ەكسپو اياسىندا قازاق مادەنيەتىن الەمگە پاش ەتۋىمىز قاجەت - مەملەكەت باسشىسى
بۇل تۋرالى بۇگىن اقوردادا وتاندىق جانە شەتەلدىك بۇقارالىق اقپارات قۇرالدارىنا سۇحبات بەرگەن ق ر پرەزيدەنتى نۇرسۇلتان نازاربايەۆ ايتتى.
« ءاربىر مەملەكەت تەك ەكونوميكاسىمەن عانا ءوسىپ- وركەندەي المايدى. مەملەكەت بولۋ ءۇشىن، وركەنيەتتى بولۋ ءۇشىن ەكونوميكاسى دا، تۇرمىسى دا، مادەنيەتى دە بىرگە ءجۇرۋى كەرەك. وزدەرىڭىز دە بىلەسىزدەر، وسى جىلدار ىشىندە ءبىز كوپتەگەن جۇمىستار اتقاردىق. مادەنيەت جىلىن جاريالادىق، قازاقستاندا قانشاما تەاترلاردى، كونسەرت زالدارىن ىسكە قوستىق. ەكىنشىدەن، تاريح جىلى دەپ قازاقستاننىڭ بارلىق تاريحىن قوپارىپ، دۇنيەدەگى بارلىق مالىمەتتەردى الىپ كەلدىك»، - دەدى ق ر پرەزيدەنتى.
مەملەكەت باسشىسى الەمنىڭ دامىعان 30 ەلىنىڭ قاتارىنا كىرۋ ءۇشىن مادەنيەتىمىز بەن ونەرىمىز دە سول وتىزدىقتىڭ ۇدەسىنەن شىعۋى تيىستىگىن اتاپ ءوتتى.
«2017 - جىلى ەكسپو كورمەسىن وتكىزەمىز. وندا ارينە، جاڭا ەكونوميكانى، جاڭا ەنەرگيانى كورسەتەمىز. بۇعان قوسا، ءبىز مادەنيەتىمىزدى دە پاش ەتۋگە ءتيىسپىز. قازاقتىڭ مادەنيەتىن، قانداي مادەني وشاقتارى بار ەكەندىگىن عانا كورسەتىپ قويماي، ونەر ادامدارى دا ءوز مۇمكىنشىلىكتەرىن كورسەتۋى قاجەت»، - دەدى ن. نازاربايەۆ.
بۇدان بولەك، ەلباسى بۇگىنگى كۇنگە، قازاققا لايىقتى، بۇرىننان كەلە جاتقان سالت- ءداستۇرىمىز بەن عۇرپىمىزدى ناسيحاتتايتىن تۋىندىلار بولۋى كەرەكتىگىن باسا ايتتى.
ەلباسى ەكسپو-2017 حالىقارالىق كورمەسىنىڭ «بولاشاق ەنەرگەتيكاسى» اتتى تاقىرىپپەن وتەتىنىنە نازار اۋدارىپ، وندا بۇل سالاداعى قازاقستاننىڭ عانا ەمەس، الەمنىڭ جەتىستىكتەرى پاش ەتىلەتىنىن اتاپ ءوتتى. ياعني، قازاقستاننىڭ استاناسىندا جاڭارتىلاتىن قۋات كوزدەرىنە قاتىستى بۇكىل الەمدىك تاجىريبە شوعىرلانادى.
«قازىرگى كۇنى 150 گەكتار اۋماقتا ەكسپو نىساندارىنىڭ قۇرىلىسى ءجۇرىپ جاتىر. ال ەكسپو- دان كەيىن بۇل نىسانداردىڭ بارلىعى ارى قارايعى پايدالانۋعا بەرىلەتىن بولادى. تۇرعىن جايلارعا دا بەرىلەدى. مەنىڭ ويىمشا، سول ورىنداردى ارى قاراي وڭىردەگى جاڭا قارجىلىق ورتالىق رەتىندە قولدانۋعا تىرىساتىن شىعارمىز. بۇل ءۇشىن بارلىق مەكەمەلەر مەن عيماراتتار وسىعان ىڭعايلاستىرىلعانى دۇرىس»، - دەدى ن. نازاربايەۆ.
بۇدان بولەك، ەلباسى قىسقى وليمپيادا ويىندارى ءۇشىن قازاقستان ۇمىتكەرلەر قاتارىندا كۇرەسىپ جاتقانىن دا ەسكە سالدى.
«بيىل شەشىم شىعارىلادى. بىزگە جاقسى ناتيجە بولادى دەپ ۇمىتتەنەمىز»، - دەدى پرەزيدەنت.
اۆتور: مارلان جيەمباي
