شىمكەنتتە قىزدار جۇدىرىقتاسۋدا

استانا. قازاقپارات - بۇل كۇندەرى شىمكەنتتە ايەلدەر اراسىندا بوكستان قازاقستان چەمپيوناتى ءوتىپ جاتىر.

بۇل جارىستا ەلىمىزدىڭ ءار ايماعىنان كەلگەن 82 بىلعارى قولعاپ شەبەرى باق سىناۋدا.

ايەلدەر بوكسى - وليمپيادا ويىندارىنىڭ باعدارلاماسىنا ەنگەن سپورت ءتۇرى. سول سەبەپتى دە وعان دەگەن قىزىعۋشىلىق جىل وتكەن سايىن ارتا تۇسۋدە.

بۇل ونەر قازاقستانعا كەشەۋىلدەپ جەتكەنىمەن، وتانداستارىمىز سپورتتىڭ بۇل ءتۇرىنىڭ قىر- سىرىن تەز- اق مەڭگەردى. قىسقا عانا مەرزىم ارالىعىندا ءبىر توپ ارۋىمىز ازيانىڭ الدى بولىپ، وليمپيادا مەن الەم چەمپيوناتتارىندا اتوي سالدى.

سول ساڭلاقتاردىڭ ءبىرازى ايتۋلى جارىستا دا كۇش سىناسۋدا. اتاپ ايتساق، شىمكەنتتەگى دودادا 2014 -جىلعى الەم چەمپيونى نازىم قىزايباي، بىلتىرعى جىلعى الەم چەمپيوناتىنىڭ كۇمىس جۇلدەگەرى ءلاززات كۇنگەيبايەۆا، ازيا چەمپيونى جاينا شەكەربەكوۆا، ءبىرقاتار حالىقارالىق تۋرنيرلەردە جەڭىس تۇعىرىنا كوتەرىلگەن گۇلجاينا ءۇببىنيازوۆا مەن زارينا سولويەۆا جانە تاعى باسقا دا اتاقتى بوكسشىلار ونەر كورسەتۋدە.

-  بۇل جارىستا بىزدەر ءۇشىن ەڭ ماڭىزدىسى -  بەلدى بوكسشىلارىمىزدىڭ بابىن بايقاپ كورۋ جانە دارىندى جاستاردىڭ اراسىنان ۇزدىكتەردى ىرىكتەپ الۋ. ويتكەنى الداعى ۋاقىتتا جەرلەستەرىمىزدى ءبىرقاتار ماڭىزدى باسەكەلەر كۇتىپ تۇر. بيىل ازيا چەمپيوناتى بار، كەلەسى جىلى استانادا الەم چەمپيوناتىنىڭ جالاۋى جەلبىرەيدى. ودان كەيىن وليمپيادا ويىندارىنىڭ الاۋى تۇتانادى. سول جارىستاردىڭ بارلىعىندا ەل نامىسىن ابىرويلى قورعاۋعا ءتيىسپىز، -  دەيدى قازاقستان قۇراماسىنىڭ اعا باپكەرى ۆاديم پريسياجنيۋك.

ەل چەمپيوناتىندا قازىردىڭ وزىندە ءبىرقاتار توسىن ناتيجەلەر تىركەلدى. ماسەلەن، ازيا چەمپيونى، ازيا ويىندارىنىڭ قولا جۇلدەگەرى، لوندون وليمپياداسىنا قاتىسۋشى سايدا حاسەنوۆا (60 كەلى) اقمولالىق كارينا يبراگيموۆادان ۇتىلىپ قالسا، ءبىرقاتار ءدۇبىرلى دودالاردا دارا تالانتىمەن وقشاۋلانعان گۇلجاينا ءۇببىنيازوۆا (75 كەلى) قاراعاندىلىق ۆيولەتتا كنيازيەۆاعا قارسى جەكپە- جەككە شىعۋدان باس تارتتى.

عالىم سۇلەيمەن

«ايقىن»