الەم اپتا ىشىندە: مىسىر مەن كەنياداعى لاڭكەستىك جۇزدەگەن ادامنىڭ ءومىرىن جالمادى
اتاپ ايتقاندا، وحوت تەڭىزىندە رەسەيلىك «دالنيي ۆوستوك» تراۋلەرى سۋعا باتىپ كەتسە، «انسار بەيت ال-ماكديس» توبىنىڭ سودىرلارى مىسىر ارمياسىنىڭ شولعىنشىلارىنا، ال «اش-شاباب» لاڭكەستەرى كەنيانىڭ گاريسس قالاسىنداعى ۋنيۆەرسيتەتكە شابۋىل جاسادى.
«دالني ۆوستوك» تراۋلەرى اپاتقا ۇشىرادى
2- ءساۋىر كۇنى وحوت تەڭىزىندە «دالني ۆوستوك» تراۋلەرى اپاتقا ۇشىرادى. كەمە بورتىندا 132 ادام بولعان. ولاردىڭ قاتارىندا رەسەي، ميانما، ۆانۋاتۋ، ۋكراينا جانە لاتۆيا ازاماتتارى بار. بۇگىنگى كۇنى 56 ادامنىڭ قازا تاپقانى بەلگىلى، تەڭىزشىلەردىڭ باسىم بولىگى سۋىقتان ءۇسىپ ولگەن. ەكيپاجدىڭ 63 مۇشەسى عانا ءتىرى قالدى، ولاردىڭ 7 ەۋىنىڭ جاعدايى وتە اۋىر. تاعى 13 ادامنىڭ تاعدىرى بەيمالىم، قازىرگى ۋاقىتتا ولاردى ىزدەۋ جۇمىستارى جۇرگىزىلۋدە.
ىزدەۋ جۇمىسىن 2 مىڭنان استام قۇتقارۋشى جانە 100 دەن استام ءتۇرلى تەحنيكا جۇمىلدىرىلعان. اۋە جانە تەڭىز كەمەلەرى تەڭىزدىڭ 9 مىڭ شارشى مەترگە جۋىق اۋماعىن شولىپ شىقتى. ءتىرى قالعان تەڭىزشىلەردىڭ ايتۋىنشا، كەمە سۋعا بىردەن باتىپ كەتكەن. سول سەبەپتى كەمەنىڭ اپاتقا ۇشىراعاندىعى جايىندا دابىل بەرىلىپ ۇلگەرمەگەن. تەرگەۋ امالدارى اپاتتىڭ 2 نەگىزگى سەبەبىنە دەن قويۋدا. ونىڭ بىرىنە سايكەس، كەمە مۇزبەن سوقتىعىسۋى مۇمكىن. بۇدان بولەك، اۋلانعان بالىقتى كەمەگە كوتەرىپ سالۋ بارىسىنداعى قاۋىپسىزدىك ەرەجەسىنىڭ ساقتالماۋى دا تراۋلەردىڭ اۋدارىلۋىنا تۇرتكى بولۋى ىقتيمال.
قۇتقارۋشىلار 3- ءساۋىر كۇنى ءتىرى قالعان تەڭىزشىلەردى ەڭ جاقىن ساحالين پورتىنا باعىت ۇستانعان «اندرومەدا» كەمەسىنە وتىرعىزعان. جاعدايلارى وتە اۋىر دەگەندەردى تىكۇشاقپەن ماگادان قالاسىنداعى اۋرۋحاناعا جونەلتكەن. كۇشتى جەل ىزدەستىرۋ جۇمىستارىنا ەلەۋلى كەدەرگى كەلتىرۋدە.
سوڭعى اقپاراتتارعا قاراعاندا، جوعالعان 13 تەڭىزشىنىڭ مۇردەسى كەمە ىشىندە بولۋى مۇمكىن. ەگەر بۇل جايت ناقتىلاناتىن بولسا، وندا كەمەنى سۋدان كوتەرىپ شىعارۋعا تۋرا كەلەدى. تراۋلەر اپاتقا ۇشىراعان ايماقتاعى وحوت تەڭىزىنىڭ تەرەڭدىگى شامامەن 200 مەتردەن اسىپ جىعىلادى. ال سۇڭگۋىرلەر 90 مەترلىك تەرەڭدىككە عانا بويلاي الادى. بۇعان قوسا، ولاردىڭ 60 مەترلىك تەرەڭدىكتە عانا جۇمىس ىستەۋگە مۇمكىندىكتەرى بار. قازىرگى ۋاقىتقا دەيىن شتاتتىق كەستەگە ساي 94 ادامنىڭ ورنىنا نەلىكتەن 132 تەڭىزشىنىڭ بولعاندىعى بەيمالىم. رەسەي تەڭىزشىلەرى كاسىپوداعى قيىر شىعىس وڭىرلىك ۇيىمىنىڭ ءتوراعاسى نيكولاي سۋحانوۆتىڭ پىكىرىنشە، سۋعا باتقان «دالني ۆوستوك» تراۋلەرىندەگى شەتەلدىك ازاماتتار زاڭسىز جۇمىس ىستەۋى مۇمكىن.
