قازاقستاندىقتار ەلدە جۇرگىزىلىپ جاتقان ساياساتتى قولداۋ ءۇشىن داۋىس بەرەتىنىنە سەنىمدىمىن - ن. نازاربايەۆ
نۇرسۇلتان نازاربايەۆ ەلوردانىڭ وقۋشىلار سارايىندا ورنالاسقان سايلاۋ ۋچاسكەسىنە كەلىپ، قازاقستان رەسپۋبليكاسى پرەزيدەنتىنىڭ سايلاۋىندا داۋىس بەردى.
مەملەكەت باسشىسى داۋىس بەرۋ قۇقىعىنا يە 9,5 ميلليونعا جۋىق قازاقستاندىق 9700 دەن اسا سايلاۋ ۋچاسكەسىندە سايلاۋعا قاتىسىپ جاتقانىن اتاپ ءوتتى.
- بۇگىن ازاماتتار كونستيتۋتسيالىق پارىزىن وتەۋ قۇقىعىنا يە. ەكىنشى جاعىنان، ولاردىڭ ءوز بولاشاعىن تاڭداۋعا، بيلىكتىڭ قىزمەتىنە باعا بەرۋگە مۇمكىندىكتەرى بار. قازاقستاندىقتار ەڭ الدىمەن ەلىمىزدىڭ تۇراقتى دامۋى ءۇشىن، حالىق تۇرمىسىنىڭ جاقسارۋى ءۇشىن، ءوزىنىڭ جانە بالالارىنىڭ بولاشاعى ءۇشىن، سونداي-اق مەنىڭ باسشىلىعىممەن ەلدە جۇرگىزىلىپ جاتقان ساياساتتى قولداۋ ءۇشىن داۋىس بەرەتىنىنە سەنىمدىمىن، - دەدى قازاقستان پرەزيدەنتى.
نۇرسۇلتان نازاربايەۆ سايلاۋدىڭ ترانسپارەنتتىلىگىنە نازار اۋداردى.
- سايلاۋ ۇدەرىسى مەن داۋىس بەرۋ بارىسىن ءىس جۇزىندە 40 قا جۋىق ەل مەن حالىقارالىق ۇيىمدار اتىنان وكىلدىك ەتكەن 850 دەي شەتەلدىك بايقاۋشىلار باقىلاۋدا. 170 كە تارتا شەتەلدىك ب ا ق تىركەلدى. ءبىز بۇكىل الەمگە زاڭدىلىقتىڭ ساقتالۋىن، اشىقتىقتى كورسەتىپ وتىرمىز. بايقاۋشىلار ءادىل باعاسىن بەرەدى دەپ سانايمىن جانە سايلاۋعا قاتىسىپ، قىزىعۋشىلىق تانىتقانى ءۇشىن بارشاعا الدىن الا راقمەت ايتقىم كەلەدى، - دەدى قازاقستان پرەزيدەنتى.
سونىمەن قاتار مەملەكەت باسشىسى وسى سايلاۋدا قازاقستاندىقتار وزىنە سەنىم بىلدىرەتىن بولسا، ءبىرىنشى كەزەكتەگى ارەكەتى بەس ينستيتۋتسيونالدىق رەفورمانى جۇزەگە اسىرۋ بويىنشا كوميسسيا قۇرۋ بولاتىنىن ايتتى.
- بۇل كوميسسيا بەس كىشى توپتان تۇراتىن بولادى، ولار زاڭناماعا وزگەرىس ەنگىزۋدى قاجەت ەتەتىن اۋقىمدى ءارى كۇردەلى جۇمىس كۇتىپ تۇرعاندىقتان، دەرەۋ ىسكە كىرىسەدى. جالپى، بۇل رەفورمالار ەل دامۋىنىڭ كەزەكتى كەزەڭى بولىپ سانالادى جانە ەكونوميكانى، ساياساتتى، قوعامدى قامتيدى، سونداي-اق ترانسپارەنتتىلىك پەن اشىقتىق ءۇشىن قاجەتتى جاعداي جاسايدى، - دەدى نۇرسۇلتان نازاربايەۆ.
قازاقستان پرەزيدەنتى بارلىق كانديداتتار ءۇشىن تەڭ جاعدايلار جاسالعانىن، سونىڭ اياسىندا ولار حالىققا ءوز باعدارلامالارىن تانىستىرا العانىن ايتتى.
- حالىقتىڭ ءداستۇرى مەن بولمىسىن ساقتاۋعا، سونداي-اق ەكولوگيالىق ماسەلەلەردى شەشۋگە بايلانىستى وزگە ەكى كانديداتتىڭ دا پىكىرلەرىن دۇرىس دەپ ەسەپتەيمىن. ولاردىڭ ۇسىنىستارىن كۇن تارتىبىنە قوسىپ، جۇزەگە اسىرۋ جولىندا بىرلەسىپ جۇمىس ىستەۋگە بولادى. جەكە ءوزىم قازاقستاننىڭ بولاشاعى ءۇشىن، اتقارىپ جاتقان جۇمىستارىمىزدى جالعاستىرىپ، ناتيجەلەرىن قازىرگى جانە كەلەسى ۇرپاق كورۋى ءۇشىن داۋىس بەردىم، - دەدى مەملەكەت باسشىسى.
