التايمەن قوشتاسۋ - كەنجەگۇل سەيتقان قىزىنىڭ ولەڭدەرى

كەشىر مەنى تۋعان جەر، كەتتىم اتامەكەنگە،  ۇشتى كوڭىل قارلىعاش قيماي سەنى كەتەردە.

 ايتىڭدارشى ءبىر اقىل جىل قۇستارى ماعاندا،

ءبىر جۇرەكتى سەندەردە بولدىڭدەرمە ەكى ەلگە؟

 اتامەكەن ايالاپ قۇشاعىنا اپ تىم ىستىق،

 اتا-انامداي ايمالاپ قارسى الادى كۇمىس بۇلت.

 تۋعان جەردىڭ جاۋتاڭداپ جابىرقايدى جانارى،

شىنىقتىرعان ءور التاي جىگەرىمدى قۇرىش قىپ.

 ءبىر-بىرىنەن بولە الماي مەن قينالدىم ەكى ەلدى،

 قيال قۇسى قيا الماي شىر اينالىپ كوشەڭدى.

 الاتاۋعا اتتاندىم اتا-بابا جۇرتى دەپ،

كەتتىم قيىپ تۋعان جەر ارۋ التاي قوش ەندى...

 قارلىعاش جىر

 ءۇزىپ الىپ ادەمى جۇلدىزداردى،

 تاڭەرتەڭ ساعان سىيلاسامبا ەكەن.

 جاۋىپ كەتىپ سۇيەتىن ءبىزدىڭ جاڭبىر،

تاۋلاردىڭ بۇلتىن جىيناسامبا ەكەن.

 قارلىعاش- جىر جاعامىن ساعان قالاي،

 دوسىم بولىپ راسپا قالاتىنىڭ.

 ىزدەگەندە ۇشاسىڭ ماعان قاراي،

قاۋىرسىنىن تۇتاتسام قاناتىڭنىڭ.

 ورتەنگەندە سۋ سەپتىڭ جانتالاسىپ،

 مۇزداعاندا جىلىتتىڭ وتىڭمەنەن.

 تاۋداي مىندەت قويسامدا ارقالاتىپ،

ءۇمىتىمدى سەن ەدىڭ ولتىرمەگەن .

 عاشىق بولدىم مەن وسى مىنەزىڭە،

 كەل كەربەزىم وزىڭمەن دوستاسايىن.

 قارلىعاش- جىر ۇيا سال جۇرەگىمە،

ساعان بولا ءبىر ورىن بوساتايىن.

 

اقپان ايى وتكەندە

 

 كوكتەمگە دە بەرگىسىز ءبىر اقپان بار

 مايداي ەرىپ جاتاتۇعىن ماقپال قار.

 قىستىڭ سوڭىن قىيماستىقپەن وتكىزىپ،

ۋاقىتتى قۇرمەتتەپ جاتقان بار.

 اشۋلى كەپ اقپان كۇلىپ شىعادى،

  قىزىقتىرىپ قىستىڭ سوڭعى قيالى.

 مەيىرلەنسە قارا تاستى ەرىتەر،

قۇدىرەتتى كۇن اللانىڭ شۋاعى.

 ءماز بولامىز اقپان ايى وتكەندە،

 كوبەلەكتەي كوڭىل قاشىپ كوكتەمگە.

 اجەم مارقۇم ءبىر كۇن باتسا مۇڭايىپ،

كۇرسىنەتىن دۇنيە قۇرعىر- دەپ كەيدە.

 

كەنجەگۇل سەيتقان قىزى