قازاقستاندا تۇراتىن حالىقتاردىڭ تىلدەرىن دامىتۋعا بارلىق جاعداي جاسالۋدا - ب. ساپاربايەۆ

استانا. قازاقپارات - رەسپۋبليكا اۋماعىندا تۇراتىن ءتۇرلى حالىقتاردىڭ تىلدەرىن دامىتۋ ءۇشىن قازاقستاندا بارلىق قاجەتتى شارالار قولدانىلىپ كەلەدى.

بۇل تۋرالى بۇگىن «ءتىل - كەلىسىم نەگىزى» اتتى رەسپۋبليكالىق سەميناردا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ مالىمدەدى، دەپ حابارلايدى  primeminister.kz.

«ءبىزدىڭ مەملەكەتىمىز جۇرگىزىپ كەلە جاتقان ساياسات ەلىمىزدىڭ اۋماعىندا ءومىر سۇرەتىن حالىقتاردىڭ تىلدەرىن دامىتۋ ءۇشىن جاعداي جاساۋعا باعىتتالعان»، - دەدى ب. ساپاربايەۆ.
 ۆيتسە- پرەمەر قازاقستاندا ورىس تىلىندە 15 تەاتر، كورەي، نەمىس، وزبەك جانە ۇيعىر تىلدەرىندە 4 تەاتر جۇمىس جاسايتىنىن اتاپ ءوتتى. 

 «قازاقستاندا ءتۇرلى حالىقتاردىڭ بەس تىلىندە بەس گازەت، راديو مەن تەليەۆيزيادا باعدارلامالار شىعادى. كوپتەگەن قالالار مەن اۋدان ورتالىقتارىندا جەكسەنبىلىك مەكتەپتەر بار، ولار حالىقتاردىڭ ءوز تىلدەرىن، مادەنيەتىن جانە سالت- ءداستۇرىن ۇمىتپاۋعا باعىتتالعان»، - دەپ تولىقتىردى پرەمەر- ءمينيستردىڭ ورىنباسارى. 
  
 رەسمي مالىمەت بويىنشا، قازاقستاندا 7563 جالپى ءبىلىم بەرۋ مەكتەبىنىڭ  1291 مەكتەبى ورىس، 20  مەكتەبى وزبەك، 13 مەكتەبى ۇيعىر، 4 مەكتەبى تاجىك تىلدەرىندە وقىتادى، 2100  مەكتەپ - ارالاس، 8467  مەكتەپكە دەيىنگى مەكەمەنىڭ 1840 ى ورىس، 3 ۋى باسقا تىلدەردە وقىتادى. 1098 ى بالالاردى مەكتەپكە دەيىنگى وقىتۋ مەكەمەسى وقىتۋدى ەكى تىلدە جۇرگىزەدى. ەتنومادەني بىرلەستىكتەردىڭ 190 جەكسەنبىلىك مەكتەبىندە 30 ەتنيكالىق توپتىڭ انا تىلدەرى وقىتىلادى.