دەنيس تەن: جاقىن ارادا ءوزىمنىڭ تۋعان ءتىلىمدى وقۋعا مۇددەلىمىن

استانا. قازاقپارات - بۇگىن استانادا باسپا ءسوز ءماسليحاتىن وتكىزگەن قازاقستاندىق مانەرلەپ سىرعاناۋشى، الەم بىرىنشىلىگىنىڭ كۇمىس جانە قولا مەدال يەگەرى، وليمپيادانىڭ قولا جۇلدەگەرى دەنيس تەن قازاق ءتىلىن مەڭگەرۋگە كۇش سالاتىنىن ءمالىم ەتتى.

«قازاق ءتىلى مەن ءۇشىن قىزىقتى. بۇنىڭ الدىندا اقپارات بولدى ما، بىلمەيمىن، مەن بالا شاعىمدا قازاق بالاباقشاسىنا بارعانمىن. ول كەزدە قازاق تىلىندە جەتىك سويلەتىنىمدى بىلمەپپىن دە، سەبەبى تىلدەردىڭ اراجىگىن اجىراتا المادىم.

سوسىن تاعدىردىڭ سالعانى سول، مەنى 10 جاسىمدا ماسكەۋگە الىپ كەتتى. تيىسىنشە، مەكتەپتى دە ماسكەۋدە وقىدىم جانە قازىرگى ۋاقىتتا قازاق تىلىنە قاتىستى ءبىلىمىم ۇمىتىلىپ كەتكەن. بۇگىندە تەك اۋىزەكى جانە قاراپايىم اڭگىمەلەردى ازداپ تۇسىنەمىن، ءبىراق ازىرگە قازاق تىلىندە سويلەپ، سۇحبات بەرۋگە مەنىڭ دەڭگەيىم ءالى جەتكىلىكسىز. كەشە عانا نۇرلان قويانبايەۆتىڭ «تۇنگى ستۋديا» باعدارلاماسىندا بولدىم، ونىڭ باعدارلامالارىنىڭ بارلىعى قازاقشا وتەدى، مەنىمەن بولعان ءتۇسىرىلىم دە قازاق تىلىندە ءوتتى، وسى تۇرعىدان العاندا دا ءتىلدى بىلگەن جاقسى. جاقىن ارادا ءوزىمنىڭ تۋعان ءتىلىمدى وقۋعا مۇددەلىمىن»، - دەپ اتاپ ءوتتى سپورتشى.

دەگەنمەن، ونىڭ ايتۋىنشا، كۇنتىزبەنىڭ تىعىزدىعىنا بايلانىستى، مەملەكەتتىك ءتىلدى وقۋعا ۋاقىت تا، مۇمكىندىك تە بولا بەرمەيدى.

 «ونى قالاي ۇيىمداستىرۋ مۇمكىن ەكەنىن بىلمەيمىن. سەبەبى ءاردايىم الەمنىڭ ءتۇرلى مەملەكەتتەرىنە ساپاردا بولامىن، ا ق ش- تا جاتتىعۋ جاسايتىندىقتان، سوندا كوپ ۋاقىت وتكىزەمىن. ونىڭ ۇستىنە قازاق- بريتان ۋنيۆەرسيتەتىندە وقىپ جاتىرمىن. ال وندا ساباق تەك اعىلشىن تىلىندە وتەدى. سوعان قاراعاندا مەنى مۋلتيتىلدى ادام دەپ اتاۋعا بولاتىن سياقتى. ءسوزسىز، كەلەسى تىلدىك بىلىمدەرىمنىڭ قاتارىنا قازاق ءتىلى قوسىلادى. ماعان جانكۇيەرلەر قازاق تىلىندە جازعاندا مەن قۋانامىن، بۇل ۇلكەن قۋانىش سىيلايدى»، - دەدى د. تەن.

الايدا، وسىعان قاراماستان، دەنيس تەن قازاق تىلىندە ويىن جەتىك جەتكىزەتىندەي دەڭگەيگە جەتۋگە قول جەتكىزۋگە ماقسات قويىپ وتىر.

«ەرتە مە، كەش پە، قازاق ءتىلىن مەڭگەرەتىنىم انىق. ماسەلە تەك ۋاقىتقا تىرەلىپ تۇر، مەن ءوز انا ءتىلىمدى مەڭگەرۋگە تەك قۋانىشتى بولار ەدىم. قازىر مەن تەك سپورتتىق جەتىستىكتەرىممەن ەلىمە دەگەن ماحابباتىمدى تانىتىپ ءجۇرمىن، ەگەر مەن ونى ءوز حالقىمنىڭ تىلىمەن دە بىلدىرە السام، بۇل ماعان دا، اتا- اناما دا ۇلكەن قۋانىش بولاتىنى ءسوزسىز. مەن ەڭ قوناقجاي ەلدە تۋعانىما باقىتتىمىن»، - دەپ ءتۇيدى ويىن د. تەن.

 ەسكە سالساق، بيىل ناۋرىزدا شاڭحايدا وتكەن الەم بىرىنشىلىگىندە د. تەن قازاقستان قورجىنىنا قولا مەدال سالعان بولاتىن. د. تەن قازاقستان تاريحىندا مانەرلەپ سىرعاناۋدان الەمدىك بىرىنشىلىكتەردە جانە وليمپيادا جارىستارىندا جۇلدە سالعان العاشقى سپورتشى ەكەنىن ايتا كەتكەن ءجون.

اۆتور: جاسۇلان جولدىبايەۆ