قازاقستان جانە رەسەي زيالىلارى استاناداعى فورۋمدا باس قوستى

استانا. قازاقپارات - استانا قالاسىندا قازاقستان رەسپۋبليكاسىنىڭ تۇڭعىش پرەزيدەنتى - ۇلت كوشباسشىسىنىڭ كىتاپحاناسىندا «بەيبىتشىلىك پەن جاسامپازدىق ديالوگى» اتتى قازاقستان مەن رەسەي زيالىلارى فورۋمى ءوتتى.

ءىس-شارانى «قازاقستان رەسپۋبليكاسىنىڭ تۇڭعىش پرەزيدەنتى - ۇلت كوشباسشىسىنىڭ كىتاپحاناسى» مەملەكەتتىك مەكەمەسىنىڭ قولداۋىمەن «قازاقستان ازاماتتىق اليانسى»، «ەۋرازيالىق مونيتورينگ» تالدامالىق زەرتتەۋلەر ورتالىعى (قازاقستان رەسپۋبليكاسى)، «سيەۆەر-يۋگ» ساياسي ورتالىعى (رەسەي فەدەراتسياسى)، «ەۋرازيالىق زەرتتەۋلەر ينستيتۋتى» دامۋ قورى (رەسەي فەدەراتسياسى) ۇيىمداستىردى.

وعان قازاقستان رەسپۋبليكاسى پارلامەنتى ءماجىلىسى مەن رەسەي فەدەراتسياسى مەملەكەتتىك دۋماسىنىڭ دەپۋتاتتارى، قوعامدىق جانە ارداگەرلىك ۇيىمداردىڭ جەتەكشىلەرى، اكادەميالىق قاۋىمداستىق، جاستار ۇيىمدارى مەن ب ا ق وكىلدەرى، سونىمەن قاتار قازاقستان مەن رەسەيدىڭ الدىڭعى قاتارلى ساراپشىلارى مەن تانىمال قوعام جانە ساياسي قايراتكەرلەرى قاتىستى.

ساراپشىلار قازاقستاندىق ەكونوميكانىڭ كوپتەگەن سىندارعا توتەپ بەرۋگە قاۋقارلى ەكەندىگىن اتاپ ءوتتى. بۇل ەڭ ءبىرىنشى قازاقستاننىڭ جاڭا ەكونوميكالىق ساياساتى - «نۇرلى جول» باعدارلاماسىنىڭ ارقاسىندا.

«قازاقستان ەكونوميكاسىنىڭ دامۋ جوسپارى بۇگىندە گەوساياسي جانە ستراتەگيالىق تالاپتارعا تولىق جاۋاپ بەرەدى. سەبەبى ەڭ مىقتى مەملەكەتتەر عانا بولاشاققا نىق سەنىممەن قارايدى. تەك ەڭ مىقتى كوشباسشىلار عانا ەلدى ونجىلداعان دامۋعا الىپ جۇرە الادى. قولدا بار تەحنولوگيالارعا جانە ەلدەگى حالىقتار مادەنيەتىنىڭ ىقپالداستىعى نەگىزىندە قۇرىلعان، ءاربىر وتباسىعا قولداۋ جاسايتىن، ءاربىر ازاماتقا باستاماشىل بولۋعا مۇمكىندىك بەرەتىن قازاقستاننىڭ جاڭا ەكونوميكالىق ساياساتى - قازاقستانعا وسىناۋ ۇلكەن قۇرلىقتا ءوزىنىڭ جوعارى ورنىن ساقتاۋعا مۇمكىندىك بەرەدى»، - دەيدى ر ف- نىڭ گوسدۋما دەپۋتاتى ماكسيم شينگاركين.

كەزدەسۋ قاتىسۋشىلارى قازاقستاننىڭ ۇدەمەلى يندۋستريالىق-يننوۆاتسيالىق دامۋ باعدارلاماسىن ىسكە اسىرۋ بويىنشا، سونداي-اق شاعىن جانە ورتا بيزنەستى قولداۋ سالاسىنداعى ءساتتى تاجىريبەسىنە ەرەكشە توقتالدى.

جالپى، جيىندا «قازاقستان-2050» ستراتەگياسىن ودان ءارى ىسكە اسىرۋ قازاقستانعا ەكونوميكاسىنىڭ دامۋ قارقىنىن ساقتاپ، ەڭ دامىعان 30 ەلدىڭ قاتارىنا قوسىلۋعا مۇمكىنىدك بەرەدى دەگەن ورتاق پىكىر ايتىلدى.

اۆتور: جاسۇلان جولدىبايەۆ