شىعىس قازاقستان وبلىسىندا اسىلتۇقىمدى مال شارۋاشىلىقتارى كوبەيۋدە
اسىلتۇقىمدى شارۋاشىلىقتار سانى 46 عا جەتكەن. بىلتىر مۇنداعى 265 شارۋاشىلىق تۇقىم تۇرلەندىرۋ جۇمىستارىنا بەلسەندى قاتىسىپ، انالىق مال باسىنىڭ %35 ىن اسىلداندىردى.
بۇل ەلىمىز بويىنشا جوعارعى كورسەتكىش.
مەملەكەت قولداۋىمەن اۋىلداعى تەحنيكا جاڭارىپ، سۋبسيديالار مەن جەڭىلدەتىلگەن نەسيەلەر كولەمى ارتۋدا. بۇل - ەكپىن اۋىلىنداعى اسىل تۇقىمدى ءىرى قارا وسىرەتىن «ءماۋلىت» شارۋا قوجالىعى. جەرگىلىكتى تۇرعىن ايدىن حامزايەۆ 5 جىلدان بەرى وسىندا تۇراقتى جۇمىس ىستەپ ءجۇر.
ايدىن حامزايەۆ، مال بورداقىلاۋشى:
- ىستەيمىن دەگەن كىسىگە اۋىلدا جۇمىس كوپ. بۇل ەندى مال باعۋ اتا كاسىبىمىز عوي. قىستان جاقسى شىقتىق، قىسىلماي. جەم- ءشوپ جەتكىلىكتى. مالدىڭ كۇيىدە جاقسى. ەندى بۇيىرسا، تولدەۋ بولادى.
قوجالىقتىڭ نەگىزى 2005- جىلى قالانعان. قايىرلى قاسەنوۆ جالعىز سيىردان باستاعاندا كاسىبىنىڭ ورگە دومالاۋىنا كۇدىكپەن قاراعاندار دا بولىپتى. الايدا تاباندى ەڭبەك پەن مەملەكەتتىڭ جان- جاقتى قولداۋىنىڭ ارقاسىندا مال باسى بۇگىندە 300 دەن اسىپ، ىرگەلى شارۋاشىلىققا اينالدى.
قايىرلى قاسەنوۆ، «ءماۋلىت» شارۋا قوجالىعىنىڭ جەتەكشىسى:
- بۇگىنگى تاڭدا اۋىلشارۋاشىلىعىنا دەگەن قولداۋ وتە جاقسى. وعان ءبىز ريزامىز. ولاي دەيتىنىمىز، وتكەن جىلى تەحنيكالار الدىق، جيىنى قانشا تەحنيكا الساق تا، سونىڭ %50 ىن ۇكىمەت سۋبسيديامەن قايتارىپ بەردى.
قازىر مۇندا اۋىلدىڭ 10 تۇرعىنى ەڭبەك ەتەدى. وزدەرىنە تيەسىلى 3 مىڭ گەكتار جەردىڭ ۇشتەن ءبىرى شابىندىق جانە مال ازىعىنا ارنالسا، قالعانى جايىلىم. باستى ماقسات - شارۋاشىلىقتى ودان ءارى دامىتىپ، قازاقتىڭ اسىلتۇقىمدى اقباس سيىرىنىڭ سانىن كوبەيتۋ، - دەيدى شارۋاشىلىق جەتەكشىسى.
مەرەي قايىربەكوۆ، تارباعاتاي اۋداندىق اۋىلشارۋاشىلىعى ءبولىمىنىڭ باسشىسى:
- تۇقىمدىق تۇرلەندىرۋ جۇمىستارىنا 265 شارۋا قوجالىعى قاتىسىپ، انالىقتىڭ باسى 18 مىڭ باس انالىقتى قۇرادى. 18 مىڭ باس انالىققا 600 باس بۇقا قوسىلدى اسىل تۇقىمدى. وسى باعىتتا جۇمىسىمىز جالعاسا بەرەدى. بۇل جالپى مالدىڭ %35 ىن قۇرايدى. 2014 -جىلدىڭ قورتىندىسى بويىنشا تارباعاتاي اۋدانى قازاقستان بويىنشا 1-كورسەتكىشتە تۇر.
اۋداندا بۇگىندە 117 مال بورداقىلاۋ كەشەنى جۇمىس ىستەپ تۇر. بىلتىر تارباعاتاي اۋدانىنا «اگروبيزنەس-2020»، «سىباعا»، «قۇلان»، «التىن اسىق» سياقتى ءار ءتۇرلى باعدارلامالار ارقىلى مەملەكەتتەن 1 ميلليارد تەڭگەدەن ارتىق قاراجات ءبولىنىپتى.
بيىل دا بۇل باعىتتاعى جۇمىستار جۇيەلى جالعاسىن تابا بەرەدى، - دەيدى اۋدان باسشىلارى.
www.24.kz
