قىتاي حالىق رەسپۋبليكاسى ءتوراعاسىنىڭ قازاقستانعا ساپارى كۇتىلۋدە

استانا. قازاقپارات - قازاقستان مەن قىتاي بىرلەسىپ ونداعان جاڭا كاسىپورىن سالادى.

بۇل تۋرالى بۇگىن اقوردادا وتاندىق جانە شەت ەلدىك بۇقارالىق اقپارات قۇرالدارىنا سۇحبات بەرگەن ق ر پرەزيدەنتى نۇرسۇلتان نازاربايەۆ ايتتى.

 «ءبىز «باتىس ەۋروپا - باتىس قىتاي» اۆتوموبيل جولىن اياقتايمىز. بارلىعى - قىتاي، قازاقستان، رەسەي جانە ەۋروپا ارقىلى وتەتىن 8 مىڭ شاقىرىم. ءبىز ارقىلى 2700 شاقىرىم وتەدى. بۇل جولدى ءبىز  بيىل اياقتايمىز. ەلىمىز ارقىلى قىتايعا دەيىن زاماناۋي اۆتوبان سالىنادى. بۇل - ءبىرىنشىسى. ەكىنشىدەن، ءبىز وتكەن جىلى قازاقستاننىڭ ورتالىعىنا كاسپي تەڭىزىنە دەيىن تەمىر جول سالدىق. ەندى قىتايدان كاسپي تەڭىزىنە دەيىنگى تەمىر جول دا جالعاسىپ جاتىر. بىزدە اۋە بايلانىسى دا بار»، - دەدى ەلباسى.

ق ر پرەزيدەنتى ءوز سوزىندە ليانيۋنگان پورتىنان جۇك كونتەينەرلەرى قازاقستان اۋماعى ارقىلى ەۋروپاعا جونەلتىلىپ جاتقانىن اتاپ ءوتتى. بىرنەشە جىلدان كەيىن جىلىنا 20 ميلليون كونتەينەر قازاقستان ارقىلى تاسىمالداناتىن بولادى. ال بۇل ماسەلەنى قحا ءتوراعاسى بىرنەشە مارتە ايتقان بولاتىن.

 « ءبىز ونىڭ (ق ح ر ءتوراعاسىنىڭ) ساپارىن مامىر ايىنىڭ باسىندا كۇتۋدەمىز جانە قىتاي حالىق رەسپۋبليكاسىمەن قازاقستان ەكونوميكاسىن ءارتاراپتاندىرۋدىڭ جاڭا باعدارلاماسىن جەتىلدىرۋ ماسەلەلەرىن تالقىلايمىز. ءبىز ق ح ر- مەن بىرلەسىپ، ءتۇرلى نەگىزدە ونداعان مۇلدەم جاڭا كاسىپورىندار سالامىز»، - دەدى مەملەكەت باسشىسى.

 اۆتور: مارلان جيەمباي