ق ر پرەزيدەنتى: وداقتاس ەلدەرىمەن شەكارالار اشىلۋىنا بايلانىستى ءوزىمىزدى عانا ەمەس، كورشى ەلدەردى دە ونىممەن قامتاماسىز ەتۋ قاجەت

شىمكەنت. قازاقپارات - وڭتۇستىك قازاقستان وبلىسىنا جۇمىس ساپارى بارىسىندا مەملەكەت باسشىسى نۇرسۇلتان نازاربايەۆ كوكونىس ونىمدەرىن وسىرەتىن رەسپۋبليكاداعى ءىرى جىلىجاي كەشەنىندە بولدى، دەپ حابارلادى اقوردانىڭ باسپا ءسوز قىزمەتى.

قازاقستان پرەزيدەنتى وبلىستىڭ كاسىپكەرلەرىمەن جانە اۋىل شارۋاشىلىعى تاۋار وندىرۋشىلەرىمەن اڭگىمەلەسىپ، ءوڭىردىڭ الەۋمەتتىك- ەكونوميكالىق دامۋىنىڭ وڭ سەرپىنىن اتاپ ءوتتى.

- وڭتۇستىك قازاقستان وبلىسىندا اگروونەركاسىپ كەشەنى ءۇشىن بارلىق قاجەتتى جاعداي جاسالعان. مەملەكەت اۋىل شارۋاشىلىعىن دامىتۋ ىسىنە جان-جاقتى قولداۋ كورسەتىپ، قاجەتتى قاراجات بولۋدە. بەس جىلدا وڭىردە 2,3 ميلليون توننا كوكونىس ءوندىرىلدى.

قازاقستاندا مۇنداي جوعارى كورسەتكىشتەرى مەن تابيعي جاعدايلارى بار باسقا ءوڭىر جوق. قازىر ءبىز ەۋرازيالىق ەكونوميكالىق وداق ەلدەرىمەن شەكارامىزدى اشىپ جاتىرمىز. وسىعان بايلانىستى بىزگە ءوزىمىزدى عانا ەمەس، كورشى ەلدەردى دە ونىممەن قامتاماسىز ەتۋ قاجەت، - دەدى نۇرسۇلتان نازاربايەۆ.

 مەملەكەت باسشىسى كولىك ينفراقۇرىلىمىن دامىتۋ قاجەتتىگىنە باسا نازار اۋداردى.

- ەگەر ەلدە جاقسى جولدار بولماسا، ساۋدا دامىمايدى، سايكەسىنشە ەكونوميكا دا وركەندەمەيدى. سوندىقتان، ءبىز قازىر ەلدىڭ بارلىق وڭىرىندە كولىك جەلىلەرىن سالىپ جاتىرمىز، مىڭداعان جۇمىس ورىندارى اشىلۋدا. ءار ءوڭىردىڭ الدىنا ناقتى مىندەتتەر قويىلعان، سونى ورىنداۋ جۇمىستارىن جالعاستىرۋ قاجەت، - دەدى قازاقستان پرەزيدەنتى.

ءوز كەزەگىندە اگرارشىلار نۇرسۇلتان نازاربايەۆقا اۋىل شارۋاشىلىعى سالاسىنا شوعىرلانعان شاعىن جانە ورتا بيزنەس كاسىپورىندارىنا كورسەتىلىپ وتىرعان جان-جاقتى مەملەكەتتىك قولداۋ ءۇشىن العىس ايتتى.

«ادەليا» شارۋا قوجالىعىنىڭ يندۋستريالاندىرۋ كارتاسى اۋقىمىندا جۇزەگە اسىرىلعان جىلىجاي كەشەنىنىڭ وندىرىستىك قۋاتى جىلىنا 6 مىڭ توننا ءونىم وندىرۋگە جەتەدى. كاسىپورىندا 200 دەي جاڭا جۇمىس ورنى قۇرىلعان. جىلىجاي كەشەنىن باسقارۋ ۇدەرىستەرى تولىق اۆتوماتتاندىرىلعان، نىسان فرانسۋزدىق «Rishel» كومپانياسىنىڭ زاماناۋي جابدىقتارىمەن جاراقتانعان.