«دالنيي ۆوستوك» تراۋلەرى 1989-جىلى جاسالعان. ۇزىندىعى 104,5 مەتر، ەنى 16 مەتر، سۋ سىيىمدىلىعى 5715 توننا، ەڭ جوعارى جىلدامدىعى 16,1 ۋزل.
مىسىر مەن كەنياداعى لاڭكەستىك
بەيسەنبى كۇنى يسلامشىل سودىرلار سيناي تۇبەگىنىڭ سولتۇستىگىندەگى باقىلاۋ-وتكىزۋ بەكەتىندە كەزەكشىلىگىن اتقارىپ جۇرگەن مىسىر ارمياسىنىڭ شولعىنشىلارىنا شابۋىل جاسادى. سودىرلار اۆتوماتتان جانە گراناتومەتتەن شولعىنشىلارعا قاراتا وق جاۋدىردى. مىسىر اسكەري قىزمەتشىلەرى دە قاراپ قالعان جوق، ولار دا قارۋ قولداندى. لاڭكەستىك اكت سالدارىنان 15 مىسىرلىق اسكەري قىزمەتشى، 2 بەيبىت ادام قازا تاۋىپ، 19 ادام جاراقات الدى. مىسىر شولعىنشىلارى دا كەمىندە 15 سودىردىڭ كوزىن جويدى. رەسمي كاير بۇل لاڭكەستىك ارەكەتتى «انسار بەيت ال-ماكديس» توبىنىڭ سودىرلارى جاساعاندىعىن ايتۋدا.
ءدال وسى «اش-شاباب» توبىنىڭ سودىرلارى كەنيانىڭ گاريسس قالاسىنداعى «Garissa University College» ۋنيۆەرسيتەتى عيماراتىنا باسىپ كىرىپ، ستۋدەنتتەرگە قاراتا وق جاۋدىرىپ، سوڭىنان ولاردى كەپىلگە الدى. شابۋىل كەزىندە ۋنيۆەرسيتەت عيماراتىندا كەمىندە 700 ستۋدەنت بولعان، ولاردىڭ شامامەن 80 ءى قاشىپ قۇتىلا الدى.
امان قالعان ستۋدەنتتەردىڭ ءبىرىنىڭ ايتۋىنشا، لاڭكەستەر قۇراندى جاتقا ايتۋعا تالاپ ەتكەن. ال بىلمەگەندەردى بىردەن اتىپ تاستاعان. ستۋدەنتتەر كەپىلگە الىنعاننان كەيىن بىرنەشە ساعاتتان سوڭ ارنايى جاساق قىزمەتتەرى عيماراتقا باسىپ كىردى. كەيبىر ب ا ق- تاردىڭ اقپاراتىنا قاراعاندا، 4 لاڭكەس قاۋىپسىزدىك قىزمەتى وكىلدەرى عيماراتقا باسىپ كىرگەندە وزدەرىن جارىپ جىبەرگەن. لاڭكەستىك سالدارىنان 147 ستۋدەنت، 2 اسكەري قىزمەتشى قازا تاپتى. 70 تەن استام ادام ءتۇرلى دەنە جاراقاتىمەن اۋرۋحاناعا ءتۇستى.
دارىگەرلەردىڭ ايتۋىنشا، قازا تاپقاندار قاتارى ارتا ءتۇسۋى مۇمكىن. ويتكەنى، اۋرۋحاناعا تۇسكەن ادامداردىڭ كەيبىرىنىڭ ءحالى وتە اۋىر. كەنيا قۇقىق قورعاۋ ورگاندارى مالىمەتتەرىنە سايكەس، شابۋىلدى ۇيىمداستىرعان - مۇحاممەد مۇحاممۋد. بيلىك اتالعان ادام جايىندا اقپارات بەرگەندەرگە 215 مىڭ دوللار كولەمىندە سىياقى تاعايىنداپ وتىر.
اۆتور: مارلان جيەمباي
