ەلباسى قازاقستاننىڭ سىرتقى ساياساتى قاي باعىتتا داميتىندىعىن ايتىپ بەردى
بۇل تۋرالى بۇگىن ۇلىقتاۋ راسىمىندە ق ر پرەزيدەنتى نۇرسۇلتان نازاربايەۆ ءمالىم ەتتى.
«قۇرمەتتى قازاقستاندىقتار! ۇلت جوسپارىنىڭ ءساتتى ورىندالۋى - جاعىمدى حالىقارالىق كليماتتىڭ بولۋىن تالاپ ەتەدى. ءبىز ستراتەگيالىق ارىپتەستەرمەن - رەسەيمەن، قىتاي حالىق رەسپۋبليكاسىمەن، امەريكا قۇراما شتاتتارىمەن، ەۋروپالىق وداق ەلدەرىمەن، يسلام الەمىمەن ىقپالداستىقتى جالعاستىرا بەرەتىن بولامىز. حالىقارالىق ۇيىمداردا جۇمىستى قىزدىرا تۇسەمىز»، - دەدى پرەزيدەنت.
ونىڭ سوزىنە قاراعاندا، بولاشاقتا قازاقستان ايماقتىق قاۋىپسىزدىكتى ساقتاۋدا ۇلكەن رولگە يە بولاتىن بولادى.
«ورتالىق ازيانىڭ كوشباسشىسى رەتىندە قازاقستان ءبىزدىڭ ايماقتىڭ قاۋىپسىزدىك قالىبى مەن ەكونوميكالىق دامۋىن ساقتاۋعا بەلسەندى كۇش سالادى. ەۋرازيالىق ەكونوميكالىق وداق اياسىنداعى ارىپتەستەرمەن: رەسەيمەن، بەلارۋسپەن، قىرعىزستانمەن جانە ارمەنيامەن بايلانىستار ەرەكشە ماڭىزعا يە بولادى. قازاقستان ديپلوماتياسى يسلام الەمىندە جانە پوست كەڭەستىك كەڭىستىكتە وتكىر ايماقتىق قاقتىعىستاردى بەيبىت جولمەن شەشۋ جولىنداعى قىزمەتىن قارقىنداتا تۇسەدى»، - دەپ ءتۇيدى ويىن ەلباسى.
سونداي-اق، «ХХІ عاسىر - بىرلىك پەن دوستىقتىڭ قۋاتىمەن وزاتىن عاسىر»، - دەدى نۇرسۇلتان نازاربايەۆ قازاقستان حالقىنا انت بەرىپ، قىزمەتىنە رەسمي كىرىسكەن سوڭ سويلەگەن سوزىندە.
« ХХІعاسىر - بىرلىك پەن دوستىقتىڭ قۋاتىمەن وزاتىن عاسىر. ءبىز بەيبىتشىلىك پەن كەلىسىمگە، تاتۋلىق پەن تۇراقتىلىققا ءتاۋ ەتىپ، تاۋبە دەيمىز. وسى قۇندىلىقتارىمىزدىڭ قادىرىنە جەتۋ ارقىلى ماڭگىلىك ەل بولامىز. سول جولدا تالماي ەڭبەك ەتەيىك، قادىرلى حالقىم!»، - دەدى ن. نازاربايەۆ.
«قازاقستاننىڭ جۇلدىزى جوعارى، جولى نۇرلى بولسىن. ەلدىكتىڭ تۋى بيىكتە جەلبىرەپ، ابىرويىمىز اسقاقتاي بەرسىن!»، - دەپ اياقتادى ءسوزىن مەملەكەت باسشىسى.
اۆتور: جاسۇلان جولدىبايەۆ
