قاراعاندى وبلىسىنىڭ ىنتىماق اۋىلىنا گۋمانيتارلىق كومەك تىكۇشاقپەن جەتكىزىلدى

قاراعاندى. قازاقپارات - سۋ تاسقىنى سالدارىنان سىرتقى الەممەن بايلانىسىن ۇزگەن قاراعاندى وبلىسى بۇقار جىراۋ اۋدانىنداعى ىنتىماق اۋىلىنا تىكۇشاقپەن گۋمانيتارلىق كومەك كورسەتىلدى، دەپ حابارلادى وبلىس اكىمىنىڭ باسپا ءسوز قىزمەتىنەن.

«سۋ تاسقىنىنان زارداپ شەككەن ىنتىماق اۋىلىنىڭ تۇرعىندارىنا تىك ۇشاقپەن ازىق-تۇلىكتەر مەن تازالىق قۇرالدارى تۇرىندەگى گۋمانيتارلىق كومەك جەتكىزىلدى. ەلدى مەكەنگە اپاراتىن جولدى سۋ شايىپ كەتكەن»، - دەدى وبلىس اكىمىنىڭ باسپا ءسوز قىزمەتىنەن.

بۇل اۋىلدا 365 ادام تۇرادى. 70 ءۇيدىڭ 25 ءىن سۋ باسقان.

بيلىكتىڭ اقپاراتىنا سۇيەنسەك، بۇقار جىراۋ اۋدانىندا كۇردەلى سۋ تاسقىنى جاعدايى ساقتالۋدا. مۇستافين كەنتىندە اپاتتان زارداپ شەككەندەرگە سالدارىن جويۋ بويىنشا وبلىستىق جەدەل شتاب جۇمىس جۇرگىزۋدە. بۇدان باسقا، قاجەتتى مەديتسينالىق جابدىقتارمەن، دارىلىك زاتتارمەن جاراقتالعان مەديتسينالىق ورتالىق، پسيحولوگيالىق كومەك قىزمەتى جۇمىس ىستەۋدە.

«مۇستافين كەنتىندە 4 مىڭعا جۋىق ادام تۇرسا، سونىڭ كوپشىلىگى زارداپ شەكتى. قازىرگى ۋاقىتتا زارداپ شەككەندەردىڭ ءتىزىمى ناقتىلانۋدا. اتاۋلى كومەك كورسەتۋ ءۇشىن ەلەكتروندىق دەرەكقور قۇرىلۋدا، ازىق-تۇلىك ونىمدەرىنە، العاشقى قاجەتتى زاتتارعا سۇرانىستى ايقىنداۋ جۇمىستارى جۇرگىزىلۋدە. حالىققا كومەك كورسەتۋ جەلىسى اشىلدى. قوسىمشا قاراعاندى وبلىسى ت ج د مەن قۇقىق قورعاۋ ورگاندارىنىڭ موبيلدىك بايلانىسى ىسكە قوسىلدى»، - دەپ اتاپ ءوتتى وبلىس اكىمىنىڭ باسپا ءسوز قىزمەتىنەن.

ونىڭ دەرەكتەرىنە سۇيەنسەك، مۇستافين اۋىلىنان كوشىرىلگەن تۇرعىندار ءوز ۇيلەرىنە قايتا ورالعان، 428 ادام قاراعاندى مەن تەمىرتاۋ قالالارىندا مەكتەپتەرگە، قوناقۇيلەر مەن جاتاقحانالارعا ورنالاستىرىلدى.

زاڭناماعا سايكەس كەلتىرىلگەن شىعىندى انىقتاۋ جانە ورنىن تولتىرۋ بويىنشا حالىقتان وتىنىشتەر قابىلداۋ باستالدى.

اۋداننىڭ باسقا دا ەلدى مەكەندەرىندە اپاتتان قۇتقارۋ، قالپىنا كەلتىرۋ جۇمىستارى جۇرگىزىلۋدە. التى اۋىلدىڭ حالقى تۇگەلدەي كوشىرىلسە، التى اۋىل ءىشىنارا كوشىرىلگەن.

«وتكەن كەزەڭدە چكالوۆ،  قىزىلجار، سادوۆوە، اقتوبە، ىنتىماق اۋىلدارى سۋ باسۋعا بەيىم ايماقتارعا جاتتى. بۇدان باسقا، حالقى سۋ تاسقىنى قاۋپى تۋرالى حاباردار ەتىلگەن قاراجار، بايمىرزا، تەگىزجول اۋىلدارىن سۋ باسۋ قاۋپى ساقتالۋدا، - دەپ حابارلادى وبلىس اكىمىنىڭ باسپا ءسوز قىزمەتىنەن.

- كاسىپورىندار مەن حالىقتىڭ قاتىسۋىمەن كۇن سايىن جاعالاۋ جەلىلەرىن نىعايتۋ، سۋ ايداۋ جۇمىستارى جۇرگىزىلۋدە. قاراعاندى وبلىسى ت ج د قۇتقارۋشىلارى جۇمىس ىستەۋدە. بۇدان باسقا، جولدى سۋ شايىپ كەتىپ، كوپىر اپاتتى جاعدايدا بولعاندىقتان، كوپتەگەن ەلدى مەكەندەرگە جول قاتىناسى توقتاپ تۇر».

جاعداي مونيتورينگى تاۋلىك بويى جۇرگىزىلۋدە.