استانادا «سەنىڭ داۋىسىڭ ماڭىزدى» اۆتوشەرۋى ءوتتى - فوتو
اۆتوشەرۋدى «قازاقستان-2050» جالپى ۇلتتىق قوزعالىسى «جاس وتان» جاستار قاناتىمەن بىرگە استانا اكىمدىگىنىڭ قولداۋىمەن وتكىزىپ وتىر. ماقساتى - تۇرعىنداردى قازاقستان رەسپۋبليكاسى پرەزيدەنتىنىڭ سايلاۋىنا قاتىسۋعا ۇگىتتەۋ جانە ولاردىڭ ەلەكتورالدى بەلسەندىلىگىن ارتتىرۋ، ازاماتتىق سانا-سەزىمىن وياتۋ.
«وسى اكسيا ارقىلى ءبىز حالىقتى، ونىڭ ىشىندە جاستاردى 26- ساۋىردە وتەتىن پرەزيدەنت سايلاۋىنا قاتىسىپ، داۋىسىن ءوزى قالاعان كانديداتىنا بەرۋگە شاقىرعىمىز كەلەدى. جاستار - ءبىزدىڭ بۇگىنگىمىز، ءارى بولاشاعىمىز. ەندەشە ولاردى ءبىز ەلىمىزدىڭ دامۋىنا قاتىستى ماسەلەلەرگە قازىردەن ارالاسۋىنا ىقپال ەتۋىمىز كەرەك. دەمەك، سايلاۋعا قاتىسۋعا شاقىرۋ ارقىلى ءبىز وسكەلەڭ ۇرپاقتى ەلدىڭ بولاشاعىنا بەي-جاي قاراماۋعا ۇندەيمىز. ويتكەنى، ءبىزدىڭ ءارقايسىمىزدىڭ داۋىسىمىز رەسپۋبليكامىزدىڭ ودان ءارى دامۋىن ايقىندايتىنى تۇسىنىكتى»، - دەيدى «قازاقستان-2050» جالپى ۇلتتىق قوزعالىسىنىڭ مەديا ديرەكتورى قانات اۋەسباي.
مەملەكەتتىك تۋمەن بەزەندىرىلگەن اۆتوكولىكتەر لەگى قالانىڭ باس كوشەلەرى ارقىلى ءجۇرىپ ءوتىپ، تۇرعىنداردى سايلاۋعا قاتىسۋعا، ءوزىنىڭ ازاماتتىق بورىشىن ورىنداۋعا شاقىردى. ءىس-شاراعا جاستار قوزعالىسى، قوعامدىق بىرلەستىكتەردىڭ بەلسەندى جاستارى، اۆتو-موتو اۋەسقويلارى قاتىستى. شەرۋ «قازاقستان» سپورت كەشەنى الاڭىنان باستاۋ الىپ، سارىارقا، اباي، رەسپۋبليكا، ج. تاشەنوۆ كوشەلەرى ارقىلى ابىلاي حان داڭعىلى، ق. مۇڭايتپاسوۆ كوشەلەرىن باسىپ وتەدى.
رەسپۋبليكالىق اكسيا پاۆلودار، اقتوبە، كوكشەتاۋ، تالدىقورعان، اتىراۋ، وسكەمەن، تاراز، ورال، قاراعاندى، قوستاناي، پەتروپاۆل قالالارىندا جالعاسپاق.
ايىمگۇل ابىلەۆا،
فوتو اۆتورى باۋىرجان جۋاسباەۆ
