كەربۇلاق اۋدانىنا «مەنىڭ قازاقستانىم» پويىزى باردى

سارىوزەك. قازاقپارات - كەشە «مەنىڭ قازاقستانىم» پويىزى الماتى وبلىسى كەربۇلاق اۋدانىندا بولدى.

كەربۇلاق اۋدانىنىڭ جۇرتشىلىعى قوناقتاردى كوتەركى كوڭىل- كۇيمەن قارسى الدى.

سالتاناتتى ميتينگىدە ءسوز سويلەگەن الماتى وبلىسى اكىمىنىڭ ورىنباسارى باقتيار ونەربايەۆ ەلباسى جارلىعىمەن بيىلعى جىلدىڭ قازاقستان حالقى اسسامبلەياسى جىلى بولىپ بەلگىلەنگەنىن تىلگە تيەك ەتە كەلىپ، جوبانىڭ ءمانى مەن ماعىناسىنا توقتالدى.

«اكسيانىڭ ماقساتى - «ماڭگىلىك ەل» يدەياسىن تاراتۋ، مادەني جانە بۇقارالىق شارالار ۇيىمداستىرۋ. ونىڭ ىشىندە، مەديتسينالىق، الەۋمەتتىك، قۇقىقتىق كومەك كورسەتۋ جانە كاسىپكەرلىكتى، اۋىل شارۋاشىلىعىن قولداۋ ماسەلەلەرى بويىنشا كەڭەس بەرۋ»، - دەدى وبلىس اكىمىنىڭ ورىنباسارى.

ال كەربۇلاق اۋدانىنىڭ اكىمى باعدات اليەۆتىڭ ايتۋىنشا، اۋدان كەربۇلاق جانە گۆارديا اۋداندارىن بىرىكتىرۋ جولىمەن قۇرىلعان. «وتكەن جىلى اۋدان ءوزىنىڭ 40 جىلدىق مەرەيتويىن اتاپ ءوتتى. ءبىزدىڭ اۋدان - ەكونوميكاسى دامىعان، اگرارلىق سەكتوردا وزىندىك ۇلەسى بار اۋدانداردىڭ ءبىرى. كۇرەڭبەل ءوڭىرى ءوزىنىڭ باتىرلارىمەن، تاريحي تۇلعالارىمەن، كەڭەس وداعىنىڭ باتىرلارى جانە سوتسياليستىك ەڭبەك ەرلەرىمەن ماقتانا الادى»، - دەپ اتاپ ءوتتى ول.

سالتاناتتى قارسى الۋدان كەيىن «مەنىڭ قازاقستانىم» پويىزىنىڭ ماماندارى وزدەرىنە جۇكتەلگەن مىندەتتەرىن اتقارۋعا كىرىستى. سولاردىڭ ىشىندە ادىلەت سالاسىنىڭ قىزمەتكەرلەرى كەربۇلاقتىق 43 ادامدى قابىلدادى، 26 ازاماتتىڭ سۇراقتارى قاناعاتتاندىرىلدى. ونىڭ ىشىندە، ازاماتتىق حال- اكتىلەرىن تىركەۋ (ا ح ا ت) سالاسى بويىنشا - 5، جىلجىمايتىن مۇلىكتى تىركەۋ سالاسى بويىنشا - 4، ح ق ك و بويىنشا - 12، نوتاريات بويىنشا 5 سۇراق قارالىپ، جاۋاپ بەرىلدى.

سونىمەن قاتار، سارى وزەكتەگى 1240 اسكەري گارنيزونىندا 700 ادامنىڭ قاتىسۋىمەن اسكەري- پاتريوتتىقتىق اكسيا وتكىزىلدى. ەكى ساعاتقا سوزىلعان اكسيانىڭ كوركىن «مەنىڭ قازاقستانىم» پويىزى قۇرامىنداعى «تۇران» جانە «جاستار» جايدارمان كوماندالارى قىزدىرا ءتۇستى.

 وسى كۇنى شوقان ءۋاليحانوۆتىڭ 180 جىلدىق مەرەيتويىنا ارنالعان «ءور شوقان، دانا شوقان، اسقاق شوقان» اتتى ەسكە الۋ كەشى بولىپ ءوتتى. بۇل شاراعا «مەنىڭ قازاقستانىم» پويىزىنىڭ مۇشەلەرى، قازاقستاننىڭ حالىق ءارتىسى نۇرعالي ءنۇسىپجانوۆ، قازاقستانعا ەڭبەگى سىڭگەن مادەنيەت قايراتكەرى تاتيانا بۋرميستروۆا قاتىستى.

شاراعا قاتىسۋشىلار الماتى وبلىسى كەربۇلاق اۋدانى شانحاناي اۋىلىنداعى ش. ءۋاليحانوۆتىڭ «التىنەمەل» مەملەكەتتىك مەموريالدى مۋزەيىندە بولىپ، عالىمنىڭ ءارۋاعىنا قۇران باعىشتالدى. سونىمەن بىرگە، مۋزەيدىڭ جاڭا ەكسپوزيتسياسىمەن تانىستى.

«مەنىڭ قازاقستانىم» پويىزىنىڭ باعدارلاماسىنا سايكەس، ونەر مايتالماندارى كەربۇلاقتىقتاردىڭ الدىندا كونسەرت قويدى.

اۆتور: ءابۋ-اسقار مەكەش ۇلى