ەلباسى: جاستاردىڭ قۋاتى - بىلىمىندە، بىرلىگىندە جانە وتان سۇيگىشتىگىندە

استانا. قازاقپارات - قازاقستاندى باقۋاتتى مەملەكەتكە اينالدىرىپ، بارلىق دۇنيە جۇزىنە تانىتتىق. بۇگىن استاناداعى تاۋەلسىزدىك سارايىندا «ەلباسىمەن بىرگە - جاڭا جەتىستىكتەرگە!» جاستار فورۋمىندا مەملەكەت باسشىسى نۇرسۇلتان نازاربايەۆ وسىلاي ءمالىم ەتتى.

«بۇگىنگى فورۋمنىڭ ماقساتى - جاڭا جاھاندىق جاعدايدا ەلىمىزدى دامىتا ءتۇسۋ ءۇشىن جاستاردىڭ جىگەرى مەن قۋاتىن قالاي پايدالانۋ كەرەكتىگىن تالقىلاۋ. سەندەر جاڭا قازاقستاننىڭ العاشقى بۋىنىسىزدار، 1991-جىلدىڭ 16- جەلتوقسانىندا ءبىز قازاقستاندى تاۋەلسىز ەل دەپ جاريالادىق. سودان بەرى بيىلعى جەلتوقساندا تاۋەلسىزدىگىمىزگە 24 جىل بولادى. وسىندا وتىرعانداردىڭ كوپشىلىكتەرىڭىز تاۋەلسىزدىك العاننان كەيىن تۋدىڭىزدار. سىزدەر باقىتتى جاستارسىزدار، تاۋەلسىز ەلدىڭ جاستارىسىزدار. بۇنداي باقىت ءبىزدىڭ بۋىننىڭ باسىنا كەلگەن جوق»، - دەدى پرەزيدەنت.

مەملەكەت باسشىسى جاستىڭ قۋاتى - ءبىلىمى مەن بىلىگىندە، بىرلىگىندە جانە وتان سۇيگىشتىگىندە بولاتىندىعىن قاداپ ايتتى.

«ءبىز بابالاردان ميراس بولعان اتامەكەنىمىزدى تاۋەلسىز ەل ەتتىك. تۇرمىسى شالقىپ، ءتۇتىنى ءتۇزۋ شىققان باقۋاتتى مەملەكەتكە اينالدىرىپ، بارلىق دۇنيە جۇزىنە ەلىمىزدىڭ بار ەكەنىن بىلدىردىك. قازاقتىڭ بار ەكەنىن بىلدىردىك»، - دەدى ن. نازاربايەۆ.

اۆتور: رۋسلان عابباسوۆ