مادەنيەت جانە سپورت ءمينيسترى ناۋرىزدا الاڭداعى كيىز ۇيلەرگە كىرۋگە ۇيالادى
«باتىس ول قازاقستان ەمەس پە، بىزدە قىزىق باتىستار كورىسە بەرسىن دەيدى. ءبىز قازىر ءوز ۇلتتىق كيىمىمىزدى كيۋگە ۇيالامىز، ونى كيىپ جاتقان ەشكىم جوق. ءبىر شاپان ماعان اينالىپ كەلدى دەپ انەكدوتتار شىعىپ جاتىر. شوتلاندار يۋبكا كيىپ شىقسا وي بۇلار كەرەمەت دەيمىز»، - دەيدى مادەنيەت جانە سپورت ءمينيسترى.
ازەربايجاندار نوۆرۋز بايرامى دەپ اتايدى بۇل مەرەكەنى. كۇن مەن ءتۇن تەڭەسەتىن مەيرامدى ءبىر اي بۇرىن اتاپ وتە باستايدى. ۇيلەر كوركەيتىلىپ، اعاش وتىرعىزىلادى. جاڭا كيىم تىگىلىپ، جۇمىرتقالار بويالادى. ءتاتتى- دامدىلەر مەن ۇلتتىق تاعامدار دايىندالادى.
ولاردىڭ سەنىمى بويىنشا، اقساقالدار 22 - ناۋرىز كۇنى تاڭ الاگەۋىمدە تاۋ باسىنا شىعىپ، تىلەك تىلەپ تاڭىرگە جالبارىنادى. ال وسىناۋ ءاز-ناۋرىزدى زاراوستريزمنەن اجىراتىپ العان قازاق ۇلتتىق مەرەكەنى ءوز دەڭگەيىندە تويلاي الىپ ءجۇر مە؟ كوڭىلدى كۇپتى قىلاتىن كۇدىك كوپ.
«الاڭداردا كيىز ۇيلەر تىگىلىپ، كونسەرتتىك باعدارلامالار كورسەتىلگەنىمەن، جالپى حالىق تەك شەنەۋنىكتەرگە قاراپ قىزىقتاۋمەن شەكتەلۋدە»، - دەيدى مادەنيەت ءمينيسترى.
پورتفەل ۇستاعانىنا ۇزاق ۋاقىت بولا قويماعان ول مۇنداي جاعدايدا ءوزىن ىڭعايسىز سەزىنەدى ەكەن.
«مەن ءوزىم شىنىن ايتقاندا ناۋرىزعا بارۋعا ۇيالام، ەندى قازىر مينيستر بولعان سوڭ باس كيىز ۇيگە الىپ بارادى، سىرتتا تۇرعان حالىق الا كوزبەن قارايدى نەگە ءبىزدى كىرگىزبەيدى. مەن ءوزىم شىنىن ايتقاندا ىڭعايسىزدانام. ەگەر بىرەۋىنە كىرمەسەڭ اۋدان اكىمى وكپەلەيدى. سىرتتا تۇرعان حالىق»، - دەيدى ۆەدومستۆو باسشىسى.
بۇگىندە ۇلىستىڭ ۇلى كۇنىن تويلاۋدىڭ جوعارى دەڭگەيدەگى ۇلگىسى جوق. الاڭعا شىعىپ اق شاڭقان ۇيلەردى سىرتتاي قىزىقتاپ قايتۋدان جالىققان جۇرت بۇگىندە ناۋرىزدى ءوز بەتتەرىنشە تويلاۋدى ۇردىسكە اينالدىرىپ العان.
7 كانال
