قازاقستان حالقى پرەزيدەنت سايلاۋىنىڭ ماڭىزدىلىعىن تاعى ءبىر مارتە دالەلدەپ وتىر - دجەيكوب زەنن

استانا. قازاقپارات - قازاقستان حالقىنىڭ بىرلىگى ەلدىڭ كەز كەلگەن جاھاندىق سىناققا توتەپ بەرە الاتىنىن كورسەتتى.

بۇگىن ەلىمىزدە ءوتىپ جاتقان كەزەكتەن تىس پرەزيدەنت سايلاۋىنا وراي وتكەن باسپا ءسوز ءماسليحاتىندا ا ق ش بايقاۋشىلار ميسسياسىنىڭ وكىلى، ساياساتتانۋشى دجەيكوب زەنن وسىلاي مالىمدەدى.

 بريفينگ بارىسىندا ا ق ش وكىلى استانادا ءبىرقاتار سايلاۋ ۋچاسكەلەرىن ارالاعانىن، سول ارقىلى داۋىس بەرۋشىلەردىڭ بەلسەندىلىگىن جوعارى باعالايتىنىن اتاپ ءوتتى.

«وسىنىڭ ءوزى قازاقستان حالقى ءۇشىن پرەزيدەنت سايلاۋىنىڭ ماڭىزدىلىعىن تاعى ءبىر مارتە دالەلدەپ وتىر. جالپى، كەز كەلگەن ەلدەگى سايلاۋ - سول ەلدىڭ دەموكراتياسىنىڭ قانشالىقتى دامىعانىن كورسەتەدى. وسى تۇرعىدان العاندا، 20 جىل بۇرىنعى قازاقستاندى بۇگىنگى قازاقستانمەن سالىستىرساق، بۇگىنگى ەلدىڭ جاعدايى، دەموكراتيالىق ينستيتۋتتار قۇرىلىمىنىڭ پروگرەسى تۋرالى ايتۋعا بولادى»، - دەدى دج. زەنن.

«الەمدىك ءتۇرلى قاتەرلەردىڭ ۇدەي تۇسكەن شاعىندا قازاقستان حالقىنىڭ بىرلىگى وسى ەلدىڭ كەز كەلگەن جاھاندىق سىناققا ءازىر ەكەنىن كورسەتەدى»، - دەدى ول.

اۆتور: قانات مامەتقازى ۇلى