ساراپشىلار ورتاق ەۋرازيالىق ب ا ق يدەياسى كرەمل ناسيحاتىن كەڭەيتەدى دەپ قاۋىپتەنەدى
يدەيا كەيبىر قازاقستاندىق ساراپشىلاردىڭ الاڭداۋىن كۇشەيتتى.
سانكت- پەتەربۋرگ قالاسىندا وتكەن «ەۋرازيالىق ەكونوميكا پەرسپەكتيۆاسى» فورۋمىندا رەسەي پارلامەنتىنىڭ جوعارعى پالاتاسى - فەدەراتسيالىق كەڭەس ءتوراعاسىنىڭ ورىنباسارى ءىلياس ۋماحانوۆ «ەۋرازيا ءبىرىڭعاي مەديارەسۋرسىن قۇرۋ قاجەت» دەپ مالىمدەدى. ونىڭ پىكىرىنشە، «مۇنداي رەسۋرس ە ا ە و-ىن نىعايتۋدا ماڭىزدى ءرول اتقارار ەدى».
حالىقارالىق دامۋ كورپوراتسياسىنا كىرەتىن رەسەيلىك «مكر- مەديا» كومپانياسىنىڭ باس ديرەكتورى پاۆەل پاۋتوۆ «ءبىرىڭعاي اقپاراتتىق الاڭ قالىپتاستىرۋ ءۇشىن قازاقستان كوپ ءىس اتقارۋدا، اسىرەسە داريعا نازاربايەۆا بۇل پروتسەسكە ۇلكەن ۇلەس قوسىپ جاتىر» دەپ مالىمدەدى.
ازاتتىققا كوممەنتاري بەرگەن قازاقستاندىق ساراپشىلاردىڭ كوپشىلىگى ەلدىڭ اقپاراتتىق كەڭىستىگىن رەسەي ۇگىت-ناسيحاتى «جۇتىپ» قويۋى مۇمكىن دەپ بولجايدى. ءبىراق ولاردىڭ ايتۋىنشا، ە ا ە و اياسىندا ءبىرىڭعاي مەديارەسۋرس قۇرۋ يدەياسى - جاڭالىق ەمەس، ونىڭ ءبىر مىسالى - ت م د ەلدەرىنە حابار تاراتاتىن «مير» تەلەراديوكورپوراتسياسى.
«مير» تەلەارناسىمەن سالىستىرۋ
قازاقستاندىق تاۋەلسىز جۋرناليست ياروسلاۆ رازۋموۆتىڭ پىكىرىنشە، ە ا ە و اياسىندا بىرىككەن ەلدەردىڭ مەديارەسۋرستارىن دا بىرىكتىرۋ قيسىندى بولعاندىقتان، مۇنى ۇتىمدى يدەيا دەپ ساناۋعا بولادى. ءبىراق ول بۇل يدەيانى ىسكە اسىرۋدان ەشقانداي تۇشىمدى ناتيجە كۇتپەيدى.
ءبىرىڭعاي اقپاراتتىق رەسۋرس تا ە ا ە و بىرلەستىگى سياقتى قۇر داڭعازا يدەياعا اينالادى.
- ءىستىڭ قىرىن بىلمەيتىن رەسمي ورگانداردىڭ قولىنا تۇسسە، مۇنداي جوبالاردىڭ اياعى قۇردىمعا كەتىپ، ءجونى ءتۇزۋ ناتيجە شىقپايتىنى بەلگىلى جايت.
مەنىڭشە، بۇل يدەيانىڭ دا اقىرى ەشبىر ماڭىزدى ماسەلەگە ىقپال ەتە المايتىن «مير» تەلەارناسى سياقتى بولىپ قالادى. ەشكىمدى، ەشتەڭەنى سىنامايتىن، بايىپتى ساراپتاماسى جوق، كىلەڭ ماقتاپ-ماداقتاۋدان تۇراتىن حابارلار. مەنىڭشە، ءبىرىڭعاي اقپاراتتىق رەسۋرس تا ە ا ە و بىرلەستىگى سياقتى قۇر داڭعازا يدەياعا اينالادى، - دەيدى ياروسلاۆ رازۋموۆ.
ال ساياساتتانۋشى رۋستام بۋرناشەۆقا «كەيبىر جاسىرىن كەدەرگىلەر بولماسا»، مەديارەسۋرستاردى بىرىكتىرۋ يدەياسى - «ۇتىمدى قۇبىلىس» بولىپ كورىنەدى.
ساياسات تانۋشىنىڭ سوزىنشە، مۇنداي بىرلەستىكتەردى قۇرۋداعى نەگىزگى كەدەرگى باسقارۋ ماسەلەسىنە تىرەلەدى.
