تەڭگە دەۆالۆاتسياسىنا ەشقانداي العىشارتتار جوق - ن. نازاربايەۆ
بۇگىن اقوردادا بۇقارالىق اقپارات قۇرالدارىنا ارناپ بريفينگ وتكىزگەن ق ر پرەزيدەنتى نۇرسۇلتان نازاربايەۆ جۋرناليستەر سۇراعىنا جاۋاپ بەرە وتىرىپ، وسىلاي ءمالىم ەتتى.
بريفينگ بارىسىندا بىلتىرعى جىلدىڭ سوڭىنان بەرى تەڭگەگە قاتىستى دەۆالۆاتسيا اڭگىمەسى ءورشىپ تۇرعانى ايتىلىپ، سايلاۋدان كەيىنگى تەڭگە تاعدىرى نە بولاتىنى سۇرالعان ەدى.
«سايلاۋدان كەيىن كۇرت وزگەرەتىندەي ەشتەڭە دە بولمايدى. قالاي جۇمىس ىستەدىك، سولاي ىستەي بەرەمىز. بۇعان دەيىن ەسكەرتكەنىمدەي، ەشقانداي دا العىشارتتار جوق. قازاقستاندىقتار مەنى بىلەدى، ەگەر سونداي ءبىر جاعداي تۋىنداسا مەن ونى ءوزىم ايتامىن. ودان قورعانۋدىڭ، ساقتانۋدىڭ دا كەرەكتىگىن مەن ەسكەرتەمىن»، - دەدى ن. نازاربايەۆ.
سونىمەن قاتار، مەملەكەت باسشىسى رەسەي رۋبلىنە قاتىستى تەڭگە باعامىندا دا ءبىرشاما قۇبىلۋلار بولعانىن دا ەسكە سالدى. ويتكەنى، بۇل ەلمەن قازاقستاننىڭ بايلانىسى تىعىز، ساۋداسى جوعارى بولاتىن.
«قازىر ءبارى تۇراقتى. ەشقانداي دا جوسپار بەلگىلەنگەن ەمەس، بۇعان ەشقانداي دا جاعداي تىرەلىپ تۇرعان جوق. دەگەنمەن، ەكىنشى ماسەلە - ءبىز تەڭگە باعامىن ەركىن جىبەرۋ ماسەلەسىمەن، تارگەتتەۋمەن دە جۇمىس ىستەپ جاتىرمىز. بۇل - كۇردەلى ماسەلە. ءبىز بۇنى حالىقارالىق ۆاليۋتا قوىمەن بىرلەسىپ شەشپەكپىز، ولار بىزگە تەحنيكالىق كەڭەستەر بەرەدى. ال ونى اتقارۋ بەس جىلدان بۇرىن بولمايدى. ول ءۇشىن تەڭگەنىڭ باعامى شەتەلدىك ۆاليۋتالارعا قاراعاندا ەركىن بولىپ، كونيۋكتۋرالارعا، كورشى ۆاليۋتالارعا قاراي وزگەرۋى ءتيىس. ءبىز وسى باعىتتا جۇمىس ىستەپ جاتىرمىز. ال وعان ارنايى جاعدايلار جاسالۋى كەرەك. قازاقستاننىڭ قارجى جۇيەسى دامۋى كەرەك»، - دەدى ن. نازاربايەۆ.
اۆتور: قانات مامەتقازى ۇلى
