سىر وڭىرىندە سيليكات كىرپىش ءوندىرىسى جاندانباق
ۋران وندىرۋگە كەرەك قۇبىرلار دايىنداۋ، ميا تامىرىن وڭدەۋ، اك تاسىن شىعارۋ. بۇل - يندۋستريالاندىرۋ باعدارلاماسى قولعا الىنعالى اۋدان كولەمىندە ىسكە قوسىلعان جاڭا وندىرىستەردىڭ ءبىر پاراسى.
جالپى شاعىن-ورتا كاسىپكەرلىك توڭىرەگىندە كەزەگىن كۇتكەن 20 جوبا فورۋم قاتىسۋشىلارىنا تانىستىرىلدى. سونىڭ ءبىرى جىلىجاي قالاشىعىن سالۋ باستاماسىنا بيزنەس وكىلدەرى ەرەكشە نازار اۋداردى. ماماندار اۋىل شارۋاشىلىعى سالاسى بويىنشا وندىرىلگەن ءونىم مەن تۇتىنۋ دەڭگەيىن دە سارالاپ قويعان. شيەلىلىكتەر كۇرىشتەن بولەك كوكونىس، باقشا ونىمدەرىن سىرت وڭىرلەرگە ساتادى ەكەن. كەرىسىنشە قۇس ەتى مەن جۇمىرتقانىڭ 90% ى سىرتتان اكەلىنەدى. دەمەك قۇس ءوسىرۋ فەرماسىن سالۋ ينۆەستورلارعا مول مۇمكىندىك تۋعىزارى انىق.
«شاعىن قۇس فەرماسى 1000 باسقا 8,9 ميلليون تەڭگە بولادى. ەگەر ءوز قۋاتىندا جۇمىس ىستەيتىن بولسا، 1 جىلدا ءوزىن-ءوزى اقتاپ كەتەدى دەپ ەسەپتەپ وتىرمىز. 400 توننا قۇس ەتىن وندىرۋگە، 2000 دانا جۇمىرتقا وندىرۋگە مۇمكىندىك بەرەدى»، - دەيدى شيەلى اۋداندىق اۋىل شارۋاشىلىعى ءبولىمىنىڭ مامانى بازارباي ساحوۆ.
مەملەكەتتىك قولداۋدىڭ قولجەتىمدىلىگى كەرەك. كاسىپكەرلەر پالاتاسى بۇل باعىتتى دا جۇيەلەندىرۋدىڭ جولىن تاۋىپ بەردى. وبلىستا بەسىنشى بولىپ شيەلى اۋدانىندا كاسىپكەرلەردى قولداۋ ورتالىعى اشىلدى.
«اۋدان دەڭگەيىندە وسىنداي ورتالىق اشىلىپ جاتىر جانە بۇگىنگى جاڭالىق سۇلۋتوبە جانە ەڭبەكشى اۋىلدارىندا تىكەلەي اۋىلدان شىقپاي، كەڭەس الۋعا بولاتىنىن بۇگىن دالەلدەپ وتىرمىز»، - دەيدى قىزىلوردا وبلىستىق كاسىپكەرلەر پالاتاسىنىڭ ديرەكتورى رۋسلان دوسماحانوۆ.
ينۆەستورلارعا قولايلى جاعداي بار. وسى ماقساتتا شيەلى كەنتىنەن 50 گەكتار جەر تەلىمى ءبولىنىپ، ارنايى يندۋستريالدى ايماق قۇرىلدى. ەكونوميكاسى تۇراقتى، تابيعي رەسۋرسقا باي، ينفراقۇرىلىمى دايىن وڭىرگە قارجى سالۋعا نيەتتى كاسىپكەرلەر فورۋم اياسىندا مەموراندۋمعا قول قويدى. بۇل كەلىسىمدەر نەگىزىندە سيليكات كىرپىش ءوندىرىسى جاندانىپ، ەت ەكسپورتى ارتادى دەگەن بولجام بار، دەپ جازادى 24.kz.
