆيتتەرىندە حابارلادى.

ق ر كونستيتۋتسياسىنىڭ 70-بابىنىڭ 1-تارماعىنا سايكەس ۇكىمەت قازاقستان رەسپۋبليكاسىنىڭ جاڭادان سايلانعان پرەزيدەنتى الدىندا ءوزىنىڭ وكىلەتتىكتەرىن دوعارادى.

كونستيتۋتسيا نورمالارىنا سايكەس پرەزيدەنت پارلامەنت ماجىلىسىندەگى ساياسي پارتيالار فراكسيالارىمەن كونسۋلتاتسيالاردان كەيىن ءماجىلىستىڭ قاراۋىنا پرەمەر-ءمينيستردىڭ كانديداتۋراسىن ۇسىنادى.

ءماجىلىس پرەمەر-ءمينيستردىڭ كانديداتۋراسىن ماقۇلداعان جاعدايدا پرەزيدەنت ونى قىزمەتىنە تاعايىندايدى. تاعايىندالعان پرەمەر-مينيستر ون كۇن مەرزىم ىشىندە پرەزيدەنتكە ۇكىمەت قۇرامى مەن قۇرىلىمى تۋرالى ۇسىنىستارىن ەنگىزۋى ءتيىس.

ەسكە سالا كەتەيىك، 2014-جىلعى 2- ساۋىردە ق ر پرەزيدەنتى ن. نازاربايەۆ ءوزىنىڭ جارلىعىمەن ۇكىمەتتىڭ بۇرىنعى باسشىسى سەرىك احمەتوۆتىڭ وتستاۆكاسىنا بايلانىستى كارىم ءماسىموۆتى ق ر پرەمەر-ءمينيسترى ەتىپ تاعايىنداعان بولاتىن.

2014-جىلعى 4- ساۋىردە مەملەكەت باسشىسى ءوزىنىڭ جارلىعىمەن كارىم ءماسىموۆ باسقارعان ۇكىمەتتىڭ جاڭا قۇرامىن تاعايىندادى.

2014-جىلعى 6- تامىزدا ق ر پرەزيدەنتى اقوردادا ۇكىمەتتىڭ كەڭەيتىلگەن وتىرىسىندا ق ر ۇكىمەتىنىڭ قايتا قۇرىلاتىنىن جاريالادى. مەملەكەتتىك باسقارۋ جۇيەسىنىڭ تيىمدىلىگىن جانە جيناقى ۇكىمەتتى ۇيىمداستىرۋ ءۇشىن بەس جاڭا مينيسترلىك قۇرىلدى. ءسويتىپ، ۇكىمەتتىڭ جاڭا قۇرىلىمى 12 مينيسترلىكتەن جانە 30 عا تارتا كوميتەتتەن قۇرالدى. ال ك. ءماسىموۆ ق ر پرەمەر-ءمينيسترى قىزمەتىن ساقتاپ قالدى.