قازاقستاندا الەمدەگى ەڭ ۇلكەن لاگمان ازىرلەنگەلى جاتىر
ەڭ ۇلكەن لاگمان Guinness World Records جۇيەسى بويىنشا 2015 -جىلدىڭ 1 -مامىرىندا الەم بويىنشا رەكوردتى جاڭارتۋ ماقساتىندا دايارلانادى. ۇيىمداستىرۋشىلار: قازاقستان حالقى اسسامبلەياسىنىڭ قولداۋىمەن «قازاق گەوگرافيالىق قوعامى»، مەملەكەتتىك ۇيعىر تەاترى، سونداي-اق قازاقستانداعى ۇيعىر دياسپوراسى جانە قاۋىمداستىقتىڭ تانىمال باس اسپازشىلارى. مەرەكەلىك شارا Guinness World Records ساراپشىلارىنىڭ باقىلاۋىندا بولادى.
«اكسيانىڭ جالپى ماقساتى - قازاق ەلىن دۇنيە جۇزىنە دارىپتەۋ سونداي-اق، ق ر ازاماتتارى مەن ەل قوناقتارىن مادەنيەتىمىز بەن سالت- داستۇرلەرىمىزدى ءجىتى تانىستىرۋ بولىپ تابىلادى. ال ەڭ باستىسى وسى ءىس- شارادا گيننەس كىتابىندا تاعى ءبىر رەكورد تىركەلەدى»، - دەلىنگەن ۇيىمداستىرۋشىلاردىڭ حابارلاماسىندا.
اكسيا بارىسىندا اشىق اسپان اياسىندا ۇيعىر ۇلتىنىڭ ءداستۇرلى رەتسەپتى بويىنشا، 30 اسپازشىنىڭ كومەگىمەن 500 كەلى لاگمان (1500 پورتسيا) دايىندالادى. مەرەكەلىك شارا الماتىداعى ناۋرىزباي باتىر مەن قاراساي باتىر كوشەلەرىنىڭ قيىلىسىندا (مەملەكەتتىك ۇيعىر تەترىنىڭ الاڭىندا) وتەدى.
ايتا كەتەيىك، اكسيا قازاق حالقىنىڭ بىرلىگى مەن قازاقستان حالقى اسسامبلەياسىنىڭ 20 جىلدىعىنا بايلانىستى ۇيىمداستىرىلعان.
