قازاقستاندا بوس جۇمىس ورىندارىنىڭ باسىم بولىگى «بىلىكتىلىك دەڭگەيى جوعارى ماماندار» ساناتىندا بولىپ وتىر
«ءىرى جانە ورتا كاسىپورىندارداعى كادرلارعا قاجەتتىلىك جانە سانى تۋرالى ەسەپ» ستاتيستيكالىق نىسانى بويىنشا ستاتيستيكالىق بايقاۋ جۇرگىزگەن.
بايقاۋدىڭ ناتيجەلەرى بويىنشا 2015 - جىلعى 1 - قاڭتارعا زەرتتەلگەن كاسىپورىندارداعى قىزمەتكەرلەردىڭ تىزىمدىك سانى 2 925,3 مىڭ ادامدى، بوس جۇمىس ورىندار سانى 22341 بىرلىكتى قۇرادى. قىزمەتكەرلەردىڭ تىزىمدىك سانىنداعى بوس جۇمىس ورىنداردىڭ ۇلەسى 0,8 پايىزدى قۇرادى. بۇل تۋرالى ستاتيستيكا كوميتەتىنىڭ باسپا ءسوز قىزمەتىنەن حابارلاندى.
مالىمەتتەرگە قاراعاندا، بوس ورىنداردىڭ باسىم كوپشىلىگى «بىلىكتىلىك دەڭگەيى جوعارى ماماندار» قىزمەتتىڭ كاسىپكەرلىك توبى بويىنشا بەلگىلەندى جانە ول 5207 بىرلىكتى، بوس جۇمىس ورىندارىنىڭ جالپى سانىنان ولاردىڭ ۇلەسىنە 23,3% قۇرادى. ال «ءىرى جانە ۇساق ونەركاسىپ كاسىپورىندارىنىڭ، قۇرىلىستىڭ، كولىكتىڭ، بايلانىستىڭ، گەولوگيانىڭ جانە جەر قويناۋىن بارلاۋدىڭ بىلىكتى قىزمەتكەرلەرى» كاسىپتىك توپ بويىنشا بوس ورىندار سانى 4022 بىرلىكتى، «بىلىكتىلىك دەڭگەيى ورتا ماماندار» - 3083 بىرلىكتى، «بىلىكتىلىگى جوق جۇمىسشىلار» - 2718 بىرلىكتى قۇراعان.
«اعىمداعى جىل بويى ەداۋىر كوپ سۇرانىس ءىرى جانە شاعىن ونەركاسىپ كاسىپورىندارىنىڭ، قۇرىلىستىڭ، كولىكتىڭ، بايلانىستىڭ، گەولوگيانىڭ جانە جەر قويناۋىن بارلاۋدىڭ بىلىكتى قىزمەتكەرلەرىنە بولادى. ال ولاردىڭ تاپشىلىعى 5910 ادامدى، بىلىكتىلىگى جوق جۇمىسشىلار - 4488 ادامدى جانە بىلىكتىلىك دەڭگەيى جوعارى ماماندار 4467 ادامدى قۇرايدى.
اۋىل، ورمان، اڭشىلىق، بالىق شارۋاشىلىعىنىڭ، بالىق اۋلاۋ كاسىبىنىڭ بىلىكتى قىزمەتكەرلەرىنە سۇرانىسى از بولىپ تابىلادى - 82 ادام.
ءىرى جانە ۇساق ونەركاسىپ كاسىپورىندارىنىڭ، كوركەم كاسىپتەردىڭ، قۇرىلىستىڭ، كولىكتىڭ، بايلانىستىڭ، گەولوگيانىڭ جانە جەر قويناۋىن بارلاۋدىڭ بىلىكتى قىزمەتكەرلەرىنە باسىم قاجەتتىلىككە ونەركاسىپتىڭ (3183 ادام) جانە قۇرىلىستىڭ (2070 ادام) كاسىپورىندارى مەن ۇيىمدارى تاپشىلىق كورۋدە»، دەلىنگەن باسپا ءسوز بايانىندا.
اۆتور: قانات مامەتقازى ۇلى
