الماتىدا عىلىمي كونفەرەنسيادا قازاق حاندىعىنىڭ تاريحى مەن تاعىلىمىنىڭ «ماڭگىلىك ەل» يدەياسىمەن ساباقتاستىعى تالقىلاندى
وعان ەلىمىزدىڭ الدىڭعى قاتارلى جوعارى وقۋ ورىندارى مەن سالالىق عىلىمي- زەرتتەۋ ينستيتۋتتارىنىڭ جانە يتاليا، تۇركيا، فيليانديا ەلدەرىنىڭ ايتۋلى عالىمدارى مەن باسقا دا مۇددەلى تۇلعالار قاتىسۋدا.
«بۇگىنگى كونفەرەنسيا قازاق حاندىعىنىڭ 550 جىلدىعىنا ارنالىپ وتىر. ول ءۇش سەكسياعا بولىنگەن. ءبىرىنشى سەكسيا قازاق حاندىعىنا دەيىنگى قازاق جەرىندەگى مەملەكەتتىك قۇرىلىمداردى تالقىلاۋعا ارنالادى. ەكىنشى سەكسيادا قازاق حاندىعىنىڭ قالىپتاسۋى، دامۋى جانە ونىڭ قۇلدىراۋ كەزەڭى قاراستىرىلسا، ءۇشىنشى سەكسيادا قازاق حاندىعىنىڭ قازىرگى وقىتىلۋ ماسەلەلەرى مەن وسى سالاداعى عىلىمي جاڭالىقتار تالقىلانادى.
ەلباسى نۇرسۇلتان نازاربايەۆ ءوزىنىڭ بيىلعى حالىققا جولداۋىندا قازاق حاندىعىنىڭ 550 جىلدىعىن لايىقتى اتاپ ءوتۋ مەن ناسيحاتتاۋ - جاڭا قازاقستاندىق پاتريوتيزمدى ۇرپاق جادىنا سىڭىرۋدە ايرىقشا ءرول اتقاراتىندىعىن ايتتى. سوندىقتان كوپ ۇلتتى قازاقستان جاعدايىندا، جاڭا قازاقستاندىق پاتريوتيزمدى قالىپتاستىرۋدا بۇگىنگى عىلىمي فورۋمنىڭ زور تاريحي ماڭىزى بار دەپ ەسەپتەيمىن»، - دەدى ءوز سوزىندە اتالمىش جوعارى وقۋ ورنىنىڭ قازاقستان تاريحى كافەدراسىنىڭ دوتسەنتى، تاريح عىلىمدارىنىڭ كانديداتى ەرداۋلەت بەرلىبايەۆ.
سونىمەن قاتار، كونفەرەنسيا بارىسىندا قازاق حاندىعىنىڭ پايدا بولۋى مەن دامۋ تاجىريبەسىن جان- جاقتى جۇيەلەپ، عىلىمي- تانىمدىق تۇرعىدا وقىرمان نازارىنا ۇسىنۋعا قادام جاسالادى. سوندىقتان دا وسى عىلىمي فورۋم شەڭبەرىندە قازاق مەملەكەتىنىڭ قالىپتاسۋىندا قازاق حاندىعىنىڭ الار ورنىنا بايلانىستى عىلىمي تۇرعىدا جان- جاقتى قامتىلىپ، سارالانىپ جازىلعان عىلىمي ماقالالار جيناعىن جاريالاۋ جوسپارلانعان.
ايتا كەتەلىك، عىلىمي فورۋمنىڭ سەكسيالارىندا مىناداي وزەكتى ماسەلەلەر تالقىلاندى:
1. قازاقستان اۋماعىنداعى تايپالاردىڭ، تۇركى ءداۋىرى مەن XIV - XV ع. فەودالدىق مەملەكەتتەردىڭ ساياسي قۇرىلىمى مەن مادەنيەتى؛
2. قازاق حاندىعىنىڭ قۇرىلۋى، قالىپتاسۋى، دامۋ تاريحى جانە «ماڭگىلىك ەل» يدەياسىمەن ساباقتاستىعى؛
3. قازاق حاندىعى تاريحىنىڭ بۇگىنگى زەرتتەلۋى مەن وقىتىلۋىنداعى جەتىستىكتەرمەن كەمشىلىكتەر؛
4. وقۋلىقتاردىڭ دەڭگەيى، رۋحاني ماتەريالدىق قۇندىلىقتاردىڭ ناسيحاتتالۋىنىڭ بارىسى؛
5. «مادەني مۇرا» باعدارلاماسىنىڭ ورىندالۋىمەن قول جەتكەن جەتىستىكتەر، ارحەولوگيالىق ادىستەمەلىك تەوريالىق جەتىستىكتەر.
كونفەرەنتسيا جۇمىسى جالعاسۋدا.
اۆتور: جاپپاربەرگەن ايبوتا
