مەملەكەت باسشىسى استاناداعى ەتنو اۋىلدا ناۋرىزعا ارنالعان شارالاردى تاماشالادى - فوتو
«بۇگىن تاماشا مەرەكە. كوكتەمنىڭ جارقىراپ تۇرعان كۇنى. قىس ءبىتىپ، جىلۋ كەلىپ، تابيعاتتىڭ بارلىعى ءتىرىلىپ، بارلىعى قۋاناتىن كەز. وسى كەزبەن ءبىزدىڭ ناۋرىز دەگەن ءداستۇرلى، ۇلى مەرەكەمىز، ۇلىستىڭ ۇلى كۇنى تۋرا كەلەدى. اتا-بابامىزدان قالعان ءداستۇر بويىنشا بۇل كۇنى اعايىندار ءبىر-ءبىرىن كەشىرىپ، ءبىر-بىرىمەن قاۋىشىپ، جاقسىلىق، بەرەكە، باقىت تىلەيدى.
كەلەسى جىلعا دەيىن ەل امان، جۇرت تىنىش بولسىن دەيدى. سوندىقتان، ءبىز دە بۇگىن قازاقستاننىڭ بارلىق تۇپكىرىندە ناۋرىز مەرەكەسىن تويلاپ جاتىرمىز. بارشا قازاقستان حالقىنا سالەمىمدى جولداپ، اماندىق پەن جاقسىلىق تىلەيمىن! بارشا قازاق بولىپ، قازاقستان بولىپ، ەلىمىز امان، جۇرتىمىز تىنىش بولسىن دەپ تىلەيتىن بولساق، الدىمىزعا قويعان ماقساتتار مەن حالىقتىڭ بولاشاعىنا جۇمسالاتىن كۇش-قۋات جۇزەگە اسىپ، ەلىمىز بەرەكەلى بولادى. ناۋرىز قۇتتى بولسىن!»، - دەدى ەلباسى ەتنو اۋىلدا سويلەگەن سوزىندە.
الاڭدا تىگىلگەن وتاۋلاردا ءار ەتنوس وكىلدەرى ۇلتتىق كيىمدەرىن كيىپ، ءان شىرقاپ، ناۋرىز كوجە قايناتىپ، جۇرتشىلىققا تاراتتى. سونىمەن قاتار، ەتنواۋىلعا كەلگەن قالا تۇرعىندارى مەن قوناقتارى ۇلتتىق سپورت سايىستارى مەن ويىندارىنا قاتىسىپ، مەيرامعا وراي ۇيىمداستىرىلعان شارالاردى تاماشالاۋدا. مەملەكەت باسشىسى وسى ەتنو اۋىلدا ناۋرىز كوجەدەن ءدام تاتتى.
بۇدان بۇرىن حابارلانعانداي، بۇگىن ەلورداداعى «سارىارقا» ۆەلوترەگىندەگى «ناۋرىز - نۇرلى جول» مەرەكەلىك تەاترلاندىرىلعان قويىلىم بارىسىندا ەلباسى نۇرسۇلتان نازاربايەۆ بارشا قازاقستاندىقتاردى ۇلىق مەيراممەن قۇتتىقتادى. بۇل شارا «جاڭعىرعان تابيعات، باق قونعان ەل»، «قازاقستان - نۇرلى جول!»، «استانا - ماڭگىلىك ەلدىڭ ورتاسى»، «ناۋرىز - نۇرلى جول» اتتى ءتورت بولىمدە ءوتتى.
اۆتور: رۋسلان عابباسوۆ
