سايلاۋ بايقاۋشىلارىنا سەمينار ءوتىپ جاتىر

استانا. قازاقپارات - بۇگىن ەلورداداعى «قازمەديا» ورتالىعىندا «سايلاۋعا باقىلاۋ جۇرگىزۋدىڭ امالدارى مەن ادىستەرى» تاقىرىبىندا سەمينار ترەنينگ وتۋدە.

شارانى قازاقستان رەسپۋبليكاسىنداعى پرەزيدەنت سايلاۋىن باقىلاۋ جونىندەگى رەسپۋبليكالىق قوعامدىق كوميسسيا ۇيىمداستىرىپ وتىر.

«ءبىز ءوز بايقاۋشىلارىمىزدىڭ سانىن ون مىڭ ادامعا جەتكىزۋدى الدىمىزعا ماقسات ەتىپ وتىرمىز. بارلىق وبلىستاردا قازىرگى ۋاقىتتا شتابتارىمىز قۇرىلدى جانە ايماقتاعى كوميسسيا مۇشەلەرى سەمينار ۇيىمداستىرۋدا»، - دەدى اتالعان رەسپۋبليكالىق كوميسسيا مۇشەسى ۆلاديمير تەلنوۆ.

ونىڭ اتاپ وتۋىنشە، بۇگىنگى سەمينارعا ەلوردالىق بايقاۋشىلاردىڭ تەك ءبىر بولىگى عانا قاتىسۋدا.

«ويتكەنى ءبىز ءاربىر سايلاۋ ۋچاسكەسىندە ءوز بايقاۋشىلارىمىزدىڭ بولۋىن جوسپارلاۋدامىز. سوندىقتان بۇگىنگىدەي ترەنينگتەر قازاقستاننىڭ بارلىق وڭىرىندە ۇيىمداستىرىلادى»، - دەدى ول.

سەميناردىڭ باستى ماقساتى رەسپۋبليكالىق كوميسسيا ميسسياسى مەن مىندەتتەرىن ءتۇسىندىرىپ، باقىلاۋ پروتسەسسىن جەتىلدىرۋ بولىپ سانالادى. سەمينار بارىسىندا سايلاۋ ناۋقانىنداعى بايقاۋشىلاردىڭ نەگىزگى ءرولى، بايقاۋ جۇرگىزۋ بارىسىندا اقپاراتتىق تەحنولوگيالاردى پايدالانۋ تۋرالى ماسەلەلەر تالقىلانۋدا.

 اۆتور: مارلان جيەمباي