- مىسالى، ت م د ەلدەرى كەڭىستىگىندە حابار تاراتادى دەپ قۇرىلعان مەملەكەتارالىق «مير» تەلەارناسىن باسقارۋدا جاريالىلىق جوق، - دەيدى رۋستام بۋرناشەۆ.
ونى وداق اياسىندا، ونىڭ ىشىندە اقپارات سالاسىندا قۇرىلاتىن بىرلەستىكتەردىڭ تيىمدىلىگى مەن مەنەدجمەنتىنە قاتىستى ماسەلەلەر تولعاندىرادى.
- مەنىڭشە، ونسىز دا رەسەيدىڭ قۋاتتى اقپاراتتىق ىقپالىندا وتىرعان قازاقستان ءوز مەديارەسۋرستارىنىڭ تيىمدىلىگىن ارتتىرۋعا كوبىرەك ءمان بەرگەنى ءجون، - دەيدى رۋستام بۋرناشيەۆ.
قالام الدە قانجار
ال ۇلت مۇددەسىن قورعاۋمەن اينالىساتىن «ۇلت تاعدىرى» قوعامدىق ۇيىمى جەتەكشىسى دوس كوشىم ەۋرازيالىق ورتاق مەديارەسۋرس قۇرۋ يدەياسىنا ءۇزىلدى-كەسىلدى قارسى ءارى «قازاقستانعا قاتەر» دەگەن ءۋاج ايتادى.
- ورتاق مەديارەسۋرس دەگەنىمىز ءبىرىڭعاي اۋە شابۋىلىنان قورعانۋ جۇيەسى، ءبىرىڭعاي اسكەري قۇرىلىمدار سياقتى دۇنيە. رەسەي ۋكرايناعا قارسى ناعىز يدەولوگيالىق جانە پسيحولوگيالىق سوعىس جۇرگىزىپ جاتقانىن ۋكرايناداعى جاعدايدان كورىپ وتىرمىز. ەگەر ورتاق مەديارەسۋرس قۇرىلسا، رەسەيدىڭ جەتەگىندە كەتىپ، وزىمىزگە قاتىسى جوق سوعىسقا كيلىگەمىز. بۇل سوعىستاعى مەديارەسۋرستاردىڭ ءرولى اسكەري بولىمدەرمەن تەڭ، ءتىپتى ودان دا زور بولۋى مۇمكىن. ە ا ە و اياسىنداعى ورتاق مەديارەسۋرستار كرەملدىڭ امىرىنە باعىناتىن بولادى. ال قازاقستان الگى سوعىسقا ەرىكسىز ارالاسۋىنا تۋرا كەلەدى. ءبىز ءۇشىن بۇل - قاۋىپتى، - دەيدى دوس كوشىم.
دوس كوشىمنىڭ قازىر رەسەيدە «قالامدى قانجارعا تەڭەستىرگەن زامان» دەگەن پىكىرىن تاۋەلسىز جۋرناليست اندرەي سۆيريدوۆ تا قۇپتايدى.
ەگەر ە ا ە و اياسىندا ورتاق ب ا ق قۇرىلسا، قازاقستاندىق مەديارەسۋرستار الگى «اقپاراتتىق اسكەرلەردىڭ» ءبولىمى نەمەسە بولىمشەلەرى بولىپ قالادى.
- كەيبىر رەسەيلىك تەلەارنالاردىڭ ۋكرايناداعى وقيعالار جايلى حابارلارىنا بايلانىستى رەسەيلىك تەلەشولۋشى يگور ياكوۆەنكو «اقپاراتتىق اسكەرلەر» دەگەن ءسوزدى تالايدان بەرى قولدانىپ ءجۇر. سوندىقتان ەگەر ە ا ە و اياسىندا ورتاق ب ا ق قۇرىلسا، قازاقستاندىق مەديارەسۋرستار الگى «اقپاراتتىق اسكەرلەردىڭ» ءبولىمى نەمەسە بولىمشەلەرى بولىپ قالادى، - دەيدى اندرەي سۆيريدوۆ ازاتتىق تىلشىسىنە.
اندرەي سۆيريدوۆتىڭ پىكىرىنشە، ءبىرىڭعاي ەۋرازيالىق مەديارەسۋرس قۇرىلسا، قازاقستاندىق ب ا ق رەسەي ۇگىت-ناسيحات ونىمدەرىن تاراتاتىن قۇرالعا (رەترانسلياتور) اينالادى.
ءبىراق ازاتتىقپەن اڭگىمەلەسكەن ساراپشىلاردىڭ كوپشىلىگى قازاقستاننىڭ اقپاراتتىق تاۋەلسىزدىگىنە سەنبەيدى. ولاردىڭ پىكىرىنشە، ەلدىڭ اقپاراتتىق كەڭىستىگى قازىردىڭ وزىندە رەسەيدىڭ ىقپالىندا وتىر.
«ازاتتىق راديوسى»
