بۇگىن «مەنىڭ قازاقستانىم» پويىزىنىڭ ح ق ك و مامانى حرومتاۋ اۋدانىنىڭ اكىمىن قابىلدادى - فوتو

حرومتاۋ. قازاقپارات - «مەنىڭ قازاقستانىم» پويىزىنىڭ اقتوبە وبلىسى حرومتاۋ اۋدانىنداعى جۇمىس كۇنى بارىسىندا «ح ق ك و» ر ك م بۇزۋشىلىقتاردىڭ الدىن الۋ جانە تالداۋ ءبولىمىنىڭ ديرەكتورى الىبەك بازارقۇلوۆ اۋدان اكىمى ايازباي وسماناليەۆتى قابىلدادى.

 «اكىم ماعان اۋدانداعى مەملەكەتتىك قىزمەت كورسەتۋ سالاسىن جاقسارتۋ ءۇشىن اكىمدىككە ح ق ك و- عا ارنالعان ينتەگراتسيالانعان اقپاراتتىق جۇيە باعدارلاماسىن ورناتۋ تۋرالى ۇسىنىستارىمەن كەلدى. مەن ول كىسىگە مونيتورينگ باعدارلامالارىن ورناتۋدى ۇسىنىپ، ول ءۇشىن ق ر ينۆەستيتسيالار جانە دامۋ مينيسترلىگىنىڭ بايلانىس، اقپاراتتاندىرۋ جانە اقپارات كوميتەتىنە ارنايى حات جازۋ كەرەك ەكەندىگىن ءتۇسىندىردىم. ويتكەنى ول باعدارلامالاردى ورناتۋ سول كوميتەتتىڭ عانا قۇزىرەتىندە»، - دەپ اتاپ ءوتتى مامان.

ا. بازارقۇلوۆتىڭ ايتۋىنشا، قازىرگى تاڭدا ح ق ك و قىزمەتىنە تاعى 35 مەملەكەتتىك قىزمەت پيلوتتىق جوبا رەتىندە قوسىلىپ وتىر.

«اۋدان اكىمى وسى جوباعا اكىمدىك تاراپىنان قولداۋ كورسەتىلەتىنىن اتاپ ءوتتى. سونىمەن قاتار، ونىڭ ايتۋىنشا، اۋدان تۇرعىندارى جالپى ح ق ك و جۇمىسىنا دان ريزا»، - دەپ تولىقتىردى «مەنىڭ قازاقستانىم» پويىزىنىڭ مامانى.

سونداي-اق، ح ق ك و اقتوبە وبلىسى فيليالى حرومتاۋ بولىمشەسىنىڭ مەڭگەرۋشىسى ەركىنباي ءجۇسىپ ۇلىنىڭ ايتۋىنشا، «مەنىڭ قازاقستانىم» پويىزىنىڭ ماماندارى حالىققا قىزمەت كورسەتۋ باعىتى بويىنشا حرومتاۋ اۋدانىنىڭ 30 عا جۋىق تۇرعىنىن قابىلدادى.

«مەنىڭ قازاقستانىم» پويىزىنىڭ ءبىزدىڭ اۋدانعا كەلگەنىنە ەل بولىپ، جۇرت بولىپ قۋانىپ جاتىرمىز. پويىز ماماندارى اۋدان حالقىنىڭ ءتۇرلى سالالار بويىنشا ارىز-تىلەكتەرىن تىڭداپ، مۇمكىندىگىنشە جاۋاپ بەردى. سولاردىڭ ىشىندە ءبىزدىڭ حالىققا قىزمەت كورسەتۋ ورتالىعىنىڭ مامانى دا كەلدى. ول كىسى اۋداننىڭ ح ق ك و ماماندارىمەن بىرگە حالىقتى قابىلداپ، ولاردىڭ ۇسىنىس-پىكىرلەرىن تىڭدادى. ءدال وسى ءبىزدىڭ سالا بويىنشا 30 عا جۋىق سۇراق بولدى. ولاردىڭ نەگىزگىسى جەر ماسەلەسى، مەملەكەتتىك قىزمەت كورسەتۋ سياقتى سۇراقتار بولدى. سول جەردە شەشىمىن تاپقان سۇراقتار دا بولدى، كۇردەلى دەگەن ماسەلەلەردى ءبىز جازىپ الىپ وبلىسقا، ودان ءارى رەسپۋبليكاعا جەتكىزەتىن بولامىز»، - دەيدى ول.

ە. ءجۇسىپ ۇلىنىڭ ايتۋىنشا، سونىمەن قاتار، ءوز ۇسىنىستارىمەن كەلگەن تۇرعىندار دا بولدى. «ماسەلەن جەر كودەكسىنىڭ 44-بابىنىڭ 1-تارماعىنا وزگەرىستەر ەنگىزىلسە دەگەن ۇسىنىستار بولدى. ول بويىنشا، بۇرىن جەر الۋ ءۇشىن ازاماتتار تىكەلەي اكىمدىككە باراتىن بولسا، قازىر ح ق ك و- عا كەلەدى. ال ءبىز ەلدى مەكەندەردە ورنالاسقان جەر تەلىمدەرى تۋرالى تولىق مالىمەتتى بىلمەيمىز. اكىمدىكتەر قاي جەر بوس، قايسىسى جايىلىمدىق جەر، قايسىسى شارۋاشىلىق جەر دەگەندى ءبىلىپ وتىرادى. سول سەبەپتى، ءبىزدىڭ دە ويىمىزشا، ەلدى-مەكەننىڭ جەرلەرىن تىكەلەي اكىمدىكپەن بايلانىستىرعان ءجون»، - دەيدى مامان.

اۆتور: ءابۋ-اسقار مەكەش ۇلى