09:24, 25 - ءساۋىر 2015 | GMT +5
ناۋقاس جىگىت اق قان اۋرۋىن ءوزىن وتقا قاقتاپ ەمدەۋدە
استانا. قازاقپارات- 25 جاستاعى قىتاي تۇرعىنى ءوزى شالدىققان اق قان اۋرۋىن ەمدەۋگە اقشاسى جەتپەي، ءوزىن وتقا قاقتاپ ەمدەپ دەرتىنەن ايىعۋدى كوزدەپتى.
بۇل تۋرالى epochtimes.ru حابارلايدى.
امالى تاۋسىلعان جيا بينحۋي «°42 تان جوعارى تەمپەراتۋرا اعزاداعى وبىر جاسۋشالارىن ولتىرەدى» دەگەندى ەستىپ، اۋىلداعى ءۇيدىڭ ارتىنان كاۋاپ پىسىرگىشكە ۇقساس ەتىپ، قۇرىلىس تۇرعىزىپتى. ونىڭ استىنا وت جاعىپ قويىپ، شوقتىعى ابدەن قىزعان كەزدە ۇستىنە جاتىپ، ءوزىن- ءوزى ىستىق تەمپەراتۋرادا قاقتايدى.
ال وسىعان دەيىن وعان جىلىك مايىن اۋىستىرۋدان وتە قىمبات وپەراتسيا جاسالعان ەكەن. ءبىراق ونىڭ سوڭىنان الىنۋى ءتيىس قوسىمشا ەمگە جىگىتتىڭ قارجىسى جوق. اقشا جيناۋعا دا قاۋقارى جەتپەيدى. بەس جىل بويى كوڭىل قوسقان سۇيىكتىسىمەن تاياۋدا عانا وتباسىن قۇرعان جىگىت دەنساۋلىعىنىڭ تۇزەلەرىنە ءۇمىتىن جوعالتپايدى. ول كەلەسى دارىگەرلىك تەكسەرۋگە دەيىن وسىنداي ەرەكشە ادىسپەن ەمدەلە بەرمەك.
