عالىمدار قازاقستانداعى تاريحي شىندىقتىڭ اشىلاتىن مەزگىلى جەتكەنىن ايتتى
1917-جىل مەن 1991-جىل ارالىعىن قامتيتىن اسا قۇپيا دەرەكتەر ارنايى زاڭ كۇشىنە ەنگەن ساتتەن باستاپ جاريا بولماق. ال كەڭەس ۇكىمەتىنىڭ مۇراگەرى سانالاتىن رەسەي تاراپى ۋكراينا بيلىگىنىڭ بۇل ارەكەتىنە بىردەن قارسىلىق ءبىلدىردى. توقسانىنشى جىلداردان بەرى قۇپيا كۇيىندە ساقتاۋلى جاتقان قازاقستانداعى مۇراعاتتىڭ جاعدايى نە بولماق؟
«ءار حالىق ءوزىنىڭ وتكەن تاريحىن بىلۋگە قۇقىلى» دەگەن ەۋروپالىق ۇستانىمدى نەگىزگە العان ۋكراينا بيلىگى ماڭىزدى تاريحي، ساياسي قادامعا باردى. مۇراعات قۇپيالارىنىڭ اشىلۋى تۋرالى زاڭ جوباسىن قابىلداعان ۋكراينا قاۋىپسىزدىك كوميتەتىنىڭ رەپرەسسيالار مەن گەنوتسيدتەرگە قاتىستى بارلىق قۇجاتتارىن جاريالاماقشى.
ك س ر و- نىڭ تىرناعى ەڭ قاتتى باتقان ەكى ەل ۋكراينا مەن قازاقستان سانالادى. عالىمدارلار دا قازاقستانداعى تاريحي شىندىقتىڭ اشىلاتىن مەزگىلى جەتتى دەيدى.
«ءبىز ۋكرايناداعى بولعان، پريبالتيكاداعى بولعان پروتسەستەردى تۋرا سول دارەجەدە قايتالاۋدىڭ قاجەتى جوق. ءبىراق قازاقستان جاعدايىندا ءبىزدىڭ وسى تىكەلەي ۇلتتىق، مەملەكەتتىك مۇددەمىزگە ساي شارالاردى ىسكە اسىرۋعا مىندەتتىمىز. نەگە ونى ءبىز كەيىنگە قالدىرۋىمىز كەرەك؟»، - دەيدى تاريح عىلىمدارىنىڭ دوكتورى مامبەت قويگەلدى.
ال ساياساتتانۋشىلار مۇراعات دەرەكتەرىن جاريالاۋ كەزىندە دە اباي بولعان ءجون دەگەندى ەسكەرتەدى. مەملەكەتتىك قۇپيالار ءوز الدىنا ءبىر بولەك اڭگىمە دەگەن دوس كوشىم قۇپيا دەرەكتەردىڭ اشىلۋى مەملەكەت ءۇشىن دە، عىلىم ءۇشىن دە «تازارۋدىڭ» ءبىر ءتۇرى دەگەن پىكىردە.
«توقسانىنشى جىلدارى الاشتى بىلمەسەك ءبىز، سول الاشتىڭ جاساعان ىستەرى، ولاردىڭ جازعاندارى جارىققا شىقپاسا، قازاقستان جارتى بايلىعىنان ايىرىلار ەدى. اسىرەسە، ۇلتتىق ەل، ۇلتتىق مەملەكەت ەسەبىندە. سونىڭ ءوزى ءبىزدىڭ قانشا كوزىمىزدى اشتى. دەمەك، وسىنداي قادامعا ءبىز دە بارعانىمىزدا جاقسى-جاقسى، تاماشا قۇندىلىقتارىمىز ومىرگە كەلەتىن شىعار جاسىرىلىپ تۇرعان»، - دەدى ساياساتتانۋشى دوس كوشىم.
ال قازاقستاندا كەڭەس كەزەڭىن قامتيتىن مۇراعات دەرەكتەرىمەن تانىسۋعا قاراپايىم تۇرعىندار تۇرماق، زەرتتەۋشى عالىمدارعا دا رۇقسات جوق. قويناۋىنا قۇپيا بۇككەن مۇراعاتتىڭ قاشان قولجەتىمدى بولاتىنىن ماماندار دا ءدوپ باسىپ ايتا المايدى. دەمەك، تالاي تاريحي شىندىقتان حابار بەرەر فاكتىلەردىڭ ءالى دە قۇپيا كۇيىندە ساقتالارى انىق.
