سايلاۋدى ۇيىمداستىرۋدا قازاقستاننىڭ شاڭىنا دا ىلەسە المايمىز - ا ق ش بايقاۋشىلارى

استانا. قازاقپارات - قازاقستانداعى جانە ا ق ش-تاعى پرەزيدەنت سايلاۋىن سالىستىرۋعا دا كەلمەيدى.

مۇنداي پىكىردى بۇگىن وتكەن بريفينگ بارىسىندا ا ق ش- تان كەلگەن حالىقارالىق بايقاۋشىلار ءبىلدىردى.

«ءبىز حالىقارالىق بايقاۋشى رەتىندە قازاقستانداعى پرەزيدەنت سايلاۋىنا وسىمەن ءۇشىنشى رەت قاتىسىپ وتىرمىز. بيىلعى سايلاۋ وتە ساۋاتتى جانە جوعارى دارەجەدە ۇيىمداستىرىلعان. ءبىز 33 سايلاۋ ۋچاسكەسىن ارالادىق، وندا ۇزىننان- ۇزاق سوزىلىپ، كەزەك كۇتكەن ادامداردى كوردىك. ولاردىڭ سايلاۋعا دەگەن قىزىعۋشىلىعى وتە جوعارى ەكەن»، - دەيدى ا ق ش بايقاۋشىسى، ساراپشى ريچارد ۆايتس.

ال ونىڭ ارىپتەسى، Jamestown Foundation ساراپشىسى ۆلاد سوكوردىق ايتۋىنشا، ورتالىق سايلاۋ كوميسسياسى مەن جەرگىلىكتى سايلاۋ ۋچاسكەلەرىنىڭ سايلاۋدى ۇيىمداستىرۋداعى شەبەرلىگى جوعارى.

«ءبىزدىڭ بايقاۋىمىزشا و س ك ۇكىمەتتىك ەمەس ۇيىمداردى تاۋەلسىز باقىلاۋشى رەتىندە تارتىپ وتىر. بۇل دا قوعاممەن بايلانىستىڭ ءبىر ءتۇرى. سونىمەن قاتار، سايلاۋشىلاردىڭ تىكەلەي تىلدەسۋى ءۇشىن ارنايى سايت تا اشىلعان، بۇل ترانسارەنتتىلىك دەڭگەيىنىڭ بيىكتىگىن كورسەتەدى. سونداي-اق ءبىز تاڭ اتقاننان كەش باتقانعا دەيىن سايلاۋشىلاردىڭ توپ- توبىمەن كەلىپ، بەلسەندى تۇردە داۋىس بەرگەنىن ءوز كوزىمىزبەن كوردىك. جانە ءبىر ايتا كەتەرلىگى، سايلاۋشىلاردىڭ كوپ بولىگى كۇننىڭ ءبىرىنشى جارتىسىندا-اق داۋىس بەرىپ ۇلگەردى»، - دەيدى ول.

سونىمەن قاتار ا ق ش-تان كەلگەن تاعى ءبىر بايقاۋشى، «سالىق جانە ينۆەستيسيالار» حالىقارالىق ورتالىعىنىڭ پرەزيدەنتى دەنيەل ۆيتتىڭ ايتۋىنشا، قازاقستانداعى جانە ا ق ش- تاعى پرەزيدەنت سايلاۋىن سالىستىرۋعا دا كەلمەيدى.

«ءبىز سايلاۋدى ۇيىمداستىرۋدا قازاقستاننىڭ شاڭىنا دا ىلەسە المايمىز. ءتىپتى سالىستىرۋعا دا كەلمەيدى. مۇندا سايلاۋشىلار ءوز داۋىسىن بەرۋ ءۇشىن 2 ساعاتقا دەيىن كەزەكتە تۇرا الادى»، - دەيدى ول.

اۆتور: ءابۋ-اسقار مەكەش ۇلى