قورعانىس ءمينيسترى يمانعالي تاسماعامبەتوۆ ق ر پرەزيدەنتى سايلاۋىندا داۋىس بەردى - فوتو

استانا. قازاقپارات - بۇگىن ق ر قورعانىس ءمينيسترى يمانعالي تاسماعامبەتوۆ العاشقىلاردىڭ ءبىرى بولىپ سايلاۋ ۋچاسكەسىنە كەلىپ، قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا داۋىس بەردى، دەپ حابارلايدى ۆەدومستۆونىڭ باسپا ءسوز قىزمەتىنەن.

ق ر قورعانىس ءمينيسترى يمانعالي تاسماعامبەتوۆ ءوزىنىڭ ازاماتتىق بورىشىن نازاربايەۆ ۋنيۆەرسيتەتىندە ۇيىمداستىرىلعان سايلاۋ ۋچاسكەسىندە اتقاردى. بۇگىن تاڭ اتىسىمەن قازاقستان قارۋلى كۇشتەرىنىڭ اسكەري قىزمەتشىلەرى ەلىمىزدەگى  9740 سايلاۋ ۋچاسكەسىنە كەلىپ بەلسەندى داۋىس بەرگەنىن اتاپ وتكەن ءجون.

 قازاقستاننىڭ تۇكپىر- تۇكپىرىنەن قۇرلىق اسكەرلەرىنىڭ، اۋە قورعانىسى كۇشتەرى مەن اسكەري- تەڭىز كۇشتەرىنىڭ، ق ر ق ك اسكەر تەكتەرىنىڭ، «استانا» ، «شىعىس» ، «وڭتۇستىك» جانە «باتىس» وڭىرلىك قولباسشىلىقتارىنىڭ اسكەري بولىمدەرى مەن بولىمشەلەرى، اسكەري جوعارى وقۋ ورىندارى جەكە قۇرامنىڭ ق ر پرەزيدەنتى سايلاۋىنا ءجۇز پايىز قاتىسقانى تۋرالى باياندامالار كەلىپ ءتۇستى. سونىمەن بىرگە قازىرگى ۋاقىتتا شەتەلدە وقىپ جاتقان 400 دەن اسا اسكەري قىزمەتشى ق ر پرەزيدەنتىنىڭ سايلاۋىنا قاتىسىپ، بەلسەندىلىك تانىتتى.

ايتا كەتۋ كەرەك، ينچحوندا (وڭتۇستىك كورەيا) جيىنعا قاتىسىپ جاتقان ق ر ق م ارميا ورتالىق سپورت كلۋبى تاەكۆوندوشىلار كومانداسىنىڭ سپورتشىلارى ۋاقىتتىڭ ايىرماشىلىعىنا وراي 5 ساعات ەرتە داۋىس بەردى.

 سونداي- اق رەسەي، بەلارۋس، ۋكراينا، تۇركيا، وڭتۇستىك كورەيا، ا ق ش، قىتاي،  ۇلى بريتانيا، گەرمانيا جانە ءۇندىستان اسكەري جوعارى وقۋ ورىندارىندا ءبىلىم الىپ جاتقان كۋرسانتتار مەن وفيتسەرلەر ارنايى قۇرىلعان سايلاۋ ۋچاسكەلەرىنە كەلىپ، ءبىر ادامداي داۋىس بەردى. بۇل ءۇشىن الدىن الا بارۋ جانە قايتۋ باعىتتارىنا اۋە جانە تەمىر جول كولىكتەرىنە بيلەتتەر الىنعان بولاتىن.

وسىلايشا، قازاقستاندىق اسكەري قىزمەتشىلەرىنىڭ ءارقايسىسى ءوزىنىڭ قاي جەردە جۇرگەنىنە قاراماستان، قازاقستان رەسپۋبليكاسى پرەزيدەنتىنىڭ سايلاۋىنا قاتىستى.